Nejemias 2
2
O Artajerjes mukel te llal o Nejemias ando Jerusalem
1Iek llive katar o chon Nisan, kana cherela bis burs kai charoila o Artajerjes, me thovava leke mol, ta sar nikada ni dikhlaia man tristome, 2puchla man:
Dikhav tut but tristome, ¿So si chuke? Ni dikho nasualo, chuke si varesavi nuzda. Ondaka darailem zurale.
3Ta phendem e charoke:
¡Te zivil ostade o charo! ¿A sar ni ka avav tristome, kana a o foro kai si e limoria katar mi familia si sa phago ta leke udara phabarde len? 4Ta o charo puchla man:
¿So mange te cherav pala tute?
Ondaka molisailem e Devleke kai si ando miloso, 5ta phendem e charoke:
Te mangea tu charo, ta te sem lacho chuke, mangav tutar te bichale man ando Juda, ando foro kai si e limoria katar mi familia, te sai vazdav pale o foro.
6O charo kai pasa lete saia leki lluvli e charoina, phenda mange:
¿Gachin vreme trubul tut? ¿Kana ka iri tut?
Me phendem leke kana, ta vou mukla man te llav. 7Ta i phendem leke, kai te mangela vou, te bichalel iek lil e llenenge kai gazdarina leke ande phuvia kai si pe ogoia rig katar e len Eufrates, te sai muken man te resav ando Juda, 8ta te del man aver lil te dav le kai o Asaf, kai arakhel o vos e charoko, te sai del man kasta te lacharav e udara katar e torre kai saiapasa o cher e Devleko, ta i e zidura katar o foro ta o cher kai saia te ziviu me. Ta o charo cherda so manglem letar, soke e Devleke avila zalba mandar ta pomozisarda man.
9Kana avilem kai e llene kai gazdarina pe ogoia rig katar o pai o Eufrates, diem lende o lil e charoko, ta o charo bichalda te llan manchar llene pe gra, ta avile lenchar e gazda katar e boñikura. 10A kana llangle gaia ezgoda o Sanbalat katar o Joron ta o Tobias, kai saia sluga amonita, jolaile but soke avilem te pomoziu e israelitonen.
O Nejemias avel ando Israel
11Avilem ando Jerusalem. Ta pala e trin llive, 12ustilem orachaia nesave llenenchar, ta ni phendem nikake so thoda o Del ande mo lio te cherav pala o Jerusalem. Samo iek magarcho inllarava, gua kai llava me pe lete. 13Isto goia riat likistem katar o udar kai del kai e bari umal, nakhlem katar o pai kai likel katar e phuv kai ikhardol Iagartano, ta avilem kai o udar katar o llubri, ta dikhlem o zido katar o Jerusalem, kai saia peradino ta leke udara phabarde. 14Mapalal llelem karing o udar e paieko kai likel katar e phuv, ta kote kai chidiniaol o pai e charoko, a nasti llelem soke o magarcho ni serela te nakhel kotar. 15Mapalal, isto orachaia, llelem upre e paiea, ta kana dikhlem o zido, irisailem ta diem katar o udar katar e bari umal.
16E gazda ni llangle kai llelem ni so cherava, a me ni phendem niso e judionenge. Maskar lende sea popura, ta i lache llene, gazda, ta llene kai avilea te pomozin. 17Ta phendem lenge gia:
Tumen llanen savi nuzda si amen, o Jerusalem si sa phago ta leke udara si phabarde. Aven manchar ta ka vazda pale e zidura katar o Jerusalem, te na maren amendar ios espurnia.
18Ta kana phendem e llenenge sar e Devleke avila zalba mandar ta pomozisarda man, ta so phenda mange o charo, von phende mange gia:
¡Aven te radi ta te vazda o foro!
Ta pherde vlaga, dena zor iek avere. 19A kana llangla gaia orba o Sanbalat katar o Joron, o Tobias amonita kai saia sluga, ta o Gesem o arabe, marde amendar espurnia, ta phende amenge jolinaia:
¿So mangen te cheren? ¿Ni kamen te kanden e charo?
20A me phendem lenge:
O Del e milosoko ka cherel te dobi. Amen kai sam leke sluge, ka radi ta ka vazda pale o Jerusalem, soke tumen inai tumen than, ni pe so te gazdarin kate, ta niko ni pinllarel tumen ando Jerusalem.
Currently Selected:
Nejemias 2: BACHRO
Highlight
Share
Compare
Copy
Want to have your highlights saved across all your devices? Sign up or sign in
Biblia ande chib Romani © Sociedad Bíblica Chilena, 2018.
