Deuteronomio 7
7
Alava te na blagosin avere delen
Ek 34.11-17
1O Del tumaro Gazda ka cherel tumen te den ande phuv kai tumen ka len ta ka tradel angla tumende efta phuvien mai zurale tumendar:
E jititura, e Gergeseura, e amorreura, e kananeoura, e ferezeura, e jeveoura ta e jebuseura, 2Kana o Del tumaro Gazda ka cherel gale phuvien te peren angla tumende ta tumen kana ka dobin len, tumen morabi te chinaven len te aven zatrime ta te na achen lenchar pe nisavi orba ta te na avel tumenge zao lendar. 3Ta ni ka zinin tumen lenchar, ta te na zinin tumare chaurren o tumare chorren e ternenchar o e chaurrenchar katar gola llene 4soke von ka cheren tumare chaurren te durion katar o Del ta te blagosin avere delen, ondaka e joli e Devleki ka phabol pe tumende ta ka zatril tumen oma. 5So tumen morabi te cheren lenchar si te zatrin lenge altare, te zatrin sa lenge estatue ta te zatrin lenge slike katar e Asera ta ka phabaren lenge slike ande iag.#Dt 12.3. 6Soke tumen sen iek foro santo e Devleke tumaro gazda, o Del esvirisarda tumen maskar sa e forura katar e phuv te sai tumen aven leke iek foro ezbirime.#Ek 19.5-6; Dt 4.20; 14.2; 26.18; Tit 2.14; 1 P 2.9.
Iek foro santo e Devleke
7Te mangla tumen o Del ta te esvirisarda tumen, inai soke tumen sen e mai bari katar e phuvia, soke o chachipe tumen sen e mai minoni katar sa e phuvia. 8O Del ikanda tumen katar o Ejipto, kote kai tumen sena sluge ta pe zurale vastea ikanda tumen katar o va e Faraonoko, soke volil tumen ta mangla te cherel so phendaia tumare puranenge. 9Sikon akana kai o Del tumaro Gazda si o Del chachuno kai kana achel pe iek orba cherel la ta e zalba e llenenchar kai volil le ta arakhen leke alava llik milia viche, 10ta kai isto vou pochinel e lleneke kai murzil pe lete, ta zatril le ka zatril oma e llenen kai murzil pe lete isto vou ka pochinel leke.#Ek 20.5-6; 34.6-7; Nm 14.18; Dt 5.9-10. 11Goleke kanden e alava, e zakonura ta e alava kai akana dav tumen te cheren.
O blagosipe kana kanden
Lv 26.3-13; Dt 28.1-14
12Mapalal kana asunena gala alava kandena len ta cherena len, ondaka o Del ka cherel chachimaia e alava kai phenda tumare puranenge. 13Ka volil tumen, ka blagosil tumen ta ka cherel tumen te aven mai but llene, ka blagosil tumare churren, ta so del e phuv, tumaro lliu, tumari mol ta tumaro zeitino ta e minonen katar tumare guruvmien ta e stoke bakrenge, ande phuv kai tumare puranenge phenda kai ka del. 14Tumen ka aven blagosime mai but neko sa ogola phuvia, ni ka avel maskar tumende diskinia ni murus te na avel len minone, ta ni maskar che zivirinie murus o ni diskinie te na avel len porodo. 15O Del ka tradel tumendar suako nasualipe ta sa e bare muke gia sar llanen tumen bichalda po Ejipto, ni ka thovel len pe tumende pe ka ka thovel len si pe sa tumare dusmanura. 16A tumen morabi te zatrin sa e phuvien kai o Del tumaro Gazda ka thovel ande tumare va, te na avel tumenge zao lendar ta na blagosin lenge dela, soke gua ka avel tumaro jasardipe.#Dt 11.13-17.
17A tumen sai phenen ande tumaro lio: Gala phuvia si mai but neko amen, ¿Sar ka trada len? 18¡A na daran lendar! Den tumen golli so cherda o Del tumaro Gazda e Faraonea ta sa e ejipcionenchar, 19mislin tumen ande bare ezgode kai nakhle ta kai tumen dikhen, ta sar dikhona e bare ezgode Devlikane ta sar pe zurale vastea o Del tumaro Gazda ikanda tumen katar o Ejipto, ta isto gia ka cherel sa e phuvienchar katar tumen daran. 20Ta o Del tumaro Gazda ka bichalen bintivoria pe lende, lligo ni ka aven zatrime, gola kai achena o kai gurudile tumendar. 21Goleke na daran angla lende soke o Del tumaro Gazda o Del o baro ta zuralo si tumenchar. 22Sa poloke o Del ka tradel gale phuvien angla tu, tumen nasti ka zatrin len ande iek drom, soke but bariona e zivirinie dive kai si truial tumendar ta sai dena pe tumende. 23A o Del tumaro Gazda ka thovel gale phuvien ande tumare va ta ka phagel len zurale lligo ni ka aven zatrime.#Ek 7.8-12; 14.23-31; 23.27-30. 24Lenge charura ka del len ande tumare va, ta tumen ka cheren niko pe gaia phuv te delpe golli lendar niko lendar nasti ka achavel tumen lligo ni tumen ka zatrin len. 25Tumen ka phabaren lenge slike katar lenge dela, a te na len tumenge o sunakai o o rup kai ucharel lenge dela, te na pheren pe gava zumadipe, soke te cherena le avela iek ezgoda bilachi angla o Del. 26Goleke na inllaren ande tumare chera niso te na avela drago e Devleke, gia te na aven i tumen zatrime. Gola ezgode si chinade te aven zatrime, goleke morabi te dikhen gola ezgode sargo ezgode pokalime.
Currently Selected:
Deuteronomio 7: BACHRO
Highlight
Share
Compare
Copy
Want to have your highlights saved across all your devices? Sign up or sign in
Biblia ande chib Romani © Sociedad Bíblica Chilena, 2018.
