Jeremias 29
29
Lil katar o Jeremias e llenenge kai inllarde len phangle
1Gala si e alava katar o lil kai bichalda o profeta o Jeremias ando Jerusalem kai e phure kai achile katar gola kai inllarde len phangle, ta e poponenge ta e profetonenge ta sa e foroke kai o Nabukodonosor inllarda phangle katar o Jerusalem ande Babilonia 2mapalal kana likisto o charo o Jekonias, e charoina, e llene katar o cher e charoko, e sudura katar o Juda ta katar o Jerusalem, gola kai cheren ezgode sukar ta e llene bizai kai cherde o Jerusalem,#2 R 24.12-16; 2 Kr 36.10. 3o lil inllarda le o Elasa, chavo katar o Safin ta o Gemarias chavo katar o Ilsias, o Sedekias charo katar o Juda bichalda len te llan ande Babilonia, kai o Nabukodonosor charo katar e Babilonia, o lil phenela gia:
4Gia phenda o Del kai si le sa e zor, o Del katar o Israel, sa e llenenge kai si phangle kai cherdem te inllaren len katar o Jerusalem ande Babilonia: 5Cheren chera, ta zivin andre, cheren tumenge vostanura ta jan katar so ka del tumen e phuv. 6Zinin tumen, ta te aven tumen chaurre ta chorra, zinin tumare chorren ta tumare chaurren, te aven len chaurre ta chorra, cherdon mai but kote, ta na chiknion. 7Cheren te avel pas ando foro kai cherdem te anen tumen, ta molin tumen e Devleke pala late, soke ande laki pas ka avel tumen pas. 8Soke gia phenda o Del kai si le sa e zor, o Del katar o Israel:
Te na kojaven tumen tumare poraukura kai si maskar tumende, ni tumare llene kai apogodin, ta na thoven sama pe sune kai dikhen. 9Soke porokin kojaimaia ande mo anav, me ni bichaldem len phenel o Del.
10Soke gia phenda o Del:
Kana ande Babilonia ka nakhen e eftavardes burs, me ka avav tumende, ta ka cherdon tumenge me lache alava, te cherav tumen te irintumen pe gava than.#2 Kr 36.21; Jer 25.11; Dn 9.2; Zak 1.12. 11Soke me llanav so misliu man tumendar, phenel o Del, mislura katar e pas, kai inai bilache, te dav tumen so tumen aduricharen. 12Ondaka ka ikharen man, ta ka aven ta ka molin tumen mange, ta me ka asunav tumen, 13ka roden man ta ka malaven man, soke ka roden man sa tumare liea.#Dt 4.29. 14Ta tumen ka malaven man, phenel o Del, ta ka cherav te irinpe tumare phangle, ta ka chidav tumen katar sa e phuvia ta katar suako than kai chudiem tumen, phenel o Del, ka anav tumen kai o than kai cherdem te ikanen tumen.
15A tumen phenden gia:
O Del thoda amenge poraukura ande Babilonia. 16A o Del phenda gia katar o charo kai besel po trono katar o David, ta katar sa e llene kai zivil ande gava foro, katar tumare phlal kai ni likiste tumenchar kana phangle tumen, 17gia phenda o Del kai si le sa e zor:
Me bichalav pe lende o jarni, e bok ta o nasualipe, ta ka cherav len sargo e simochine bilache, kai si gia bilache kai nasti janpe. 18Ka llav pala lende e jarniea, bokhaia ta nasualimaia, ta sa e phuvia ka maren tumendar espurnia, ka proketin tumen, ka daran kana ka dikhen tumen ka asan tumendar ta ka maren espurnia maskar e phuvia kai chudiem tumen, 19soke ni asunden me alava, phenel o Del, kai bichaldem te phenen tumenge me slugen e poraukura, cherel but vreme bi te achav, ta ni asunden, gia phenel le o Del. 20Goleke asunen o alav e Devleko, sa tumen kai avilen inllarde, kai me bichaldem tumen katar o Jerusalem ande Babilonia.
21O Del kai si le sa e zor, Del katar o Israel, phenda gia katar o Akab chavo katar o Kolaias, ta katar o Sedekias chavo katar o Maasias, kai phenen tumenge e poroke kojamne ande mo anav ta phenen gia:
Me ka thovav len ande va katar o Nabukodonosor charo katar e Babilonia, ta vou ka mundarel len angla tumare akha, 22ta sa e llene kai inllarde len katar o Juda kai si ande Babilonia ka cheren len te achen proketime, ta ka phenen:
Daboida te mukel tut o Del sargo o Sedekias ta sargo o Akab, kai pekla len pe iag charo katar e Babilonia. 23Soke cherde o bilachipe ando Israel, ta cherde o kurvaluko e rromienchar katar e llene kai zivina pasa lende, ta kojaimaia phende alava ande mo anav kai me ni phendem lenge, ta goia ezgoda me llanav la ta phenavla tumenge, gia phenel le o Del.
E orba e Semaiaseke
24A e Semaiaseke katar o Nejelam ka phe leke gia: 25Gia dia orba o Del kai si le sa e zor, o Del katar o Israel ta phenda:
Tu bichaldan lila ande cho anav kai sa e foroke kai si ando Jerusalem, ta kai o popo o Sofonias chavo katar o Maaseias, ta sa e poponenge prema so tu phene: 26O Del thoda tut popo po than katar o popo o Joiada, te dikhe o cher e Devleko pe suako lleno dilo kai porokil ta te phande le ande rubie. 27¿A soke akana ni dian po Jeremias katar o Anatot, kai phenel e poroka? 28Soke vou bichalda amen te phena gia ande Babilonia:
But vreme ka achen phangle, cheren chera, ta zivin kote, thoven te barion septelia ta jan so ka del e phuv.
29Ta o profeta o Sofonias chitisardaia gava lil e profetake e Jeremiaseke. 30Ta avilo o alav e Devleko kai o Jeremias ta phenda: 31Bichal te phenen sa e llenenge kai si phangle:
Gia phenda o Del cheren o Semaias katar o Nejelam:
Soke porokisarda tumenge o Semaias, ta me ni bichaldem le, ta soke cherda te uzdintumen ando kojaipe, 32goleke o Del phenda gia:
Me ka dukhavav e Semaiase katar o Nejelam ta leke porodo, ni ka avel le murus te zivil maskar gava foro ta ni ka dikhel o lachipe kai ka me cherav me foroke, phenel o Del, soke dia orba kojamni po Del.
Currently Selected:
Jeremias 29: BACHRO
Highlight
Share
Compare
Copy
Want to have your highlights saved across all your devices? Sign up or sign in
Biblia ande chib Romani © Sociedad Bíblica Chilena, 2018.
