Deuteronomio 10
10
Pale achen pe iek alava neve
Ek 34.1-10
1Ondaka o Del phenda mange: Cher isto tu dui table barrastune isto gia sar sea e purve, ta cher iek arka kastuni, ta like po burdo te de Orba manchar. 2Me ka pisiv pe gala table isto e alava ka sea pisime pe purve table, gola kai tu phaglan, ta ka guruve len ande arka.
3Ta cherdem iek arka kastuni katar e akasia, ta cherdem e dui table barrastune ta likistem lenchar po burdo e duie tablenchar ande me va.#Ek 25.10; 1 R 8.9. 4Ta o Del pisisarda pe table e des alava katar so si te cheren, isto gia sar cherdaia le o purvo ka na dia orba tumenchar po burdo maskar e iag, kana sa chidinailen. Mande dia len, 5ta me fulistem katar o burdo ta mapalal thodem e table ande arka kai cherdema, gia sar o Del phendaia mange te cherav ta akana kote si.
6E israelitura lleletar katar o Beerot Bene Jaakan ta lleletar ando Mosera. Kote mulo o Aron, ta prajosarde le, ta pe leko than popoko achilo leko chaurro o Eleazar.#Nm 20.28; 33.38. 7Kotar lleletar ande Gudgoda ta katar e Godgoda lleletar ande Jotbata, e phuv kai si but pai. 8Ondaka ande gua vreme si kai o Del esvirisarda e vicha katar o Levi te inllarel e arka katar e alava e devleke te aven angla le te radin leke ta te blagosin ande leko anav llik allive. 9Goleke o levitura ni lie ni iek phuv te avel lengi, gia sar lie leke phlal, soke lengi phuv si o Del tumaro Gazda isto gia sar vou phenda le.
10Ta me sema po burdo saranda llive ta saranda racha, gia sar sema e purvo drom, ta i gaia drom o Del asunda man ta ni kamla te zatril tumen,#Ek 34.28. 11ta phenda mange:
Uste ta lla ta phir angla o foro, te sai den ta te len e phuv kai jalem sovel tumare puranenge kai ka dav len.
So mangel o Del te cheren
12Akana, israelita ¿so mangel o Del tumaro Gazda? Samo te den le liubao ta te llan pe sa leke droma, te volin le ta te blagosin le sa tumare liea ta sa tumare zivotoia, 13ta te kanden e alava e Devleke ta leke zakonura, te sai llal tumenge sukar. 14Thoven sama kai e Devleko tumaro gazda si o miloso ta o miloso e milosoko, e phuv ta sa so si ande late. 15A o Del mangla te ezbiril tumare puranen ta volisarda len ta mapalal esvirisarda lenge porodo, kai sen tumen maskar sa ogola forura sar tumen dikhen allive.
16Sirkunsidin e morchi katar tumaro lio ta na zuriaven ios tumare sore,#Dt 30.6; Jer 4.4; Ro 2.25-29. 17soke o Del tumaro Gazda si o Del e delengo ta o Gazda e gazdengo, o Del o baro ta zuralo, kai trubul te daran letar, kai sa e llene si leke sargo iek, ta ni bichindol.#2 Kr 19.7; Ech 10.34; Ro 3.11; Gl 2.6; Ef 6.9; 1 Ti 6.15; Apo 17.14; 19.16. 18O Del si chacho e llenenchar kai inai len dei ni dad ta e phlivlienchar ta kai volil e llenen kai aven katar aver phuvia kai zivin maskar tumende ta kai del len jape ta patave. 19Tumen ka volin e llenen kai aven katar aver phuvia soke i tumen sena sargo von kana zivina ando Ejipto.
20Den liubao e Devle tumaro gazda ta blagosin samo le, pala le ka llan ta ande leko anav ka jan sovel, 21vou morabi te avel cho blagosipe ta vou si cho Del, kai cherda gala bare ezgode tuia gala ezgode bara kai den dar kai che akha dikhle. 22Kana tumare purane avile ando Ejipto, sea samo eftavardes llene, a akana o Del tumaro Gazda cherda tumen te aven but sargo e cheraia e milosoke.#Jen 15.5; 22.17; 46.27; Ek 1.5.
Currently Selected:
Deuteronomio 10: BACHRO
Highlight
Share
Compare
Copy
Want to have your highlights saved across all your devices? Sign up or sign in
Biblia ande chib Romani © Sociedad Bíblica Chilena, 2018.
