Jueses 20
20
E israelitura joliaon pala o mundaripe ande Gibea
1Ondaka likiste sa e israelitura katar o Dan llik o Berseba ta o Galaad, ta chidinaile sargo iek manus ande Mispa. 2Sa e gazda katar sa e viche katar o Israel sea kote. Ta chidinailo sa o foro e Devleko, star stotine milie boñikura kai llana peske. 3Ta e llene katar e vicha e Benjamineki llangle kai ande Mispa chidinaile sa ogola viche. Ta e israelitura puchle e levita sar mundarde e konkubina. 4Ta o levita phenda lenge:
Me avilem me konkubinaia ando Gibea katar o Benjamin te rachara kote. 5Isto goia riat e llene katar o foro truisarde o cher kai sama amen soke mangena mundaren man, ta me konkubina thode la ando lallao ta voi muli. 6Ondaka mi liem laki esnaga ta chindem la ande kotora, ta bichaldem e kotora pe sa o Israel te sai llanen katar o mundaripe kai cherdea. 7Akana tumen morabi te mislin so ka cheren.
8Ta sa thodepe pe porrne ta phende:
Niko ni ka irilpe kai po cher o kai pi chara. 9Amen morabi te chela amen te dikha ko ka del po Gibea. 10Iek katar des murusa katar sa e viche ka rodel jape e boñikonenge. Ogola ka llan te cheren te pochinel o Gibea andar o bilachipe kai cherdilo ando Israel.
11Ta sa e israelitura chidinaile sargo iek manus te den po Gibea. 12Ta bichalde llenen pe sa e phuv katar o Benjamin te puchen len: ¿So si o mundaripe kai cherde nesave tumendar? 13De amen gale bilache llenen kai si ande Gibea te mundara len ta gia te chistol o Israel katar o bilachipe.
A e benjaminitura ni thode sama pe phlalen e israelitura, 14ta i e benjaminitura katar sa e forura chidinaile ande Gibea te marenpen e israelitonenchar. 15E boñikura katar o Benjamin kai lachardepe po maripe sea bis ta sov milie, bi te llindol e efta stotine mai lache boñikura katar o Gibea. 16Maskar sa gala murusa sea efta stotine murusa kai lengo va o lacho saia o stingo ta kai llanena gia sukar te chuden barren pe onda kai iekhe barrea dena pe bal kai mangena te peraven. 17Ta e israelitura chidie star stotine milie katar e mai lache boñikura.
O maripe e vichaia e Benjamineki
18Mapalal e israelitura llele ando Betel ta puchle e Devle te sai llanen savi vicha saia te marelpe oma e llenenchar katar o Benjamin. Ta o Del phenda lenge kai o Juda saia te llal oma. 19Gia e israelitura ustile rano ta logle angla o Gibea. 20Ta e israelitura likiste te marenpe e llenenchar katar o Benjamin ta thodepe angla o Gibea lacharde po maripe. 21A e llene katar o Benjamin likiste katar o foro ta mundarde gua llive bis ta dui milie israelen. 22A o foro lie zor ta lachardepe te marenpe pe isto gua than kai mardeape ando purvo llive. 23Soke e israelitura llelea ando Betel te roven angla o Del lligo ni pelitar e riat, ta puchlea e Devle dal saia lenge pale te marenpe pe phlalenchar. Ta sar o Del phendaia lenge te llan te marenpen. 24E israelitura llele te marenpe e llenenchar katar o Benjamin ando duito llive. 25A po duito drom e llene katar o Benjamin likiste katar o Gibea ta mundarde desojto milie israelen. 26Ondaka sa e boñikura ta sa o foro katar o Israel pale llele ando Betel te roven angla o Del llik kana peli e riat. Sorro llive ni jale niso, die kurbanura ta ezgode dine e Devleke te sai prostil o Del.
27Ta e israelitura puchle e Devle, soke ande gua vreme e arka katar o Del o Gazda saia ando Betel. 28Ta o Finees chavo katar o Eleazar unuko katar saia o popo, puchla ¿Pale si te lla te mara amen amare phlalenchar katar e vicha e Benjamineki, o mai sukar si te phena kai von dobisarde amen? Ta o Del phenda lenge:
Llan po maripe soke theara ka cherav te dobin len.
29Ondaka nesave boñikura israelitura gurudile pasa o Gibea, 30ta ogola boñikura llana po maripe e llenenchar katar o Benjamin ta lachardepe te marenpe angla o Gibea sargo ogola droma. 31Ta pale e llene katar o Benjamin likiste katar o foro ta durisaile e forotar te den pe israelitura. Ta mundarde tranda israelitura po drom katar o Betel ta o Gibea ta pe vostanura. 32Ta e llene katar o Benjamin mislisaile kai e israelitura nasena lendar sargo ogola droma. A e israelitura duriona te sai roden len llik kai e droma. 33Ta e israelitura ustile ta lachardepe te marenpe ando Baal Tamar, ta i likiste e boñikura kai sea gurudine pasa o Gibea, 34ta die pe foro. Sea des milie katar e mai lache boñikura kai die po Gibea. O maripe saia but baro ta e llene katar o Benjamin ni llanena kai sea te jasaren. 35Ondaka o Del cherda te dobin e israelitura ta mundarde bis ta panch milie ta stotine boñikonen katar e vicha e Benjamineki. 36Ta e llene katar o Benjamin acharde kai jasarde o maripe.
E israelitura durisaile kana e llene katar o Benjamin rodena len soke sea len vera ande boñikura kai sea gurudine te den po Gibea. 37Gala boñikura die po Gibea ta mundarde e jarnienchar saurren katar o foro. 38E boñikura kai sea gurudine achilea pe orba avere israelitonenchar te sikaven baro thuv kana ka len e foro. 39Ta kana e israelitura kai nasena kana dikhena e thuv sai te boldena ta te marenpe e llenenchar katar o Benjamin.
E benjaminitura mundarde tranda israelen, ta mislisaile kai dobina len sargo kana mardepe o purvo drom. 40Ta kana likisto o thuv katar o foro ta kana e llene katar o Benjamin dikhle e iag ta e thuv kai avena llik kai o miloso. 41Ondaka e israelitura mardepe lenchar ta e llene katar o Benjamin daraile soke acharde o bilachipe kai avela pe lende. 42Ta nasle katar e israelitura po pusto, ta nasti nasena soke e boñikura kai likena katar o foro ni mukena len te nakhen ta mundarena len. 43Ta e israelitura truisarde e llenen katar o Benjamin, rodie len ta zatrisarde len katar o Menuja llik o Gibea pe rig kai likel o kham.
44Gia mule desojto milie boñikura katar o Benjamin. 45Ogola nasle po pusto karing e pechina katar o Rimon, a panlle milie lendar mundarde len pe droma. Ta e israelitura rodie len llik kai o Gidom ta mundarde dui milie lendar. 46Gua llive mule bis ta panch milie katar e mai lache boñikura katar o Benjamin. 47Ta sov stotine llene katar o Benjamin nasle po pusto ta achile star chon ande pechina katar o Rimon. 48Mapalal e israelitura die pe ogola llenen katar o Benjamin ta e churienchar mundarde suakone murusen katar suako foro ta i mundarde e zivirinien ta phabarde e foronen.
Currently Selected:
Jueses 20: BACHRO
Highlight
Share
Compare
Copy
Want to have your highlights saved across all your devices? Sign up or sign in
Biblia ande chib Romani © Sociedad Bíblica Chilena, 2018.
