Jeremias 14
14
O Baro sukipe
1O alav e Devleko avilo kai o Jeremias, pala o bari sukipe kai saia.
2Achilo zalosno o Juda,
ta leke udara achile puste,
besle pe phuv, ta asundilo o roipe
katar o Jerusalem.#Is 3.26; Lm 1.4.
3E glamne bichalde pe slugen kai o pai,
resle kote kai chidiniaola o pai
ta o pai sukiloia, irisaile ta ande
pe burura chuche, lallaile,
ni llanena so ka cheren ta ucharde po soro.
4E phuv putaili soke ni diapeke ando foro,
e llene kai radin e phuv ni llanena so ka cheren
ta ucharde po soro.
5E sierve bianena pe umalia ta mukena
pe minonen chudine soke ni saia char te jan.
6E magarchura e burdoke likena chak upre,
sungana e balav sargo llukela dive,
lenge akha korraona soke ni saia char.
O profeta molilpe e Devleke pala o foro
7¡Ioi Devla! cher e ezgode
pala o volipe kai si tut pe cho anav,
I te avela kai amaro bilachipe muril amen,
soke amari dos cherdili mai bari
ta cherdam chuke o bilachipe
8Tu san so aduricharel o Israel,
tu arakhe le ando vreme katar e duk,
¿Soke cherdilan sargo katar inai tut phuv,
sargo gua kai phirel e phuvia
ta duriol ta thovelpe te sovel?
9¿Soke san sargo iek lleno darano,
ta sargo tromano kai nasti braduil nika?
A tu Devla, san maskar amende
ta pe amende si ikhardo cho anav,
na muk amen korkorre.
10O Del phenda gia katar gava foro:
Gachin avila lenge drago te llan pe suako rig, ta lenge porrne ni achile, goleke o Del ni veselilpe pala lende, ka delpe golli katar lengo bilachipe ta ka dukhavel len.
11O Del phenda mange gia:
Na molisao pala o lachipe katar gava foro. 12Kana ka cheren o alluno, me ni ka asunav kai roven, ta kana ka cheren kurbano phabardo ta ezgode dine ni ka lav le. Ka zatriv len e jarniea, e bokhaia ta e nasualimaia.
13Ta me phendem:
¡Ioi Devla kai san amaro Gazda! E poraukura phenen lenge Kai ni ka dikhen o jarni, ta kai ni ka avel bok maskar lende, ta kai pe gava than ka de len e chachuni pas.
14Ondaka o Del phenda mange gia:
E poraukura kojaven ande mo anav, me ni bichaldem len, ni phendem lenge, ta ni diem lenchar orba, dikhen sargo sune kojamne, apogodin, von phenen tumenge iek poroka kojamno kai ni mol la niso. 15Goleke, o Del phenel katar e poraukura kai ni bichalda vou ta kai den orba ande leko anav ta phenen kai ni o jarni ni e bok ni ka avel ande gaia phuv, a isto von, e poraukura, ka aven zatrime e jarniea ta e bokhaia. 16Ta gua o foro kai von phende lenge goia poroka, ka avel chudino pe droma katar o Jerusalem pala e bok ta o jarni, ta ni ka avel ko te prajol len, lenge diskinien, lenge chaurren ta lenge chorren, ta pe lende ka chucharav lengo bilachipe. 17Tu ka phene lenge gala alava:
Te peraven ma akha ausa
sorro llive ta sorro riat ta te na achen,
soke bari duk nakhel e chei katar mo foro,
iek nasualipe but dukhado.
18Te likav pe umal, dikhav mule e jarniea,
a te dav ando foro, nasuale bokhatar,
goleke e poraukura ta e popura phirde
pe phuv, ta ni acharde.
O profeta del orba e Devlea
19¿Muklan chudino sa e Judae?
¿Murzi sa che liea po Sion?
¿Soke dukhadan amen bi te avel iek drab?
Adurichardam e pas, ta ni avilo o lachipe,
aduricharaia te sastiva, ta darailam.
20¡Ioi Devla! Llana kai sam bilache
ta kai i amare papura sea bilache
soke cherdam chuke o bilachipe.
21Pala o volipe katar cho anav
na chide amen, ta na muk ando lallao
cho glamno trono, de tut golli ta na phag
o alav kai si tut amenchar.
22¿Si maskar e dela e phuvienge iek
kai cherel te delpeke?
¿Ni san tu amaro Del?
Goleke adurichara tutar,
tu cherdan sa gala ezgode.
Currently Selected:
Jeremias 14: BACHRO
Highlight
Share
Compare
Copy
Want to have your highlights saved across all your devices? Sign up or sign in
Biblia ande chib Romani © Sociedad Bíblica Chilena, 2018.
