Lamentasiones 2
2
E zalba katar o Jerusalem avel katar o Del
1Gia bari saia e joli e Devleki
kai thoda o truniariko pe chei katar o Sion,
perada o sukaripe katar o Israel,
katar o miloso llik tele pe phuv
ta ande pi joli ni diape golli
katar o than kai thovela pe porrne.
2O Del ande pi joli ni prostisarda ta perada
sa e chare katar o Jakob,
ande pi joli perada
e zidura katar e chei katar o Juda,
mukla ando lallao
e foro ta golen kai gazdarina le.
3Ande pi joli lia
o gazdaripe katar o Israel.
Lia amendar po va o chacho
kai pomozila amen angla o dusmano,
¡phabarda ando Jakob iek iag
kai phabarel sogo si truial!
4Chapenisarda po arko sargo iek dusmano
ziriarda po va o chacho
sargo kana marelpe amenchar,
phagla so dikhola sukar.
Sargo iag chudia pi joli
pe chara katar o Sion.
5O Del cherda so cherel iek dusmano
zatrisarda e Israele,
phagla sa e bare chera,
phagla leke zidura,
ta cherda te pherdol zalba ta roipe
e chea katar o Sion.
6Ikanda pi chara sargo te ikanel e cherorra patrenge,
zatrisarda o than kai chidiniaona,
o Del cherda te bristarenpe ando Sion
katar e slave ta katar e sabadura.
Ta ando phabardipe katar leki joli,
chudia e charo ta e popo.
7O Del chudia po altar,
ta mukla pe iek rig pi chara,
mukla te gazdaril o dusmano
pe zidura kai arakhen o foro.
¡Baro urkipe si ando cher e Devleko!
sargo kana si iek llive slavako.#Ez 24.21.
8O Del mangla te phagel
e zidura e cheake katar o Sion.
Phenda sar ka avel zatrime,
ni achada po va pe zatrania,
achile zalosne e dui zidura
ta peletar ande iek than.
9Leke udara chudie len pe phuv,
leke alkave achile zatrime.
Leko charo ta leke gazda si ande phuvia kai ni pachan,
akana inai len o zakono e Devleko,
ni lenge poraukura inai len
poroka katar o Del.#Sal 74.3-9; Ez 7.26.
10E phure e cheake katar o Sion
besen pe phuv ta ni den orba,
chudie o prajo pe po soro
ta thode pe pete patave zalosne,
e chea katar o Jerusalem
thode po soro pe phuv.
11Me akha phanglion katar e ausa,
ta lel te pharrol mo lio,
inai man vlaga
pala e zalba kai nakhen mo foro
soke dikhav kai e minone kai pien kolin
meren bokhatar ando foro ta pe droma.
12E minone phenena pe dake:
¿Kaitalo o lliu ta e mol?
perena sargo kana ranisarde len
pe droma katar o foro,
ta chirdena o lli ta merena
ande angali pe daki.
13¿Sar sai phenav kai san
chei katar o Jerusalem?
¿Pe ka sai phenav kai san chuti te dav tut zor
chei katar o Sion?
Soke bari sargo e mora si chi zatrania,
¿ko ka sastarel tut?
14So phende kai dikhle che poraukura
saia kojaipe ta so ni mol le niso,
ta ni sikade cho bilachipe
te achaven cho phanglipe,
von phende chuke poroke kojamne,
te cheren te kojado.#Jer 5.31; 23.25-27; Ez 13.10.
15Sa e llene kai nakhena po drom
marena espurnia ta marena ande palme,
dena sol ta miskona po soro espurniaia,
ta phenena katar e chei katar o Jerusalem:
¿Gava si o foro kai phenen letar
kai si o mai sukar katar e phuv?
16Sa che dusmanura
den bilache orbe tutar.
Marde espurnia basalde pe danda ta phende:
Sa zatrisardam la.
Gava si o llive kai aduricharaia
akana reslam le, akana diklham le.
17O Del cherda so mangela te cherel,
cherda e sovel kai jala.
So phendaia kai ka zatril omanglal
zatrisarda ta ni prostisarda,
cherda te veselilpe o dusmano pe tute,
ta bariarda e zor katar che dusmanura.#1 R 9.6-9.
18¡Mang te pomozil tut o Del,
chei katar o Jerusalem!
¡Orachaia ta ollivesea
muk te llan che ausa sargo iek len!
¡Te na achel cho roipe,
na achav o roipe katar che akha!
19Uste, urkisar orachaia
urkisar suako saiato,
chuchar sa so si ande cho lio angla o Del,
muk te llal sargo o pai
vazde che va karing lete
ta molisao leke pala zivoto che minonengo
kai pe droma katar o foro
meren soke inai len so te jan.
20Dik Devla, ta mislisao#Dt 28.53; 2 R 6.28-29; Jer 19.9.
kake cherdan gaia ezgoda.
¿Trubul e diskinie
te jan pe minonen kai den len kolin?
¿Trubul ande Devleki chara
te mundaren e poponen ta e porauken?
21chudine pe droma
dikhon e terne ta e phure,
me terne ta me chea
mundarde len e jarnienchar
ando llive katar chi joli mundardan.
¡Mundardan ta ni prostisardan!
22Cherdan te avel mi dar katar suako rig,
sargo te aven pe iek slava.
Devla, ando llive katar chi joli
niko nasti naslo, sa mule.
Golen kai bariardem ta pravardem
mundarda len o dusmano.#Sal 31.13; Jer 20.3,10; 46.5; 49.29.
Currently Selected:
Lamentasiones 2: BACHRO
Highlight
Copy
Compare
Share
Want to have your highlights saved across all your devices? Sign up or sign in
Biblia ande chib Romani © Sociedad Bíblica Chilena, 2018.
