Numeros 23
23
1Ondaka o Balaam phenda leke:
Cher kate efta altare ta lachar mange efta telchura ta efta busne.
2Ta o Balak cherda so phenda leke o Balaam ta maskar e dui mundarde iekhe telcho ta iekhe busne pe suako altar.
3Mapalal o Balak phenda e Balakeeke:
Tu thov tut pasa cho kurbano, so me llav te dikhav o o Del ka avel te maladol manchar. Mapalal me ka phenav chuke so vou ka sikavel mange.
O Balaam blagosil e israeleke
4Ta o Del avilo te maladol lea. A o Balaam phenda leke:
Lachardem efta altare ta pe suako iek diem iek telcho ta iek busno.
5Ondaka o Del thoda ando mui katar o Balaam so te phenel ta phenda leke:
Irisao kote kai si o Balak ta phen leke so me phendem chuke.
6Ta o Balaam irisailo kote kai sea e altare ta kote saia o Balak pasa o kurbano, sa e birovenchar katar e Moabite. 7Ondaka o Balaam phenda gaia profesia katar so si te avelpe:
Katar e burdura katar o oreinte, katar o Aram,
cherda man te avav o Balak, charo katar o Moab.
Aide phenda mange, de armaia e israele,
Kubisar o bilachipe e foroke katar o Jakob.
8A sar, ¿ka dav armaia gole kai o Del ni dia armaia?
¿Sar ka kubiu o bilachipe kana o Del ni cherel le?
9Katar gala bare barra sai dikav le,
katar gala burdura dikhav le:
a iek foro kai zivil pe iek rig,
kai inai sargo ogola forura.
10Von si sargo o prajo, ¿ko sai llinel len?
¿Ko sai llanel pegachin si von?
¡Daboida te merav me sargo gola llene chache,
ta mo son te avel sargo lengo!
11Ondaka o Balak phenda e Balameeke:
¿So chere me andem tut te de armaia me dusmanen, a tu blagosi len?.
12O Balaam phenda leke:#Nm 22.20.
Ni achilama kai me ka phenav samo so o Del thovela ande mo mui te phenav.
13A o Balak phenda:
Moliman chuke aide manchar pe aver rig, de sai dikhe samo truial katar lengo pero ana sa o pero. Ta kotar delen armaia.
14Ta o Balak inllarda e Balaamee ande umal katar o Sofin, chak upre katar o burdo kai ikhardol Pisga ta kote cherda efta altare ta pe suako altar dia kurbano iek telcho ta iek busno. 15Kote o Balaam phenda e Balakeeke:
Tu achi kate so me llav te maladivav e Devlea.
16Ta o Del maladilo e Balaameea ta thoda ande leko mui so saia te phenel ta i phenda leke:
Irisao kote kai si o Balak ta phen leke so me phendem chuke.
17O Balaam irisailo ta malada e balakee pe porrne, pasa o kurbano e birovenchar katar e moabite. Ta o Balak phenda leke: ¿So phenda chuke o Del:?
18Ondaka o Balaam phenda gaia profesia:
Balak, chaurro katar o Sipor,
thov sama ta asun.
19O Del i nai sargo e manusa:
Vou ni kojavel ta ni pharruvel po mislo.
Kana phenel iek ezgoda, cherel la.
Kana del po alav cherel le.
20O Del phenda mange te blagosiv,
o Del te blagosil me nasti phenav leke te na cherel le.
21O Del ni dikhla o bilachipe ando Jakob,
ta ni dikhla o kojaipe ando Israel.
O Del lengo Gazda si lenchar,
ta veselia charoki si ande lete.
22O Del ikanda len katar o Ejipto.
E zoriaia katar o bufalo.
23E chirimate ni resen po Jakob,
ta ni blazin e chirimate po Israel.
Akana morabi te phena e israeleke:
¡Pe gachin ezgode bare cherda o Del tuia!
24Gava foro vazdiniaol
sargo liono,
ta ni ka achel lligo ni ka zatril pe dusmano,
ta te jal lengo rat golengo kai mundarda.
25Ondaka o Balak phenda e Balaameeke:
¡Akana sar tu nasti de armaia gale foro na blagosile!
26A o Balaam phende leke: ¿Ni phendema me chuke kai samo sai cherav so o Del phenela mange te cherav?
27Ondaka o Balak phenda leke:
Aide ka inllarav tut pe aver rig. Sai avelpe kai o Del ni ka joliaol tu te de aramaia kotar.
28Gia o Balak inllarda e Balaamee llik upre po burdo kai ikhardol Peor, kotar katar dikhol sa o pusto. 29Kote o Balaam phenda e Balaameke:
Cher mange kate efta altare ta lachar mange efta telchura ta efta busne.
30Ondaka o Balak cherda gia sar o Balaam phendaia leke te cherel. Ta dia iek telcho ta iek busno pe suako altar.
Currently Selected:
Numeros 23: BACHRO
Highlight
Share
Compare
Copy
Want to have your highlights saved across all your devices? Sign up or sign in
Biblia ande chib Romani © Sociedad Bíblica Chilena, 2018.
