Salmos 106
106
O Israel ni kandel e Devle
1¡Aleluia!
¡Blagosin e Devle, soke vou si lacho,
soke leko volipe si ostade!#Sal 136.1.
2¿Ko sai phenel sar e si bare ezgode
kai cherda o Del?
¿Ko sai blagosil e Devle prema le?#Ez 20.2-44.
3¡Blagosime gola kai cheren so si orta
suako llive!
4De tut golli mandar Devla,
prema o volipe kai si tut pe cho foro.
De tut golli mandar
kana ka ave te bradui che foro,
5te dikhav o lachipe katar che esvirime,
te veseliu man ande dragostia katar cho foro
ta te cherav baripe ande ezgode kai dian len.
6Amen cherdam o bilachipe,
gia sar cherde le amare purane.
7Kana amare purane sea ando Ejipto,
ni acharde e glamne ezgode kai cherdan,
ni diepe golli katar cho baro volipe,
von vazdinaile pe tute
kana sea pasa e mora, e Mora e Loli.#Ek 14.10-12.
8A o Del, braduisarda len pala po anav,
te sai dikhol laki zor.#Dt 7.7-8; Ez 20.9; 36.22-23.
9Vou dia pe Mora e Loli ta e mora sukili,
cherda te phiren pe phuv e moraki
sargo kana phirena po pusto.
10Braduisarda len katar o dusmano.
Kurtulisarda len katar o va e dusmanoko.
11O pai ucharda lenge dusmanonen,
¡ni achila ni iek lendar llundo!
12Ondaka pachaie ande leke alava
ta llilabie te blagosin le.#Ek 14.21-31; 15.1-21.
13A oma bristarde so cherda o Del,
ta ni thode sama pe so mangela te cherel.
14Mangle e Devletar te cherel
so von mangena
kana sea po pusto
ta zumade e Devle.
15Vou dia len so mangle letar,
a bichalda pe lende o meripe.#Nm 11.4-34.
16Maskar e chare saia lenge joli po Moises,
ta i po Aaron, o santo e Devleko.
17Ondaka putaili e phuv ta jala e Datane,
ta ucharda e llenen katar o Abiram.
18Ta phabili e iag pe lenge llene,
ta o plameko phabarda
sa gola kai ni pachana.#Nm 16.1-35.
19Cherde iek telcho sunakuno
po burdo o Joreb
ta die changa angla le.
20Pharrude e Devle kai si glamno
pe iek guruv kai jal char.#Jer 2.11; Ro 1.23.
21Bristarde e Devle kai braduisarda len,
ta kai cherda bare ezgode ando Ejipto,
22glamne ezgode ande phuv katar o Kam,
ta baro chudo pe Mora e Loli.
23Ta sai mundardaia len
te na thodaiape angla o Del
o Moises leko esvirime,
te duriavel leki joli
ta te na mundarel len.#Ek 32.1-14.
24A von ni kamle e phuv kai zelina,
ta ni pachaie ande Devleke alava,
25samo murmalina ande pe chare
ta ni kandie e Devle.
26Goleke, vazdia po va pe lende
te dukhavel len po pusto,#Nm 14.1-35.
27te del ando lallao pe foro
maskar e forura
ta te rispil len
maskar e phuvia.#Lv 26.33.
28Mapalal pachaie ando Baal Peor
ta jale e kurbanura dine e mulenge.
29Ta cherde te joliaol o Del pala so cherde,
ta bichalda pe lende iek bari muka.
30Ondaka avilo o Fines
ta chinda lenge kris,
ta e muka achili.
31Ta o Del llinda chachi goia kris
ostade sa e porodoke.#Nm 25.1-13.
32Joliarde e Devle
pasa o pai katar o Meriba,
ta llela bilache e Moiseseke
pala lengi dos,
33gachin dukhade le
kai o Moises dia orba
bi te mislilpe so phenela.#Nm 20.2-13.
34Ni zatrisarde e forura
kai o Del phenda lenge te zatril,
35von amisaile e phuvienchar,
ta sikile te cheren
so cherena ande gola phuvia
36ta blagosisarde lenge delen,
ta goleke avili pe lende e zatrania,#Jue 2.1-3; 3.5-6.
37die kurbano pe chaurren
ta pe chorren e llavolonenge.#2 R 17.17.
38Ta cherde te chordol o rat bi dosalo,
o rat pe chaurrengo ta pe chorrengo
kai die len kurbano
e delenge katar o Kanaan,
ta e phuv achili melali e ratea.#Nm 35.33.
39Ta gia achile melale
sargo ando kurvaluko
pala sa o bilachipe kai cherde.
40Goleke o Del jolailo pe lende,
ta gadosailo katar pi phuv.
41Dia len kai aver phuvia
ta gazdarisarde len
gola kai murzina pe lende.
42Lenge dusmanura dukhade len
ta achile ando lallao tala lengo va.
43O Del but droma kurtulisarda len,
a von pale vazdinaile pe leke alava
ta achile ando lallao pala po bilachipe.
44A o Del kana dikhela
kai sea ande nuzda
ta asunela sar kukina,
45dela pe golli kai dia len po alav
ta ni cherela lenge so mangela
pala leki bari zalba.
46Ta cherda te avel zalba
sa e llenenge kai gazdarina pe lende.#Jue 2.14-18.
47Braduisar amen Devla,
tu san amaro Del,
ta chide amen maskar e phuvia,
te blagosi cho santo anav,
ta te blagosi tut veselimaia.
48¡Blagosime te avel
o Del katar o Israel
ostade sa e bursenchar!
Sa o foro te phenel:
¡Gia te avelpe!
¡Aleluia!#1 Kr 16.35-36.
Currently Selected:
Salmos 106: BACHRO
Highlight
Share
Compare
Copy
Want to have your highlights saved across all your devices? Sign up or sign in
Biblia ande chib Romani © Sociedad Bíblica Chilena, 2018.
