Job 38
38
O Del mangel katar o Job
1Ondaka katar iek bari balav o Del dia orba kai o Job:
O Del
2¿Ko si gua kai ucharel ando truniariko
e alava bizai pe dile orbenchar?
3Akana ka dikha dal san gia tromano,
me ka puchav tut ta tu ka de anglal.#Job 40.7; 42.4.
4¿Kai sana tu kana me cherava e phuv?
te llanea o chachipe phenle te san bizai.
5¿Ko phenda sar ka avel e phuv, tu llane?
¿O ko thoda iek solo te llinel lake pole?
6¿Pe so si istardi e phuv?
¿O ko thoda o lako mai angluno barr,
7kana blagosin sa e cheraia e thiarinake,
ta veselinpe sa e chave e Devleke?
8¿Ko phangla ande udara e mora,
kana likela katar po than,
9kana me furiadem la ande oblakura
ta kana ulisardem la ando truniariko,
10ta thodem lake mo zakono,
ta thodem lake udara ta alkave,
11ta phendem:
Llik kate ka a ave ta ni ka lla angle,
ta kote ka achel o baripe katar che valura?#Sal 104.6-9; Pr 8.29; Jer 5.22.
12¿Phendan tu varekana te likel o kham?
¿Phendan kai si o than e thiarinako,
13te istarel sa phuvia
ta te chinol sa e bilache llenen?
14Ondaka poloke e phuv
ta mapalal klichil sargo furiado,
15A o villelo e bilachengo si ikando lendar,
ta o va katar e barikane si phago.
16¿Dian tu chak andre mora
te dikhe katar likel o pai,
ta llelan te dikhe so si ande bari jar?
17¿Putardile chuke e udara katar o meripe
ta dikhlan tu e udara katar senka e merimaki?
18¿Llane tu gia bari si e phuv?
te llanea sa gala ezgode phenle mange.
19¿Llane kai zivil o villelo
ta kai si o cher katar o truniariko?
20¡Te si gia sai inllare len llik kai lengo son
ta te inllare len po drom karing lengo cher!
21¡Tu llanele, soke sana biando ondaka,
ta zivisardan but burs!
22¿Sana tu kote kai si chidino sa o iv,
o dikhlan kai si chidine e krupe,
23kai me gurudem
pala e llivesa kana ka avel e nuzda,
kana ka marenpe e phuvia ta ka avel o maripe?#Ek 9.13-35; Jos 10.11; Is 30.30.
24¿Pe savo drom llal o villelo kana rispilpe,
ta kai llal e balav
kai avel katar e rig kai likel o kham?
25¿Ko dia droma e bursinde,
ta drom e esterlichen ta te girmil o miloso,
26te cherel te delpeke pe phuv e pusti,
po pusto, kote kai inai manusa,
27te chaliarel e phuvia kai si pusti
ta cherel te barion e patra zelene?
28¿Si le dad o bursin?
¿O ko cherda e kuchorra kai pechanpeke?
29¿Katar savo lli likisto o ledo?
¿Ta ko cherda o mrazo e milosoko?
30E paia zuriaon sargo barr ta
ledolpe sa e phuv.
31¿Sai phandel sa e cheraia pe iek than
ta te putarel e cheraia kai ikhardon Orion?#Job 9.9; Am 5.8.
32¿Ka chere tu te liken pe po vreme
e cheraia e milosoke,
o ka sikave o drom e cheraiake kai ikhardo Osa
ta lake minonenge?
33¿Llane tu o zakono katar o miloso?
¿Sai gazdari pe zor kai si len pe phuv?
34¿Sai urki tu pe oblakura,
ta te chere te perel pe tute o bursin?
35¿Ka bichale tu e esterliche, ta von te llan?
¿Ta ka phenen chuke von:
kate sam?
36¿Ko thoda o bizaipe ando lio?
¿O ko dia o duo bizaimako?
37¿Ko llinda bizaimaia e oblakura?
¿Ko mukliarel o pai katar o miloso
38te kovliarel e chik e zurali
ta e barra chikake kai lipinpe iek pe aver
soke inai la pai?
39¿Ka istare tu iek zivirinia e lionoke te jal?
¿Ka chaliare tu e minone liononen,
40kana inzon kote kai gurudon,
o kana aduricharen te juten pe iek zivirinia?
41¿Ko lacharel o jape te jal e chirikli kali
kana lake minone mangen e Devletar
ta llan phirindo soke roden so te jan?
Currently Selected:
Job 38: BACHRO
Highlight
Share
Compare
Copy
Want to have your highlights saved across all your devices? Sign up or sign in
Biblia ande chib Romani © Sociedad Bíblica Chilena, 2018.
