Isaias 37

O Del braduil e Judae katar o Senakerib

2 R 19.1-37; 2 Kr 32.20-23

1Kana asunda le o charo Ezekias, pharrada pe patave, ta chudia pe pete prajo ta llelo ando cher e Devleko. 2Ta phenda te llal o Eliakim kai arakhela o cher e charoko, o Sebna kai saia pismiri ta e phure katar popura, te chuden pe pete prajo ta te llan kai o profeta o Isaias, chavo katar o Amos 3Ta phende leke gia:

Gia phenda o Ezekias:

Gava llive si iek llive katar e nuzda, chichidipe ta lallao, soke e minone resle llik te biandon ta goia kai bianel inai la zor. 4Sai te asunel o Gazda cho Del e alava katar o mai baro sudo, kai bichalda le leko gazda o charo katar e Asiria te kusel e Devle o llundo, ta te dukhavel e alavenchar kai asunda cho Gazda o Del, goleke molisao tu, pala e llene kai akana achen.

5E sluge katar o Ezekias llele kai o Isaias. 6Ta o Isaias phenda lenge gia:

Gia phenda o Del:

Na dara katar gola alava kai asundan ta kai kusle man e sluge katar o charo katar e Asiria. 7Me ka thovav iek duo ande lete ta ka asunel iek buna, ta ka irilpe kai pi phuv ta ande leki phuv me ka cherav te mundaren le e jarniea.

8Kana irisailo o mai baro sudo, asunda kai o charo katar e Asiria duriloia katar o Lakis ta kai marelape e phuviaia katar o Libano, 9A kana asunda kai o Tiraka charo katar e Etiopia llelo te marelpe lea, bichalda llenen kai o Ezekias ta phenen lenge gia: 10Gia ka phenen e Ezekiaseke charo katar o Juda:

Te na kojavel tut cho Del kai uzdi tut ande lete, ta te phene:

O Jerusalem ni ka avel dino ande va katar charo katar e Asiria. 11Soke tu asundan so phende e charura katar e Asiria sa e phuvienge, kai zatrisarde len, ¿A tu misli kai ka kurtuli tut? 12¿A so, lenge dela ka braduin e phuvien kai me purane zatrisarde len, o foro Gozan, o Jaran, o Resef, e edenitonen kai sea ando Telasar? 13¿Kote kai si akana e charura katar o Jamat ta katar o Arfad, ta o charo katar e forura katar o Sefarvaim katar o Ena ta o Giva?

14O Ezekias lia e lila katar e va golenge kai sea bichalde ta chitisarda len, ta likisto kai o cher e Devleko ta thoda len angla o Del. 15Ondaka o Ezekias molisailo e Devleke ta phenda: 16Devla kai si tut sa e zor, Del katar o Israel, kai zivi maskar e kerubinura, samo tu san o Del ande sa e charoine e phuvienge, tu cherdan o miloso ta e phuv. 17¡Ioi Devla! Thou sama ta asun man, Devla putar che akha ta dik. Asun sa e alava kai phenel o Senakerib, kai bichalda te kusen e Devle kai si llundo. 18Chache si Devla, kai e charura katar e Asiria zatrisarde sa e phuvien ta lenge forura, 19ta chudie lenge delen ande iag, soke ni sea dela ta cherdea len e manusa, kastune ta barrustune, goleke zatrisarde len. 20Goleke, tu kai san amaro Gazda ta Del, braduisar amen katar lenge va, ta sai llanen sa e phuvia kai samo tu san o Del.

21Ondaka o Isaias chavo katar o Amos bichalda te phenen gia e Ezekiaseke:

Gia phenda o Gazda o Del katar o Israel:

Pala so manglan mandar katar o Senakerib, charo katar Asiria, 22gala si e alava kai o Del phenda letar:

E chei kai si chorri katar o Sion

cherel te na mol tut niso,

marel tutar espurnia,

pala tute miskol po soro

e chorri katar o Jerusalem.

23¿Kake orbe bilache dian, ta ka kuslan?

¿Pe ka urkisardan ta dikhlan po miloso?

Po Santo Del katar o Israel.

24Che sluga bichaldan te kusel e Devle,

ta phendan:

But bordona si man ta ka likav lenchar

chak upre pe burdura,

ka fuliav katar e burdura e Libanoke,

ka chinav e bare kasta katar o sedro,

leke siprese mai lache,

ka resav kai leke thana mai vazdine,

ta kai leke vosa e mai pherde.

25Me anadem ta pilem o pai,

ta e estopenchar katar me porrne

ka ikanav sa e lena katar o Ejipto.

26¿Ni asundan kai phenen

kai cherel but vreme kai me mislisailem gua?

ta akana cherdem le, soke tu ka chere

te cherdon iek umpa barra phage

e forura zidome.

27Gola kai zivia andre ni gazdarisarde but,

daraile ta ni llanena so ka cheren,

cherdile sargo patra katar e umal,

sargo char zeleni, sargo e char kai bariol pe chera,

kai sukol mai anglal katar lako vreme.

28Llanav sar san, llanav kana llatar

ta kana ave, ta llanav e joli kai si chuke pe ma.

29Soke jolailan pe mande, ta asundem

sar chere baripe, goleke

ka thovav ande cho nak iek sastri bangardo

ta mo salvari ande cho mui,

ta ka cherav te iri tut isto katar avilan.

30Ta gale ezgodaia ka llane:

Gava burs ka jan so ka bariol korkorre pe phuv,

ta i o gua burs ka cheren le,

ta ando trito burs ka thoven ande phuv

ta ka chiden so del e phuv,

ka thoven te bariol e drak ta ka jan la.

31Ta e llene kai ka achen katar o Juda

ta gola kai ka nasen, pale ka istaren zile tele

ta ka den septelie upre.

32Soke katar o Jerusalem ka liken

e cherricha llene kai ka achen

ta katar o Sion e llene kai ka braduinpe.

O Del kai si le sa e zor ka cherel le

soke phabol o leko lio.

33Goleke o Del phenel gia

katar o charo katar e Asiria:

Ni ka del ande gava foro,

ta ni ka chudel llida ande lete,

ta ni ka thovelpe angla le iekhe eskudoia,

ta ni ka vazdel kasta angla lete.

34Katar o drom kai avilo, ka irilpe,

ta o Del phenel kai ni ka del ande gava foro.

35Soke me ka arakhav gale foro

te bradui la, pala mande ta pala mo sluga o David.#2 S 7.1-16.

36Ta likisto o suecho e Devleko ta mundarda stotina ta ojtovardes ta panch milie llenen ando pero katar e Asiriura, ta kana ustile thiarinako, sea samo esnage mulenge.#2 R 19.35-36. 37Ondaka o Senakerib charo katar e Asiria llelotar te zivil ando Ninive. 38Ta kana vou blagosila ando cher katar lengo del o Nisrok, leke chave o Adramelek ta o Sareser mundarde le e jarniea ta nasle kai e phuv katar o Ararat, ta pe leko than charoisarda o Aserjadon.

Currently Selected:

Isaias 37: BACHRO

Highlight

Copy