Jeremias 13
13
E orba katar e duk e Israeleki
1Gia phenda mange o Del:
Lla ta chin chuke iek kavisi cherdo katar o lino, ta phande le pe cho maskar ta na thov le ando pai. 2Ta chindem o kavisi prema sar phenda mange o Del, ta phanglem le pe mo maskar. 3Pale phenda mange o Del: 4Le mo kavisi kai chindan, kai si phanglo pe cho maskar, uste ta lla karing o Eufrates ta guruv le ando chindipe katar iek pechina. 5Ondaka llelem ta gurudem le para o Eufrates, gia sar phenda mange o Del.
6Ta kana nakhle but llivesa, o Del phenda mange gia:
Uste ta lla karing o Eufrates ta le o kavisi kai phendem chuke te guruve kote. 7Ondaka llelem karing o Eufrates ta anadem, ta liem o kavisi katar gurudem le, a o kavisi cherniloia, ta ni trubula nisoke.
8Ta o Del phenda mange: 9O Del phenda mange gia:
Gia ka cherav te cherniol o baripe katar o Juda, ta o istardipe katar o Jerusalem. 10Gava bilacho foro kai ni kamel te asunel me alava, ta kai cherel pe piro, ta kai llal pala e dela katar aver phuvia, radil lenge ta del changenchar angla lende, ka cherdol sargo gava kavisi, kai inai lacho nisoke. 11Soke isto gia sar o kavisi lipilpe pe esnaga e manuseki, gia cherdem te avel pasa mande sa e phuv katar o Israel ta sa e phuv katar o Juda, gia phenel le o Del, ta sai aven mange foro ta familia, blagosipe ta liubao, a ni asunde.
Aver orba katar e duk kai si te avel
12Goleke ka phene lenge gala alava:
Gia phenda o Gazda, o Del katar o Israel:
Suako bure ka pherdol mol ta. Ta von ka phenen chuke:
¿Ni amen llana kai sa e burura ka pherdon mol? 13Ondaka ka phene lenge:
Gia phenda o Del:
Me ka matarav sa e llenen kai zivin ande gaia phuv, ta e charonen katar e vicha e Davideki kai besen pe leko trono, e poponen ta e profetanen, ta sa e llenen kai zivin ando Jerusalem, 14ta ka cherav te marenpe iek averea, ta i e dada pe chavenchar, gia phenel le o Del, ni ka prostiv, ta ni ka avel mange zalba ni volipe ni zao te na zatriv len.
Phendol e Israeleke so ka avelpe letar
15Asunen ta thoven sama, na cheren baripe
soke o Del dia orba.
16Blagosin e Gazda tumaro Del,
mai anglal te cherel te avel o truniariko,
mai anglal te eskonban tumare porrne
pe burdura katar o truniariko
ta te aduricharen o villelo
kai ka cherel le tumenge senka merimaki.
17A te na asunden gaia orba,
ka rovav po chorial pala tumaro baripe,
ta me akha ka pherdon ausa,
ka rovav bare ausenchar
soke phangle e stoka e Devleki.
O Del bichalel te phenen e charoke
18Phen gia e charoke ta e charoinake:
Chuden tumendar o baripe, besen pe phuv,
soke e korona katar tumaro gazdaripe
pelitar katar tumare sore.
19Phangle forura katar o Negev,
ta ni saia ko te putarel len,
sa o Juda inllarde le ta phangle le.
20Vazden tumare akha ta dikhen
golen kai aven katar o norte.
¿Kaitali e stoka kai avila chuke dini,
kaitalo cho sukar pero?
Phendol kai ka inllaren phanglo e Israele
21¿So ka phene kana vou ka thovel
te gazdarin pe tute golen kai tu sikadan
te aven che amal?
¿Ni ka cheren te dukhal tut zurale
sargo iek diskinia kai si te maladol lake?
22Te phendan ande cho lio:
¿soke nakhav gaia ezgode?
Pala cho baro bilachipe vazdie cho fistano,
pucharde che porrne.
23¿Sai pharruvel pi morchi o etiope,
ta po makhlipe o leopardo?
Isto gia tumen, ¿sai cheren o lachipe
kana sen sikade te cheren o bilachipe?
24Goleke me ka rispiu tumen pe balav
katar o pusto sargo e char suki kai nakhel#Sal 1.4; Os 13.3; Sof 2.2.
25E gaia ka avel chi baj, so me chinadem chuke,
gia phenel le o Del, soke bristrailan mandar
ta uzdisailan ando kojaipe.
26Goleke me, ka ikanav tutar cho fistano
ta ka dikhol cho lallao,
27cho kurvaluko, cho urkipe,
o bilachipe katar cho kurvaluko kai
cherea pe burdura,
pe umalia dikhlem o gadope kai cherea.
¡Tesko chuke Jerusalem! ¿Ni ka ave chisti?
¿Gachin ka nakhel te chisto tut?
Currently Selected:
Jeremias 13: BACHRO
Highlight
Share
Compare
Copy
Want to have your highlights saved across all your devices? Sign up or sign in
Biblia ande chib Romani © Sociedad Bíblica Chilena, 2018.
