Jeremias 49
49
Poroka katar e amonitura
1Katar e amonitura, o Del phenda gia:
¿A so, o Israel inai le chaurre?
¿Inai le ko te achel leke ezgodenchar?
¿Soke o Milkon lia sa katar o Gad
ta thoda pire llenen ande leke forura?
2Goleke o Del phenel kai aven llivesa,
kai ka asundol o urkipe
katar e llenen kai marenpe ando Raba,
o foro katar e amonitura
ta ka cherdol iek umpa phagipe
ta ka phabaren lenge forura
ta o Israel ka lel pale e phuvia kai lie lendar,
gia phenda le o Del.
3¡Rov Jesbon, soke o Ai si zatrime!
¡Kukin diskinie katar o Raba!
¡Thoven pe tumende patave zalosne!
¡Roven ta llan truial katar e bar!
Soke phangle e llenen katar o Milkon,
lenge poponen ta lenge sudonen.
4¿Soke fali tut katar che umalia?
Tu kai san iek foro besno,
kai uzdi tut ande cho barvalipe ta phene:
¿Ko ka avel te marelpe manchar?
5A me ka anav pe tute iek bari dar
katar sa e forura kai si truial tutar,
gia phenel le o Del kai si le sa e zor,
ta ka chuden traden tumen mai angle
ta ni ka avel ko te lel e llenen kai ka nasen.
6Ta mapalal katar sa gala ezgode,
ka cherav te irinpe e amonitura
katar e phuvia kai sea phangle.#Ez 21.28-32; 25.1-7; Am 1.13-15; Sof 2.8-11.
E poroka katar o Edom
7Katar o Edom. O Del kai si le sa e zor phanda gia:
¿Inai bizaipe ando Teman?
¿Getosaile e alava katar e llene bizai?
¿Murisailo lengo bizaipe?
8¡Nasen, irin tumen palpale!
Llan ande thana kai si chak tele,
tumen kai zivin ando Dedan,
soke e zatrania katar o Esav ka anav pe lete
kana ka dukhavav le.
9Te avilea llene kai chiden e drak,
¿ni muklea varesave kuchurra?
¿A te avilea e chorane
inllardea so trubul len?
10A me ka cherav te dikhol o Esav,
ka sikavav sa e thana kai sai gurudol,
ta nasti ka gurudol.
Leko porodo ka avel zatrime, leke phlal
ta e llene kai zivin pasa le, ta ni ka avel ios.
11Muk che minonen kai me ka bariarav len,
ta che phivlia ka uzdinpe ande mande.
12Soke gia phenda o Del:
Gola kai ni sea chinade te pien e mol katar e duk, akana ka pien. ¿A tu ni ka le ni iek duk? Tu chachimaia ka pie e mol katar e duk. 13Soke jalem sovel pe mo anav, gia phenel o Del, kai ka anav zatrania, lallao, pusto ta proketo ka avel o Bosra ta sa leke forura ka aven puste ostade.
14Asundem e viasta, kai o Del bichalda
iekhe llene te inllarel e poroka kai e phuvia,
ta phenel:
Chidiniaon ta aven po Edom
te mara amen lea.
15Ka cherav te ache minono maskar e phuvia,
e manusa ka maren tutar espuria.
16Cho istardipe kojada tut,
ta o baripe katar cho lio.
Tu kai zivi ando putardipe katar e pechine,
tu kai san upre pe bare burdura,
i te avel cho kuibo chak upre sargo e agila,
me ka cherav te fulie, gia phenel le o Del.
17Ta o Edom ka achel pusto, ta kogo ka nakhel kotar ka chudilpe ta ka maren espurnia katar sa leke zatranie. 18Gia sar saia e zatrania katar e Sodoma ta e Gomorra ta katar e forura kai sea pase, o Del phenel kai isto gia ka achel pusto o Edom ta ni ka zivil niko kote.#Jen 19.24-25. 19Sargo iek liono ka likav katar e patra e Jordaneke ta ka jutav pe lete sargo kana si iek zivirinia ta but oma ka cherav te nasel letar ta ka esviriu ko te gazdaril le. Soke ¿Ko si sargo me ta ko ka lel mo than? ¿Ko ka avel gua chobano kai ka terpil man? 20Goleke, asunen so phenel o Del cheres o Edom ta so mislil te cherel e llenenchar kai zivin ando Teman. E mai minonen katar lengi stoka ka terrin len ta ka zatrin lenge chera ta i len. 21Gia zurale ka basel kana ka zatrinpe kai e phuv ka dermolpe ta o urkipe katar leko avazi ka asundol llik kai e Mora e Loli.#Jer 50.40,44-45. 22Sargo iek agila ka furial ta ka buliarel pe pakha po Bosra. Ta o lio katar e tromane katar o Edom ka cherdol sargo o lio katar iek diskinia kai si te maladol leke.#Is 34.5-17; 63.1-6; Ez 25.12-14; 35; Am 1.11-12; Abd 1.1-15; Mal 1.2-5.
