Isaias 38
38
O nasualipe ta sar sastilo o Ezekias
2 R 20.1-11; 2 Kr 32.24-26
1Ande gola llivesa o Ezekias nasualio ta saia po meripe. Ta avilo lete o profeta o Isaias chavo katar o Amos ta phenda leke:
O Del phenel gia:
Lachar che ezgode soke ni ka sasto ta ka mere.
2Ondaka o Ezekias boldinailo karing o zido ta molisailo e Devleke, 3ta phenda:
¡Ioi Devla! moliv man chuke akana te de tut golli kai phirdem chachimaia angla tu ta me liea llelem orta, ta cherdem angla che akha so si chuke drago. Ta o Ezekias rovda ande bare ausa.
4Ondaka o Del phenda gia e Isaiseke: 5Lla ta phen gia e Ezekiaseke:
O Del o Gazda katar cho dad o David phenel gia:
Asundem cho molipe, ta dikhlem che ausa, goleke ka dav tut desupanch burs ios pe cho zivoto. 6Ta ka braduiv tut ta i gale foro katar o va e charoko katar e Asiria, ta gale foro ka arakhav.
7Ta gale ezgodaia ka sikavel chuke o Del, kai o Del ka cherel so phenda:
8Me ka cherav te irilpe palpale des thana e senka katar so fulisti po saiato senkako katar o Ajas.
9Gava si so pisisarda Ezekias o charo katar o Juda, kana nasualio ta sastilo katar pi muka:
10Me phendem:
Po dopas katar mo zivoto
ka llav kai o udar e limoreko,
ikande si e llivesa kai achena man te ziviu.
11Ta phendem:
Ni ka dikhav ios e Devle
pe gaia phuv kai ziviu, ni ka dikhav ni iekhe
manuse kai zivil pe gaia phuv.
12O than kai ziviu si ikando kotar
sargo e chara katar iek chobano kana muchilpe.
Sargo o lleno kai khuvel
chindem o thav katar mo zivoto,
ka chinel man e nasualimaia,
ka zatril man maskar o llive ta e riat.
13Adurichardem llik kai e thiarin.
Drobosarda sa me kokala sargo iek liono,
katar e thiarin llik kai e riat ka zatri man.
14Sargo e grulla ta sargo iek chirikliorri
rovava auchiva man sargo iek gulubo,
ta dikhava karing o miloso.
Devla, nakhav o silnope, de man zor.
15¿So ka cherav?
Gua kai phenda le mange, isto vou cherda le.
Ka phirav ande zalba sa mo zivoto,
pala e zalba kai si ande mo lio.
16¡Ioi Devla! sa gala ezgode cheren te zivi
ta ande sa gala ezgode o zivoto mo duo,
soke tu ka vazde man pale ta ka chere te ziviu.
17Bari zalba avili pe mande ande pas,
a chuke avila drago te bradui man
te na perav ando chernipe katar o limori,
soke chudian pala che zea mo bilachipe.
18Soke o limori ni ka blagosil tut,
ta ni o meripe ni ka del tut liubao
ta ni gola fulien ando limori
nasti aduricharen cho chachipe.
19Samo gua kai zivil ka blagosil tut,
gia sargo me allive, o dad ka sikavel
cho chachipe pe chaurrenge.#Sal 88.10-12.
20O Del ka braduil man, goleke ka llilaba
amare llilia ando cher e Devleko
sa e llivesa katar amaro zivoto.
21Omanglal o Isaias phendaia:
Drobon ta amin e simochine ta thoven len po chindipe kai ni sukol ta ka sastol. 22A o Ezekias phendaia:
¿Sar ka llanav kai sai ka llav karing o cher e Devleko?
Currently Selected:
Isaias 38: BACHRO
Highlight
Share
Copy
Want to have your highlights saved across all your devices? Sign up or sign in
Biblia ande chib Romani © Sociedad Bíblica Chilena, 2018.
