Eklesiastes 3
3
Suako ezgoda si la lako vreme
1Suako ezgoda si la lako vreme, ta sogo si pe phuv si le leko saiato.
2Si o vreme te biando,
ta si o vreme te mere.
Si o vreme te thove e simicha ande phuv,
ta si o vreme te chirde so thodan ande phuv.
3Si o vreme te mundare,
ta si o vreme te sastare.
Si o vreme te zatri,
ta si o vreme te lachare.
4Si o vreme te rove,
ta si o vreme te asa.
Si o vreme te ave zalosno,
ta si o vreme te chele.
5Si o vreme te rispi e barra,
ta si o vreme te chide e barra.
Si o vreme te abrasi,
ta si o vreme te na abrasi.
6Si o vreme te rode,
ta si o vreme te jasare.
Si o vreme te guruve,
ta si o vreme te chude.
7Si o vreme te pharrave,
ta si o vreme te suve.
Si o vreme te ache,
ta si o vreme te de orba.
8Si o vreme te voli,
ta si o vreme te murzi.
Si o vreme te mare tut,
ta si o vreme te avel pas.
9¿So dobil o manus kai gachin radil? 10Dikhlem o rado kai o Del mukla e manusenge te cheren. 11Sa cherda sukar ande po vreme ta dia len o mislo katar so si ostade, a o manus ni acharel so cherda o Del sar kana llelo angle leko rado llik kai o son.#Sal 139.17; Is 55.8-9; Ro 11.33.
12Me llanav kai e ezgoda mai sukar kai sai cherel o manus si te veselilpe ta te cherel o lachipe ande po zivoto, 13soke te ja ta te pia ta te dikha o lachipe kai del amen amaro rado, gua si soke o Del dia le amenge. 14Ta llanav kai sa so cherel o Del ka avel ostade, ta pe gua ni ka thodol niso ios, ta ni ka ikandol niso letar, ta goia ezgoda cherel la o Del, te sai den le liubao e manusa.#Sal 33.11. 15So saia omanglal akana si, ta so si te avel, omanglal saia. O Del cherel te avel pale so saia omanglal.
O bangipe pe gava zivoto
16Ios ezgode dikhlem pe gava zivoto, kote kai saia te avel e kris si o bangipe, a kote kai saia te avel o chachipe si o bilachipe. 17Goleke phenav kai o Del ka krisil e lache ta i e bilache, soke si iek vreme suako ezgodake kai mange, ta suako ezgodake kai chere.
18Ta i phenav kai e ezgode kai cheren e manusa, si te sai zumavel len o Del, ta te dikhen kai von si sargo e zivirinie. 19Soke so nakhen e manusa nakhen le i e zivirinie, gia sar meren e manusa isto gia meren e zivirinie, inai mai but o manus neko e zivirinia, soke sa ni mol le niso.#Sal 49.12,20. 20Ta sa resel kai iek than, sa si cherdo katar o prajo ta sa ka irilpe kai o prajo.#Jen 3.19; Job 34.15. 21¿Ko sai phenel kai o duo e manusengo llaltar upre, ta kai o duo katar e zivirinie fuliel chak tele ande phuv?#Ekl 12.7. 22Me llanav kai e mai lachi ezgode e manuseke si te veselilpe ande po rado, soke gua si leko chari, soke ¿ko ka sikavel leke so ka avel mapalal letar?
Currently Selected:
Eklesiastes 3: BACHRO
Highlight
Share
Copy
Want to have your highlights saved across all your devices? Sign up or sign in
Biblia ande chib Romani © Sociedad Bíblica Chilena, 2018.
