Isaias 30
30
Te na uzdinpe ando Ejipto
1¡Tesko e chaurrenge kai ni kanden,
gia phenel o Del, ta kai mangen o sikadipe
ta ni puchen man, ta mangen te aven ucharde
a na katar mo duo, ta chiden o bilachipe
upral po bilachipe!
2Kai durion ta llan ando Ejipto,
ta ni puchen so phenav me,
ta llan te len zor katar o Faraon
ta gurudon tala e senka katar o Ejipto.
3A e zor katar o Faraon ka cherdol
lallao ta po than kai gurudon
tala e senka katar o Ejipto
ni ka llanen so ka cheren.
4Kana tumare glamne llene ka aven ando Soan,
ta ka aven tumare sudura ando Janes,
5saurrenge ka avel lallao katar o foro
kai ni mol lenge niso, ta kai ni pomozil len
ande niso, a samo anel lenge o lallao
ta anel lenge e nuzda.#Is 31.1-3; Jer 2.18,36.
6Poroka katar e zivirinie katar o Negev:
Ande phuv katar e burkania ta e nuzda,
katar likel e liona ta o liono, o sap ta o sap kai furial,
inllaren pe magarchoke zea po barvalipe,
ta po barvalipe inllaren le pe zea katar e deve,
llan kai iek foro kai ni mol lenge niso.
7O Ejipto samo gia ka pomozil,
goleke me phendem te achen esmiro.
8Goleke lla akana angla lende
ta pisisar ande iek lil gava sargo suno kai dikhlan
te sai achel e llivesenge kai aven mai angle,
te achel ostade sa e bursenchar.
9Soke gava foro ni kandel, von si chave kojamne,
chave kai ni kamle te asunel o zakono e Devleko,
10kai phenen golenge kai apogodin:
Na phenen amenge iek poroka chachuni,
den amenge iek orba lokhi,
phenen amenge iek poroka kojamni,
11len tumen katar o drom,
len amendar gole kai si o Santo katar o Israel.
12Goleke o Santo katar o Israel phenel gia:
soke ni thoden sama pe gava alav,
ta pachaien ando silnope ta ando bilachipe,
ta ande gala ezgode uzdisailen,
13goleke gava bilachipe ka avel tumenge
sargo iek phagipe minono, kai sai phagel sa
sargo eik phagipe kai llal pe iek zido baro
kai perel kana ni misli ta perel oma.
14Ta ka phagol sargo iek piri chikako
kai phagen le silnomaia ta ni achel iek kotor
te ane lea e iag katar o cher,
o te ikane pai katar o bunari.
15Soke gia phenda o Del o Gazda, o Santo katar o Israel:
Tumaro braduipe si te achen esmiro,
tumari zor ka avel te uzdintumen
ta te achen esmiro, a tumen ni kamlen
16ta phenden:
Iok, mai sukar ka nasa pe gra,
goleke tumen ka nasen.
Pe gra kai llan zurale ka prasten
goleke tumare dusmanura
ka llan pala tumende zurale.#Is 31.1.
17Iek ka chikil, a millono llene ka nasen,
panch ka chikin ta sa tumen ka nasen,
lligo ni ka achen korkorre
sargo iek kotor kas po burdo
sargo iek chiti phanglo pe iek kas po burdo.
Sovlia kai ka avel zao katar o foro
18Goleke o Del ka aduricharel te avel leke zalba tumendar, vou zelil te sikavel tumenge kai po volipe, soke o Gazda si iek Del katar o chachipe. ¡Blagosime sa gola kai aduricharen ande lete!
19Foro katar o Sion kai zivi ando Jerusalem, nikada ios ni ka rove, soke gua kai si leke zao ka tristolpe pala tute, kana ka asunel cho avazi kai moli tut, ka del tut anglal. 20O Del ka del tumen o marrno katar e duk ta o pai katar e nuzda, a nikada ni ka lel tumendar e llenen kai sikaven ta ka dikhen len tumare akhenchar. 21Ondaka ka asune pala tute gala alava:
Gava si o drom na bangaren ni karing o stingo ni karing e chachi. 22Ta ka phene kai si pogano o uchardipe rupuno kai si pe che dela ta lenge patave kai si pe lende cherde katar o sunakai ka chude len sargo iek kirpa pogani, ¡Like chuke avri! ka phene lenge. 23Ondaka o Del ka cherel te delpeke pe chi phuv kana ka thove e simiche, ta ka liken o pherdo lliu. Ande gua llive che guruva ka jan char ende bare umalia. 24Che guruva ta che magarchura kai radi lenchar e phuv ka jan e kuchorra chiste, kai chuden len upre te chistonpe. 25Ta upral pe suako burdo baro, ka aven lena ta ka fuliel pai ando llive katar o mundaripe, kana ka peren e zidura. 26Ta o chon ka klichil sargo o kham, ta o villelo e khameko ka avel efta droma mai but sargo efta khama ande iek, ando llive kana o del ka ulil iek kirpa po chindipe ta ka sastarel e duk kai vou cherda.
E duk katar e Asiria
27O anav e Devleko avel duratar,
leko mui phabol, ta si ando plameko iagako
kai phabarel, leke us si pherde joli
ta leki chib sargo e iag kai phabarel.
28Leko aburo, sargo pai kai ucharel sa,
ka resel llik kai e korr,
te sai chinol sa e phuvien
ande iek mreza kai zatril,
ta o salvari ka avel ando mui e phuviengo
te cherel len te kojadon.
29Ka avel tumen llilabipe
sargo ande riat katar e paskua,
ta ka veselilpe tumaro lio
sargo kana gua kai basalel o firo
ta llal karing o burdo e Devleko
ka o Zuralo katar o Israel.
30Ta o Del ka cherel te asundol
leko glamno avazi,
ta ka sikavel kai leko va si pharo,
jolinaia ta plamekoia kai phabarel,
baliavaia, bursindea ta krupe sargo barra.#Jue 5.4-5; Sal 18.7-15; Jab 3.3-15.
31Soke e Asiria kai dukhada iekhe kastea,
o Del pe avazea ka zatril la.
32Suako drom kai ka avel chaladini
e kastea katar o chachipe e Devleko,
ka asundon e panderura ta arpe,
ta ka marelpe lenchar ande iek baro maripe.
33Soke cherel but vreme kai si chinado e charoke
iek baro than anado ande phuv
ta si thode but kasta pe umpa e iagake,
ta o Del ka phurdel ta e balav
ka llal sargo asufre ta ka phabarel le.
Currently Selected:
Isaias 30: BACHRO
Highlight
Share
Copy
Want to have your highlights saved across all your devices? Sign up or sign in
Biblia ande chib Romani © Sociedad Bíblica Chilena, 2018.
