Jueses 19
19
O levita ta e konkubina
1Ande llivesa kana ni saia charo ando Israel, iek levita kai zivila pe rig mai dur katar o burdo o Efrain lia iekhe konkubinaia katar o Belen katar o Juda. 2A e konkubina jolaili lea ta llelitar kai po dadeko cher ando Belen katar o Juda ta achili incha star chon. 3Ta lako rrom llelo pala la, te irilpe laia. Inllarda pea dui sluge ta dui magarchura, ta voi lia le ando dadeko cher. 4Ta i lako dad lia le veselimaia ta mangla letar te achen lete. Ondaka o levita ta leke sluge achile lete trin llivesa, jana, piena ta racharena. 5Ando starto llive ustile thiarinako rano te llantar, o sastro katar o levita phenda leke:
Ja kotor marrno oma te llantar te le chuke zor.
6Ta e dui besle te jan ta te pien, ta o sastro katar o levita mangla letar te achel ios aver riat. 7Ta kana o levita ustilo te llaltar, leko sastro pe gachin mangla letar ta achel kai o levita pale achilo te racharel.
8Ando panchto llive o levita ustilo rano te llaltar, ta pale o dad katar e konkubina mangle letar te jal fiso oma te llantar te sai len zor. Gia jale e dui. 9Ta kana o levita llalatar pe konkubinaia, leko sastro cherda le te irilpe soke perela e riat ta phenda leke te racharel ios aver riat te sai llaltar thiarinako rano. 10A o levita ni kamla te achel ios aver riat ta llelotar, ta pe konkubinaia ta leke dui magarche avilo ando Jebus kai si o Jerusalem. 11Ta o sluga phenda e leviteke:
¿Soke ni rachara ande gava foro katar e jebuseura?
12Ta o levita phenda leke:
Ni ka nakha pe ni iek foro kai inai katar o Israel, soke ka lla ande Gibea 13ta kote ka rachara, ande Gibea o ande Rama.
14Ta llele po drom ta kana perela e riat avile ande Gibea, iek foro katar e vicha e Benjamineki. 15Ondaka die ande Gibea te racharen, ta o levita llelo te besel pe plasa katar o foro soke niko ni dela le iek soba te sai racharel.
16Kana peli e riat nakhlo iek phuro kai avela katar po rado ando vos. Gava phuro saia katar e burdura Efrain ta zivila ando Gibea makar ni saia katar gua foro, soke e llene kai zivina ande Gibea sea katar e vicha e Benjamineki. 17Ta kana o phuro dikhla pe plasa e levita, puchla le:
¿Katar ave ta kai lla?
18Ta o levita phenda leke:
Amen sam kate te rachara. Ava katar o Belen katar o Juda ta lla pe rig mai dur katar o burdo Efrain, kotar sem. Llav karing o cher e Devleko ta niko ni dia man kate iek soba te racharav. 19Si amen te da te ja e magarchonenge, marrno ta mol me rromiake, me slugake ta mange. Niso ni trubul amenge.
20A o phuro phenda leke:
Te avel pas ande tute. Me ka dav tut sa so trubul chuke. Ni ka mukav tut te rachare pe plasa.
21Ta o phuro inllarda le kai po cher ta dia e magarchonenge te jan. Jaladepe e porrne, jale ta pile. 22Ondaka kana sea vesele, avile bilache llene katar o foro, truisarde o cher, marde po udar ta phende e phureke:
¡Ikan avri e llene kai si tute! ¡Amen manga te sova lea!
23A o phuro likisto katar o cher ta molisailo lenge:
¡Na cheren gia phlalalen! ¡Na cheren gaia ezgoda bilachi, vou racharel mande! 24Kate si murni chorri kai nikada ni sovti ni iekhe murusea, ta e konkubina katar o lleno kai si mande. Cheren lenchar sogo kamena, ta na cher lea gaia ezgoda gia bilachi.
25A e bilache llene ni kam le te asunel e phure, goleke o levita lia e konkubina ta tradia la avri. Ta e bilache llene mukle la ando lallao sorro riat ta mukle la kana pharrona e zore. 26Kana pharrona e zore e konkubina irisaile karing o cher e phureko kote kai saia lako rrom, ta muli po udar. 27Kana lako rrom ta putarda o udar te llaltar po drom, malada e konkubina inzardi ta lake va po udar e chereko. 28Ta phenda lake:
Uste aide.
A voi niso ni phenda. Ondaka vou thoda laki esnaga po magarcho ta llelotar po drom kai po cher. 29Ta kana avilo chere, lie iek churi ta chinda e esnaga e konkubinaki ande desudui kotora, ta bichalda len pe sa e phuv katar o Israel. 30Ta suako lleno kai dikhela gava, phenela:
Sar kana e israelitura likiste katar o Ejipto nikada ni dikhola iek ezgoda sargo gaia. Morabi te misli amen so ka chera.
Currently Selected:
Jueses 19: BACHRO
Highlight
Share
Compare
Copy
Want to have your highlights saved across all your devices? Sign up or sign in
Biblia ande chib Romani © Sociedad Bíblica Chilena, 2018.
