Salmos 107
107
E Devleko volipe ni achel
1Den fala e Devle soke vou si lacho,
soke leko volipe si ostade.#Sal 136.1.
2Phenenle gola kai si braduime letar,
gola kai braduisarda len
katar e zor e duzmanoki,
3gola kai chidia len katar e phuvia
katar o norte ta katar o sur
katar likel o kham ta katar perel.
4Von llana jasarde po pusto,
bi te malaven o drom
kai iek foro te zivin,
5sea bokhale ta trusale,
¡lena te meren!
6A ande pi nuzda mangle e Devletar,
ta vou ikanda len katar nuzda.
7Ta mapalal thoda len pe iek drom
kai llal orta kai iek foro kai sai zivin.
8Den fala e Devle pala leko volipe,
¡pala e ezgode kai cherel e manusenge!
9Soke vou phagel e trus katar o trusalo
ta del but jape e llenen kai si bokhale.
10Von zivina ando baro truniariko,
ta nasti likena katar e zalba ta e lanchura,
11soke ni kandie so phenela o Del,
ta ni thode sama
pe so mangela te cherel o Del o baro.
12O Del thoda len te radin zurale,
perena, a ni saia ko te vazdel len.
13A ande pi nuzda molisaile e Devleke,
ta vou ikanda len katar goia duk,
14ikanda len katar o baro truniariko
ta chinda lenge lanchura.
15Den fala e Devle pala leko volipe,
¡pala e ezgode kai cherel e manusenge!
16¡Vou phagla e udara
kai si cherde katar o tuch!
¡Vou phagla e chile sastrune!
17Von sea nasuale ta brigime
pala po bilachipe,
18gadonape ta nasti jana niso
¡ta o meripe avela pe lende!
19A ande pi nuzda molisaile e Devleke,
ta vou ikanda len katar lengi duk,
20vou dia orba, ta von sastile,
¡ikanda len katar o meripe!
21Den fala e Devle pala leko volipe,
¡pala e ezgode kai cherel e manusenge!
22Cheren leke kurbanura kai den le fala
ta den orba veselimaia katar
so cherel o Del.
23Gola kai lleletar pe mora ta cherena arli,
llana pe mora foro forote ta pe gua zivina,
24ta kana sea pe mora e bari,
dikhle o sukaripe kai cherda o Del.
25O Del phenda, ta avili iek bari balav
kai vazdela e valura,
26e mora chudela len upre ando miloso
ta chak telal,
¡ta izdraie daratar!
27Lulinape sargo mate,
¡ni blazila lenge niso sa so llanena!
28A ande nuzda molisaile e Devleke,
ta vou ikanda len katar lengi patnia,
29pharruda e bari balav
ta cherdala iek balaviorri,
ta e valura achile.
30Kana dikhle kai e mora achili,
veselisaile,
ta o Del inllarda len ando o foro
kai mangena te llan.
31Den fala e Devle pala leko volipe,
¡pala e ezgode kai cherel e manusenge!
32¡Blagosin le kana chidiniaol o foro!
¡Blagosin le kana chidiniaon e phure!
33E lena ta o pai kai likel katar e phuv,
o Del cherel len pusto ta phuv suki,
34e phuv lachi o Del cherel la phuv muli,
pala o bilachipe e llenengo kai zivin pe late,#Jen 19.23-28.
35vou cherel te pherel pai o pusto
ta cherel te likel o pai katar e phuv suki,#Dt 29.23; Sal 78.15-16; 105.41; Is 40.3; 43.19.
36kote thovel e llenen kai si lenge bok
ta von cheren pe forura.
37Thoven e simiche ande umalia
ta thoven te barion e drakha
ta chiden so del len phuv.
38Vou blagosil len, cherel len te barion
ta te avel len mai but zivirinie.
39A omanglal von merena
ta cherdona mai cherricha
pala e llene bilache
pala e nuzda ta e duk.
40O Del murzil pe gola gazda
ta cherel te jasaon po pusto bi dromeko.#Job 12.24.
41O Del lel e zalba katar e chorre,
¡cherel te bariol lengi familia sargo iek stoka!
42pe gala ezgode, e llene chache veselinpe
a e llene bilache phanden po mui.
43O lleno bizai,
ka thovel sama pe gala ezgode
ta ka acharel o volipe e Devleko.
Currently Selected:
Salmos 107: BACHRO
Highlight
Share
Compare
Copy
Want to have your highlights saved across all your devices? Sign up or sign in
Biblia ande chib Romani © Sociedad Bíblica Chilena, 2018.
