Filipenses 1
1
Salami
1Me o Pablo ta o Timoteo, sluge katar o Kristo Jesus, sa e llenenge kai si ando foro o Filipos ta kai pachan ando Jesus ta gazdarin ande khanlliri ta gola kai pomozin len:#Ech 16.12. 2Manga katar o Del amaro Dad ta amaro Gazda o Jesukristo, te del tumen volipe ta pas.
O Pablo del fala ta molilpe pala e llene kai pachan
3Suako drom kai dav man golli tumendar dav fala me Devle, 4ta suako drom kana moliv man, mangav veselimaia pala sa tumende, 5soke tumen pomozisarden kana e lachi viasta lia te llal angle llik akana. 6Me llanav kai o Del cherda iek rado but lacho tumenchar ta ka lacharel le ios lligo ni ka irilpe o Jesukristo.#Sal 138.8. 7Orta si te misliu man gia tumendar, soke tumen sen andre ande mo lio ta soke saurre sen manchar ande gava rado volimako kai dia man o Del, ta kana sema ande rubie ta llelem te dav orba angla e sudura ta te chacharav e lachi viasta. 8O Del llanel pe gachin voliv tumen e volimaia kai del man o Kristo Jesus. 9Kana moliv man mangav te cherdol ios mai baro tumaro volipe, ta te del tumen o Del bizaipe ta te cherel tumen te acharen, 10te sai llanen te esvirin so si mai lacho, ta gia tumaro zivoto te avel chisto ta te na aven ando bilachipe kana ka irilpe o Kristo; 11soke tumen ka cheren o lachipe kai del tumen o Jesukristo, te sai avel bariardo ta blagosime o Del. 12Phlalalen, mangav te llanen kai e ezgode kai me nakhlem pomozisarde te phendol e lachi viasta. 13Soke mo phandipe cherda te asundol e viasta e Kristoki maskar e sudura rromanura ta maskar sa e llene.#Ech 28.30. 14Ta kana e phlal dikhle kai sem phanglo, but lendar lie zor te inllaren e viasta bi darako ta si len mai but vera ando Gazda.
15Chachimaia nesave llene den orba e Kristoki jolinatar, soke mangen te aven mai but neko me, a aver llene cheren le lachimaia. 16Nesave den e orba e Kristoki soke si len volipe, soke llanen kai o Del thoda man te arakhav e lachi viasta. 17A aver llene dikhen samo von peke, ta inai chache, ta akana kai sem ande rubie mangen te cheren mange ios nuzde. 18A ¿so si? Sargo avela, chachimaia o kojaimaia, den e Kristoki orba, ta gua veselil man.
Ta ios mai but ka veseliu man, 19soke llanav kai golea ka braduiv man, soke tumen molisailen pala ma ta soke o Duo e Jesukristoko pomozil man. 20Uzdiu man ta pachau chachimaia kai o Del ni ka mukel man ando lallao, llanav kai akana, sargo suako drom, ka sikadol e suetoke o baripe e Kristoko pe mande, ziviva o merava. 21Soke o Kristo si mo zivoto, a te merav, mange si chari.#Gl 2.20; Kol 3.4. 22A te ziviva ande gaia esnaga ta te cherava but lachipe ni llanav so ka esviriu. 23Ni llanav savi katar e dui ezgode ka cherav: volisardema te merav ta te avav e Kristoia, ta gua avela mange drago mai but; 24a i mai preche si te ziviu cheres tumende. 25Ta sar me pachau goia ezgoda, llanav kai ka achav tumenchar te pomoziu tumen te llan angle ta te avel tumen mai but veselia ande tumaro pachape. 26Ta gia ka avav pale maskar tumende ta ka cherav te avel tumen mai but baripe ando Kristo Jesus.
O zivoto prema e lachi viasta
27Samo mangav tumendar te trudin tumen te zivin prema e lachi viasta e Kristoki. Llava o ni llava te dikhav tumen, mangav te asunav kai tumen llan orta ta ande iek mislo ta kai radin zanio pala o pachape ande lachi viasta, 28ta te na daran katar tumare dusmanura. Golea ka llangliolpe kai von ka zatrinpe ta i kai tumen ka braduin tumen. Ta gua avel e Devletar. 29Ta sen blagosime e Kristotar, soke sai pachan ande le ta sai nakhen patnia pala le. 30Tumen ta me isto goia nuzda si amen. Tumen dikhlen sar nakhlem e nuzde. Ta akana asunden sar nakhav len pale.#Ech 16.19-40.
Currently Selected:
Filipenses 1: BACHRO
Highlight
Share
Compare
Copy
Want to have your highlights saved across all your devices? Sign up or sign in
Biblia ande chib Romani © Sociedad Bíblica Chilena, 2018.
