Deuteronomio 9
9
O Del ka zatril e forora katar o Kanaan
1Asunen, israelita:
Avilo o vreme tumen te nakhen o Jordan ta te dobin e phuvien kai si mai bare ta mai zurale tumendar kai si len bare zidura llik kai o miloso, 2E llene kai zivin kote si but ta bare sargo o porodo ka o Anak kai saia but baro ta tumen asunden e orba kai phendol: ¿Ko sai achel angla e chaurre katar o Anak o baro?
3Akana morabi te llanen kai o Del tumaro Gazda si kai llal angla tumende ta kai si sargo iek iag kai phabarel ta ka zatril len ta ka mukel ando lallao gole phuvien. Tumen ka traden len ta ka zatrin len oma, gia sar o Del phenda tumenge 4Kana o Del tumaro Gazda ka tradel angla tumende, na phenen ande tumaro lio: Pala amaro chachipe anda amen o Del te la gaia phuv, a o Del te tradia len si pala lengo bilachipe. 5Iok inai pala tumaro chachipe o katar cho lio lacho kai len lengi phuv, len la pala lengo bilachipe o Del traden len angla tu, ta te cherel e alava kai diaia kai o Abraam, kai o Isaak ta kai o Jakob 6Ta morabi te llanen kai inai ka tumen sen lache kai o Del del tumen te len gaia lachi phuv, soke tumen sen iek foro zurale soreko.
O foro katar o Israel ni kanden
Ek 31.18—32.35
7Tumen nikada te na bristaren tumen kai joliarden e Devle tumaro gazda po pusto. Sar kana likisten katar o Ejipto llik kana reslen pe gaia rig, suako drom ni kandien e Devle. 8Ta i po burdo Joreb cherden te joliaol o Del, pegachin jolailo kai mangela te zatril tumen. 9Kana me likistem po burdo te lav e table barrastune, e table katar e alava kai achilaia tumenchar, ta achilem kote po burdo saranda llive ta saranda racha ta ande gola llivesa ni jalem ta ni pilem niso.#Ek 24.18. 10Ondaka o Del dia man e dui table barrastune pisime E Devleke naiea, ta pe lende sea pisime sa e alava kai vou phendaia lenge po burdo, maskaral katar e iag, o llive kana sa chidinailam. 11Kana nakhle gola saranda llive ta saranda racha, o Del dia man e dui table barrastune, e table katar e alava, 12ta phenda mange:
Lla, fulie oma katar, soke o foro kai ikandan katar o Ejipto murisailo. Ta but oma likiste katar o drom kai me phendem lenge, cherde peke iek slika katar o sunakai biladino.
13Ta i phenda mange o Del: Dikhlan gale foro kai si zurale soreko. 14Le tut katar mo drom soke llav te zatriv len ta te ikanav katar e phuv lenge anava, a tutar ka cherav iek foro mai zuralo neko von ta mai baro.
15Kana fulistem katar o burdo, kai phabola, me anava ande me va e dui table katar e alava. 16A kana dikhlem kai tumen cherdena o bilachi angla o Del ta cherdena tumenge iek telcho katar o sunakai biladino gale ezgodaia kai cherden muklen o drom kai o Del phendaia tumenge te llan. 17Ondaka liem e dui table ta chudiem len katar me va ta phaglem len angla tumare akha. 18Mapalal diem changa angla o Del gia sar cherdema le omanglal ta ni jalem marrno ta ni pilen pai saranda llive ta saranda racha pala sa tumaro bilachi kai cherdena angla e akha e Devleke ta cherden le te joliaol. 19Me sema darano katar e joli e Devleki kai sikada pe tumende, pegachin kai mangela te zatril tumen, a iek drom mai but o Del asunda man. 20Ta i saia but joliariko e Aaronea ta mangela te zatril le, ta me molisailem pala le, 21mapalal liem o telcho kai tumen cherdena tumenge ta kai lea cherdena o bilachipe ta chudiem le ande iag, mapalal drobosardem le lligo ni cherdilo prajo, ta chudiem le ando len kai fuliela katar o burdo.
22Ta i ando Tabera, ande Masa ta ando Kibrot Jataava, tumen cherden e Devle te joliaol. 23Ta kana o Del bichalda tumen katar o Kades Barnea te llan te len e phuv kai vou diaia tumen, i kote ni kandien e Devle tumaro gazda ta ni pachaien le ta ni kandien leke alava.#Nm 13.25—14.38; Dt 1.23,26; Ebr 3.16. 24¡Sar kai pinllarav tumen ni kanden e Devle! 25Sar o Del phendaia kai ka zatril tumen, me achilen changenchar angla o Del saranda llive ta saranda racha, 26ta molisailem leke ta phendem leke: Devla, na zatrisar gale foro, kai si chiro, kai tu ikandan katar o Ejipto che zurale vastea. 27De tut golli katar che sluge o Abraam, o Isaak ta o Jakob. Na thov sama katar o zuralipe gale foroko, ni kai inai chache ni pe lengo bilachipe, 28te na phendol ande phuv katar ikandan amen:
O Del nasti cherda len te den ande phuv kai phendaia lenge kai ka del len ta sar murzila pe lende cherda len katar te sai mundarel len po pusto. 29A von si cho foro, si chire tu ikandan len katar o Ejipto bare zoriaia.
Currently Selected:
Deuteronomio 9: BACHRO
Highlight
Share
Compare
Copy
Want to have your highlights saved across all your devices? Sign up or sign in
Biblia ande chib Romani © Sociedad Bíblica Chilena, 2018.
