Jeremias 48
48
E poroka katar o Moab#Is 15.1—16.14; 25.10-12; Ez 25.8-11; Am 2.1-3; Sof 2.8-11.
1O Del kai si le sa e zor, o Del katar o Israel phenda gia katar o Moab:
¡Tesko e Neboeke! Soke avilo zatrime
ta achilo ando lallao:
O Kiriataim achilo ande averenge va,
o Misagab ni llanela so ka cherel
ta nasti achilo pe porrne.
2Ni ka avel ios blagosime o Moab,
soke ando Jesbon diepe orba sar te zatrin le,
ta phende:
Aven te ikana la katar e phuvia.
Ta i tu, Madmena ka ave chindi,
o jarni ka llal pala tute.
3¡Rovel o Joronaim,
Soke bari si e zatrania ta o phagipe!
4O Moab si sa phago.
Cherde te roven lenge minone daratar.
5Soke po drom kai llal upre karing o Luit
e llene roven ta kukin,
ta po drom kai llal tele karing o Joronaim
e llene nasti achaven po roipe.
6Nasen, nasalen tumaro zivoto
ta cherdon sargo e char suki po pusto.
7Soke uzdisailen mai but ande
tumare ezgode ta ande tumaro barvalipe,
i tu ka che ande avereke va
ta e llene katar o Kemos ka llan phangle,
ta i lenge popura ta lenge sudura.
8Ta ka avel e zatrania ande suako foro,
ta ni iek foro ni ka kurtulilpe.
Ka murin e bari umal ta ka zatrinla
gia sar phenda le o Del.
9Den le pakha e Moabe,
te furial ta te llaltar,
soke ka aven zatrime lake forura
ta ni ka achel ko te zivil ende lende.
10Proketo te avel o lleno kai cherel lenomaia o rado kai o Del phenda te cherel ta proketo te avel gua kai ni ka mundarel pe jarniea.
11Sar kana saia terno o Moab saia esmiro ta inzilo pe pi phuv, nikada ni chucharde le katar iek piri ande aver, ta nikada ni saia phanglo, goleke achilo leko guglipe ande lete ta leki khand ni pharrudili.
12Goleke o Del phenel kai ka aven llivesa kai vou ka anel llenen te chucharen lenge piria ta ka pharraven lenge morcha. 13O Moab ka avel leke lallao katar o Kemos, gia sar lallailo o Israel katar o Betel kai uzdilape ande lete.
14¿Sar ka phenen tumen
kai sen tromane ta surale te marentumen?
15A o Moab si sa phago
ta leke forura zatrime
ta leke llene terne kai si esvirime
llele kai o than kai chinen e korra,
gia phenda le o Charo,
kai leko anav si o Del kai si le sa e zor.
16Cherricha vreme achel
te avel zatrime o Moab,
ta sigarel te avel leki belava.
17Zaontumen letar sa e phuvia kai si truial
ta sa gola kai llanen leko anav ta phenen:
¡Sar phagilo o zuralo kas, e sukar rovli!
18Fulie katar o blagosipe
te bes pe chik e suki, chei katar o Dibon,
soke gua kai zatrisarda e Moabe
avilo pala tute te phagel che zidura.
19Achi pe porrne po drom ta dik
tu kai zivi ando Aroer.
Puch gola kai pomozil ta gole kai naslo,
ta phen leke:
¿So avilape?
20Lallailo o Moab, soke avilo zatrime.
Roven ta kukin, phenen ando Arnon
kai o Moab si zatrime.
21Avilo o llive katar e kris pe umalia, po Olon, po Iaas ta po Mefagat, 22po Dibon, po Nebo ta po Bet Diblataim, 23po Kiriataim, po Bet Megon, 24po Keriot, po Bosra ta pe sa e forura e katar o Moab, kai si pase ta kai si dur.
25E zor katar Moab si jasardi
ta leko va phagilo,
gia phenel le o Del.
26Mataren le soke vazdinailo po Del,
te taulilpe o Moab pe po chadipe
ta te achel ando lallao.
