Isaias 32
32
E charoina katar o chachipe
1Iek charo ka charoil chachimaia,
ta sudura kai ka krisin prema o chachipe.
2Ta gua murus ka avel sargo iek than
kai achavel e balav ta o bursin,
sargo e paia kai nakhen katar e len
pe phuv kai si but sukipe,
sargo o lado katar iek bari pechina pe phuv e tati.
3Ondaka ni ka phanglion e akha golenge kai dikhen,
ta e kan golenge kai thoven sama ka asunen.
4Ta o lio e dilengo ka acharel te llanel,
ta e chib e nemavengi ka del orba oma ta sukar.
5O lakomo nikada ios ni ka ikharen le posteno,
ni o kojamno ni ka ikharen le glamno.
6Soke o lakomo ka del orbe chorre,
ta leko lio ka cherel ezgode bilache
te del orbe bilache karing o Del,
ta mukel bokhale e llenen kai mangen te jan
ta ni del pai e llenen kai si trusale.
7O kojamno si le ezgode bilache kai cherel,
mislilpe ezgode bilache te kojavel e llenen proste
ta del orbe kojamne ta phenel len pe kris
te dukhavel e llenen kai si chorre.
8A o lleno kai si posteno ka mislilpe postenimaia
ta ka avel blagosime pala leko postenipe.
E diskinie bilache
9Diskinie kai inai tumenge zao, asunen mo avazi,
chea kai uzdintumen, asunen mo chachipe.
10Katar angle cherricha mai but katar iek burs,
ka nakhen iek bari dar,
tumen kai uzdintumen,
soke ni ka avel o vreme kana bichindol,
ta ni ka avel o vreme kai chiden e septelie.
11Izdral tumen kai inai tumenge zao,
daran tumen kai uzdintumen,
ikanen tumendar tumare patave
thoven pe tumende prajo ta patave zalosne.
12Chalaven tumen pe tumaro brek
pe sukar umalia ta katar e sukar drakha.
13Pe phuv katar mo foro
ka barion kasta karrnale ta karrne,
ta pe sa e chera kai si veselia ando foro veselo.
14Soke e bare chera ka achen puste,
ta ni ka avel o foro pherdo llene sargo omanglal,
e bare zidura ka achen chudine
ta kote ka zivin e magarchura dive
ta ka jal char e stoka e guruvengo,
15lligo ni ka avel chordino pe amende
o duo upral ta o pusto ka cherdol iek umal zeleni,
ta e umal zeleni ka avel sargo iek vos.
16Po pusto ka avel e kris
ta ando umal zeleni ka avel o chachipe.
17Ta cheres o chachipe ka avel pas,
ta o chachipe ka cherel te acha katar o rado
ta te uzdiamen ostade.
18Ta mo foro ka zivil pe iek than kai si pas,
ande sobe kai ka avel vera,
iek than kai ka avel veselia ta ka avel esmiro.
19Ta kana ka peren e krupe,
ka peren pe burdura, ta o foro ka avel sa zatrime.
20Blagosime sen tumen
kai thoven e simiche pasa o pai ta pasa e len
ta mukliaren e guruve ta e magarcho.
Currently Selected:
Isaias 32: BACHRO
Highlight
Share
Copy
Want to have your highlights saved across all your devices? Sign up or sign in
Biblia ande chib Romani © Sociedad Bíblica Chilena, 2018.
