Isaias 36

Sar die te marenpe ando Senakerib

2 R 18.13-37; 2 Kr 32.1-19

1Kana cherela desustar burs kai gazdarila o charo o Ezekias, o Senakerib charo katar e Asiria mardape sa e phuvienchar katar o Juda kai sea zidome, ta lia len peke. 2Ta o charo katar e Asiria bichalda te llal o Rabsaser bute boñikonenchar katar o Lakis llik kai o Jerusalem te marenpe e charoia o Ezekias, ta loglo pase katar nakhel o pai kai si chidino mai upre, kai si po drom katar e umal goleki kai jalavel. 3Ta likisto te maladol lea o Eliakim chavo katar o Ilsias kai tala leko va saia e charoko cher, o Sebna kai saia pismiri ta o Ioaj chavo katar o Asaf kai saia sudo. 4Ta o mai baro sudo phenda lenge:

Phenen gia e Ezekiaseke:

O glamno charo, o charo katar e Asiria phenel gia:

¿Ande so uzdi tut gia?

5Asun, e orbe sar te dobi po maripe kai tu phene, si alava chuche. ¿Ande ka uzdi tut kai mange te mare tut manchar? 6Tu uzdi tut ando Ejipto kai si sargo iek kas phago, kai vareko te mukelpe pe lete ka chinel ta ka jiravel leko va pe ogoia rig. Gia si o Faraon charo katar o Ejipto sa e llenenchar kai uzdinpe ande lete.#2 R 18.21; Ez 29.6-7. 7A te phenea mange:#2 R 18.4; 2 Kr 29—31.

Ando Del amaro Gazda uzdi amen, ¿Inai gava kai leke thana vazdine ta leke altare ikanda len o Ezekias, ta phenda karing o Juda ta o Jerusalem:

Angla gava altar ka blagosin? 8Goleke me mangav tutar te chere iek ezgoda:

Mo gazda o charo katar e Asiria ka del tut dui milie gra te sai anea tu llenen te llan pe gola gra. 9Tu nasti ka chere te delpe palpale ni o mai minono sluga katar mo gazda, i te uzdia tut ando Ejipto ta ande leke bordona ta ande llene kai llan pe bordona. 10¿A so, me avilem akana ande gaia phuv te zatriv la bi e Devlea? O Del phenda mange:

Lla kai goia phuv ta zatrisar la.

11Ondaka o Eliakim, o Sebna ta o Ioaj phende:

Manga tutar te de orba amenchar kai sam che sluge ando arameo, soke amen llana te da orba ande goia chib, ta na de orba amenchar ande chib katar o Juda soke asunel amen e llene kai si po zido e foroko.

12A o mai baro sudo phenda:

¿A so, mo gazda bichalda man te dav orba samo tuia ta che gazdaia? ¡Iok! ¡Man bichalda i kai e llene kai si po zido e foroko, ta von ta i tumen oma ka jan tumari mel ta ka pien tumaro muter!

13Ondaka o mai baro sudo ustilo pe porrne, ta urkisarda surale ande chib katar o Juda:

¡Asunen e alava katar o baro charo, o charo katar e Asiria!

14O charo phenel gia:

Te na kojavel tumen o Ezekias, soke nasti ka braduil tumen. 15Ta te na cherel te uzdintumen ando Del, ta te phenel:

Chachimaia o Del ka braduil amen ta kai si ka ni ka avel dino gava foro ande va katar o charo katar e Asiria. 16Na asunen e Ezekiase, soke o charo katar e Asiria phenel gia:

Cheren manchar e pas, ta aven mande, ta te jal suako lleno katar pi drak, ta suako iek katar po kas simochinengo, ta te piel suako lleno o pai katar po bunari, 17lligo ni ka avav ta ka inllarav tumen kai iek phuv sargo tumari phuv, iek phuv kai si lliu ta mol, iek phuv kai si marrno ta drak. 18Dikhen te na kojavel tumen o Ezekias kana phenel:

O Del ka braduil amen. ¿Braduisarde vareka e dela katar aver phuvia katar e zor e charoki katar e Asiria? 19¿Kaitalo o del katar o Jamat ta o Arfad? ¿Kaitalo o del katar o Sefarvaim? ¿Braduisarde katar mo va e Samaria? 20¿Savo del maskar sa e dela katar e phuvia kai braduisarda pe phuvia katar mi zor, te avel braduime o Jerusalem katar mi zor?

21A von phangle po mui ta ni phende niso, soke o charo phendaia lende gia:

Te na den leke anglal. 22Ondaka o Eliakim chavo katar o Ilsias kai saia kai arakhela o cher e charoko, o Sebna kai saia pismiri ta o Ioaj o sudo chavo katar o Asaf, pharrade pe patave ta llele kai o Ezekias ta phende leke so phenda o mai baro sudo.

Currently Selected:

Isaias 36: BACHRO

Highlight

Copy