Proverbios 30
30
1Alava katar o Agur, chavo katar o Jake katar o Masa. O Agur anda eik poroka kai o Ukal ta kai o Itiel ta phenda:
2Me sem o mai silno katar sa,
ta ni llanav te misliu man sargo e manusa.
3Me ni sikilem o bizaipe,
ta ni pinllarav o bizaipe katar o Santo Del.
4¿Ko llelo upre ando miloso, ta fulisto?
¿Ko phangla e baliava ande po va?
¿Ko phangla e paia ande iek chiti?
¿Ko chapenisarda sa e riga katar e phuv?
¿Llane sar ikhardol vou, ta sar ikhardol leko chavo?
5Suako alav e Devleko si chisto,
vou si o eskudo katar gola kai uzdinpe ande lete.#2 S 22.31; Sal 18.30.
6Na thov ios alava ande leke alava,
soke sai del pe tute
ta sai ache sargo iek kojamno.
7Samo dui ezgode mangav tutar Devla,
delen mange mai anglal te merav:
8Duriar mandar so inai chacho ta o kojaipe,
na cher man ni chorro ni barvalo,
de man samo o marrno kai trubul man.#Mt 6.11.
9Soke sai avel man but
ta sai phenav kai ni pinllarav tut.
A te chorraiuvav sai cherdivao chorano,
ta golea ka kusav o anav katar mo Del.
10Na dosar e sluga angla leko gazda,
soke sai proketil tut ta ka inllare tuia guia duk.
11Si llene kai proketin pe dade
ta ni blagosin pe da.
12Si llene kai von peke si chiste,
a ni chistosaile katar po bilachipe.
13Si llene kai mislin kai si but glamne
ta dikhen pe aver barikamaia.
14Si llene kai lenge danda si sargo jarni,
ta lenge tharia sargo churia
te sai zatrin sa e llenen kai si chorre pe phuv.
15E rima kai jal o rat si la dui chorra
kai samo mangen te jan.
Katar trin ezgode ni chalion
ta i katar iek ios:
16O limori,
e diskinia kai nasti aven la minone,
e phuv suki,
ta e iag kai mangel ios kasta.
17Ko dikhel pe po dad jolinaia
ta marel espurnia katar so sikavel le leki dei,
e chiriklia katar e jar ka ikanen leke akha
ta e minone katar e agila ka jan le.
18Si trin ezgode kai ni llanav
ta i iek ios kai si mange chudo:
19O drom kai mukel e agila ando miloso,
o drom kai mukel o sap pe barra,
o drom kai mukel e llimia ande mora,
ta o drom kai mukel o muruseko pe diskinia.
20E diskinia kai llal averea cherel gia:
Jal, kosel po mui ta phenel:
Ni cherdem nisavo bilachipe.
21Trin ezgode cheren burkania pe phuv
ta si iek ios kai nasti terpil iek foro:
22o sluga kai cherdol charo,
o dilo kai si le but jape,
23e diskinia kai niko ni mangel la
ta zinilpe,
ta e sluga kai achel po than
katar e rromi e chereki.
24Star zivirinie si katar e mai minone pe phuv,
ta si e mai bizai neko e llene mai bizai:
25e chira sargo boñikura kai inai len zor
ta chinden po jape kana si o milai,
26e sosoia ni radin but ta zivin maskar e barra,
27e langoste, kai inai len charo
a phiren sargo boñikura,
28e sapurke kai sai istare len ande iek va
ta resen llik kai e charoko cher.
29Si trin tromane ta i iek ios
kai phiren but sukar,
30o liono kai si zuralo maskar e zivirinie
kai niso ni cherel le te irilpe palpale nikada,
31O basno kai si barikano, o busno
ta o charo kai llal angla pe boñikura.
32Ande cho dilipe te manglan te chere baripe,
ta te mislisailan te chere o bilachipe,
phande cho mui che vastea ta mislisao:
33te amisardan o thud, ka cherdol kaimako,
te phurdian zurale po cho nak ka likel o rat,
a te joliardan vareka ka marelpe tuia.
Currently Selected:
Proverbios 30: BACHRO
Highlight
Share
Copy
Want to have your highlights saved across all your devices? Sign up or sign in
Biblia ande chib Romani © Sociedad Bíblica Chilena, 2018.