27A tu Moab, mardan espurnia katar Israel
sargo kana ikande le katar e chorane
ta kana dea leki orba miskoa cho soro.
28Like katar e forura
ta zivisar maskar e pechine,
tumen kai zivin ando Moab
ta cherdon sargo o gulubo
kai cheren pe kuibura
po putardipe kai delpe maskar e barra.
29Asundam sar cherel baripe o Moab,
kai istardol ta si barikano lako lio.
30Ta o Del phenel kai pinllarel leki joli,
a o baripe kai cherel, ni ka blazil leke niso.
31Goleke ka auchiu man po Moab,
upral pe sa o Moab ka kukiu,
ta pe llene katar o Kir Jeres ka rovav.
32Ka rovav i pala tumende
kai zivin ando Sibema
gia sar rovdem pala o Jaser.
Che drakha nakhle e mora,
resle llik kai e mora katar o Jazer.
Pe che septelie ta pe che drakha
avilo gua kai zatril.
33Ta ka avel chindi e veselia
ta e dragostia katar e umal
kai si pherdo zivoto laki phuv katar o Moab,
ta ka cherav ta na avel len ios e mol,
ni ka llilaben ios gola kai cheren mol
goia llili ni ka asundol ios.
34O roipe katar o Jesbon
resel llik kai o Eleale ta kai o Iaas,
ando Joronallin, ando Eglat,
ando Selesilla asundol leko avazi.
Ta i e len katar o Nimrim sukili.
35Ta ka zatriv e foro katar o Moab,
gia phenel le o Del, sa golen kai cheren
curbano pe thana vazdine
ta golen kai phabaren o taimano
avere delenge.
36Goleke, mo lio ka basel sargo firura
pala o Moab ta pala e llene katar o Kir Jeres,
soke zatrisailo sa o barvalipe kai cherde.
37Soke sa e sore ka aven jaliarde
ta sa e chor ka aven ikande.
Sa e va ka aven rangle
ta o prajo ka avel pe sa e zea.
38Pe sa e chera katar o Moab
ta pe leke droma, samo roipe ka avel.
Soke me ka phagav e Moabe
sargo iek piri kai ni trubul,
gia phenel le o Del.
39¡Roven soke o Moab si phago!
¡O Moab dia e zea ta achilo ando lallao!
Marde espurnia katar o Moab
ta chudisaile letar kogo saia truial.
40Soke o Del phenda gia:
Ka irilpe sargo agila
ta ka buliarel pe pakha po Moab.
41Ka len peke e forura ta e zidura.
Ta gua llive ka izdral o lio katar e tromane,
sargo e diskinie kana si te maladol lake.
42Ta o Moab ka avel zatrime
ta ni ka avel ios iek foro,
soke cherda baripe angla o Del.
43Ka nakhen pe dar,
ka peren ando anadipe kai si po drom
ka achadon tumare porrne pe sole,
tumen kai zivin ando Moab,
gia phenel le o Del.
44Ko ka nasel daratar,
ka perel ando anadipe
ta ko ka likel katar o anadipe,
ka achadol leko porrno ando solo.
Soke me ka anav po Moab,
u burs katar leki duk.#Is 24.17-18.
45Tala e senka katar o Esbon
thodepe bi zoriaia gola kai nasena.
A katar o Esbon likisti e iag
ta plameko katar o Sijon,
ta phabarda o than katar o Moab
ta o soro katar leke chaurre kai urlina.
46¡Tesko chuke Moab! Zatrime si o Kemos,
soke phangle che chaurren ta che chorren.
47A ka cherav te irinpe katar o phandipe
ando vreme kai avel mai angle,
gia phenel le o Del.
Gia chinda o Del e Moabeke.
Currently Selected:
Jeremias 48: BACHRO
Highlight
Copy
Compare
Share
Want to have your highlights saved across all your devices? Sign up or sign in
Biblia ande chib Romani © Sociedad Bíblica Chilena, 2018.