E poroka katar o Damasko
23Katar o Damasko, o Del phenda:
e forura katar o Jamat ta o Arfad
achile ando lallao,
soke avila lenge iek bilachi viasta
bilaon daratar, nasti achen po than
sargo e valura e morake.
24O Damasko baldisailo,
boldinailo te nasel, ta lia le o izdrape
ta e briga, dukhaia le sargo iekhe diskinia
kai si te maladol lake.
25¡Sar mukle e foro kai saia gia blagosime,
e foro katar mi dragostia!
26Goleke, pe plase ka peren leke terne,
ta sa e murusa kai llan te marenpe
ka meren ande gua llive,
gia phenda le o Del kai si le sa e zor.
27Ta ka cherav te phabol e iag
po zido katar o Damasko
ta ka phabarel e chera katar o Ben Adad.#Is 17.1-3; Am 1.3-5; Zak 9.1.
Poroka katar o Sedar ta o Jasor
28E viasta kai o Del anda cheres o Sedar ta katar e charoine katar o Jasor kai o Nabukodonosor charo katar e Babilonia zatrisarda. Gia phenda o Del:
Usten ta llan po Sedar ta zatrin e llenen
kai zivin pe rig katar likel o kham.
29Len lenge chare ta lenge bakre,
lenge chitura ta sa lenge ezgode
ta len tumenge lenge deve,
ta urkin pe lende gia te daran:
¡E dar si pe suako rig!#Sal 31.13; Jer 6.25; 20.3,10; Lm 2.22.
30Nasen, llantar dur,
zivisaren pe thana kai si chak tele,
tumen kai zivin ando Jasor, o Del phenel le,
soke Nabukodonosor charo katar e Babilonia
thoda sama e llenenge
kai dena bilache orbe tumendar
ta thoda ande po lio te marelpe tumenchar.
31Usten ta llan te maren tumen
iekhe phuviaia kai ni marelpe ta ni daral,
o Del phenel, kai inai la ni udara ni alkave,
ta kai zivin korkorre.
32Lenge deve ta lenge sivirinie
ka aven o chari ta ka rispiu len pe sa e baliava,
pe suako rig e phuviaki
ta katar suako rigf ka anav lenge e zatrania,
gia phenel le o Del.
33Ando Jasor ka zivin e llukela dive
ka achel pusti, niko ni ka zivil kote,
nisavo chavo manuseko ni ka besel kote.
E poroka katar o Elam
34O Del dia orba e Jeremiasea o profeta cheres o Elam, kana iakom charoila o Sedekias charo katar o Juda, ta phenda leke:
35Gia phenda o Del kai si le sa e zor:
Me mangav o arko katar o Elam,
soke goia si e ezgoda mai angluni
katar leki zor.
36Ka anav po Elam e star baliava
katar e star riga e milosoke,
ta ka chudav len pe sa e baliava,
ta ni ka avel phuv kai ni ka aven
llene katar o katar o Elam te gurudon.
37Ta ka cherav te daral o Elam
katar pe dusmanura ta katar gola
kai roden te mundaren le.
Ta ka anav pe lende o bilachipe
ta mi joli ka phabol pe lende,
gia phenel le o Del,
ta ka anav pe lende o jarni
lligo ni ka zatril len.
38Ta ka thovav mo trono ando Elam
ta ka zatriv leke charo ta leke sudonen,
gia phenel le o Del.
39A ka avelpe iek ezgoda
ande llivesa katar o son,
ka cherav te irinpe e phangle katar o Elam,
gia phenel le o Del.
Currently Selected:
Jeremias 49: BACHRO
Highlight
Copy
Compare
Share
Want to have your highlights saved across all your devices? Sign up or sign in
Biblia ande chib Romani © Sociedad Bíblica Chilena, 2018.
