Jeremias 27
27
O gazdaripe sargo iek kas phanglo pe korr
1Kana iakom charoila o Joasim chavo katar o Josias charo katar o Juda, avilo gava alav e Devleko kai o Jeremias, ta phenda: 2O Del phenda mange gia:
Cher chuke iek kavisa ta iek kasta ta thov len pe chi korr. 3Ta ka bichale len kai o charo katar o Edom, ta kai o charo katar o Moab, ta kai o charo katar e chave katar o Amon, ta kai o charo katar o Tiro, ta kai o charo katar o Sidon, te inllaren len e bichalde kai aven ando Jerusalem kai o Sedekias o charo katar o Juda. 4Ta ka phene te phenen pe gazdenge:
Gia phenda o Del kai si le sa e zor, o Del katar o Israel:
Gia ka phenen tumare gazdenge: 5Me cherdem e phuv, e manuse ta e zivirinie kai si pe sa e phuv, inzardem mo va ta cherdem len me bare zoriaia, ta diem la kake me manglem. 6Ta akana me thodem sa gala phuvia ande va katar o Nabukodonosor charo katar e Babilonia, ta i e zivirinie dive diem le te radin leke. 7Ta sa e phuvia ka radin leke, leke chaurreke ta leke unukoneke, lligo ni ka avel o vreme katar leki phuv, ta ka cheren la sluga but phuvia ta bare charura. 8Ta e phuv ta e charoina kai ni ka aven sluge katar o Nabukodonosor charo katar e Babilonia, ta te na mukle te thoven pe pi korr o kas gazdarimako katar o charo e Babiloniako, ka dukhavav gole phuvia e jarniea e bokhaia ta e bare mukaia, gia phenel le o Del, lligo ni ka zatriv len sa leke vastea.
9A tumen na asunen tumare profetanen, ni tumare llenen kai apogodin, ni golen kai dikhen sune, ni golen kai cheren te zalintumen pe orbenchar ta phenen:
Ni ka radin e charoke katar e Babilonia. 10Soke von phenen iek poroka kojamni, te cheren tumen te durion katar tumari phuv, ta me te chudav tumen ta te meren. 11A e phuv kai ka mukel te thoven pe laki korr o pharipe katar charo katar e Babilonia ta te radisarda leke, ka mukav la ande pi phuv ta kote ka merel, gia phenel le o Del.
12Ta i diem orba e Sedekiasea charo katar o Juda prema sa gala alava ta phendem leke:
Muken te thoven tumari korr telal katar e zor e charoki katar e Babilonia, ta radin leke ta leke foroke ta ka zivin. 13¿Soke ka mere tu ta cho foro po jarni, bokhatar ta katar e muke, prema so phenda o Del katar e phuv kai ni ka radil e charoke katar e Babilonia? 14Na asunen so phenen e alava katar e poraukura kana phenen tumenge:
Ta na radin e charoke katar e Babilonia, soke von kojaven tumen. 15Soke me ni bichaldem len, phenel o Del, ta von porokin kojaimaia ande mo anav, te sai chudav tumen ta te meren tumen ta e poraukura kai porokin tumenge.
16Ta i diem orba i e poponenge ta sa gale foroke ta phendem lenge:
Gia phenda o Del:
Na asunen e alava katar tumare poraukura kai porokin tumenge ta phenen:
Akana e ezgode kai si ando cher e Devleko ka irinpe katar e Babilonia isto akana, soke porokin tumenge kojaimaia. 17Te na asunen len, radin e charoke katar e Babilonia te zivin, ¿Soke te avel zatrime gava foro? 18A von te si poraukura, ta te si lenchar o alav e Devleko, molin tumen akana e Devleke kai si le sa e zor ta gia pala e ezgode kai achile ando cher e Devleko ta ando cher katar o charo katar o Juda ta ando Jerusalem, te na llan ande Babilonia.
19Soke gia phenda o Del kai si le sa e zor kana dia orba katar e direkura, katar e bari tepsia kai chidiniaol o pai, katar lake porrne, ta katar ogola ezgode kai achen ande gava foro, 20kai ni ikanda o Nabukodonosor charo katar e Babilonia kana inllarda katar o Jerusalem ande Babilonia e Jekoniase chavo katar o Joasim charo katar o Juda ta katar o Jerusalem. 21Gia phenda o Del kai si le sa e zor, o Del katar o Israel, katar e ezgode kai achile ando cher e Devleko, ta ando cher katar o charo katar o Juda ta ando Jerusalem kana phenda:#2 R 24.8-17; 2 Kr 36.9-10. 22Ande Babilonia ka aven inllarde, ta kote ka achen lligo ni ka avav tumende, ta mapalal ka anav len ta ka thovav len pe to than, gia phenel le o Del.
Currently Selected:
Jeremias 27: BACHRO
Highlight
Share
Compare
Copy
Want to have your highlights saved across all your devices? Sign up or sign in
Biblia ande chib Romani © Sociedad Bíblica Chilena, 2018.
