Deuteronomio 5
5
E des zakonura
Ek 20.1-17
1O Moises chidia sa e foro katar o Israel ta phenda lenge:
Asunen, israelita, e zakonura ta so si cheren ta e alava kai me phenav tumenge allive ande tumare kana, sikon len ta cheren len.
2O Del amaro gazda achilo pe iek orba amenchar po burdo Joreb. 3Ni cherda le samo amare puranenchar, cherda i le sa amenchar kai allive sam chidine kate. 4O Del dia orba tumenchar mui muiea, maskar e iag. 5Me sema ondaka maskar o Del ta tumen te sai phenav tumenge e alava e Devleke, soke tumen darana katar e iag ta ni likisten po burdo. Ta o del phenda:
6Mesem o Del cho gazda, kai ikanda tut katar e phuv katar o Ejipto, kote kai zivia sargo sluga.
Me sem o Del cho gazda kai ikandem tut katar o Ejipto, kote kai sana sluga. 7Te na avel tut aver dela angla ma.
8Na cher chuke ni iek del ni slike katar so si ando miloso, ta ni katar so si telal katar e phuv, ni katar so si ande paia kai si telal katar e phuv 9Na de changa angla lende, ta na de len liubao, soke me sem cho Del, zuralo, kai inai mange drago te blagosi averen delen, kai dukhavav o bilachipe e dadengo kai murzin pe mande, ta i lenge chaurren, ta i lenge unukonenge chaurre gola kai murzin pe mande, 10A dav mo volipe sa e porodoke kai volil man ta kai kanden me zakonura.#Ek 34.6-7; Nm 14.18; Dt 7.9-10.
11Na le e Devleko anav samo gia, soke vou ka dukhavel gole kai lel leko anav samo gia.
12De tut golli katar o sabado te avel dino e Devleke, gia sar o Del phenda chuke te chere. 13Sou llive ka radi ta ka chere sa so si te chere, 14A o sabado ni ka radi gua llive ka avel iek llive dino e Devleke cho Gazda. Na cher ni iek rado ande gua llive, ni cho chaurro, ni chi chorri, ni cho sluga murus ni cho sluga diskinia, ni cho gurou ni cho magarcho ta ni iek katar che zivirinie, ni o lleno kai radil chuke kai avel katar aver phuvia ta kai zivil ande tumare forura, gia i vou ta na radil sargo tu. 15De tut golli kai tu sana sluga ande phuv katar o Ejipto ta kai cho Del cho gazda ikanda tut kotar pe zurale vastea. Goleke o Del cho gazda phenda chuke te guruve o llive sabado.
16De liubao che dade ta che da gia sar o Del phenda chuke te chere, gia ka zivi but bursa ta te llal chuke sukar ande phuv kai o Del cho gazda del tut.
17Na mundar.
18Na kurvisao.
19Na chor.
20Na de orba kojamni avereki.#Ek 23.1; Mt 19.18; Mk 10.19; Lk 18.20.
21Na zelisar e diskinia avereki ni o cher avereko, ni leki phuv ni leko sluga, ni leki sluga, ni leko guruv, ni leko magarcho, ta niso so si avereko.
E foroki dar
Ek 20.18-26
22Gala si e alava kai o Del dia orba ando baro avazi, maskar e iag ta ande iek oblako thulo, kana sa sea chidine pasa o burdo. Mapalal ni phenda ios ta pisisarda len ande dui table barrastune kai dia len mande. 23A kana tumen asunden gua avazi kai likela katar o truniariko ta dikhlen o burdo ando plamiko iagako, sa tumen e birovura katar e viche ta e phure, avilen te den orba manchar 24ta phenden mange: Chachimaia o Del amaro gazda sikada amenge po baripe ta pi zor ta asundam leko avazi, kai likela po maskaral katar e iag. Allive llanglam kai o Del sai del orba e manusenchar ta von te na meren. 25Akana gaia bari iag sai phabarel amen. A te asunaia pale o avazi katar amaro Del amaro gazda o chachipe ka mera. ¿A soke te mera? 26Soke ¿So si o manus, te asunel o avazi e Devleko o llundo, kai del orba maskaral katar e iag, gia sar asundam le amen, ta te na merel? 27Mai sukar lla tu pase ta asun sa so Del amaro gazda ka phenel chuke, ta mapalal tu ka phene amenge so vou phenda chuke ta amen ka chera.
28Kana tumen dena orba manchar, o Del asunela so tumen phenena, ta ondaka phenda mange:
Asundem sa so phenel gava foro, ta pela mange drago. 29¡Gia sukar avela suako drom te mislinpe gia, ta te den man liubao suako llive, gia von ta lenge chaurre te avel len iek zivoto veselo! 30Lla ta phen lenge te irinpe kai pe chare 31A tu achi kate manchar, soke ka phenav chuke sa e zakonura ta so si te cheren ta e alava kai ka sikave len, te sai kanden len ande phuv kai ka dav len te avel lengi. 32Goleke dikhen te kanden so o Del tumaro Gazda phenda tumenge te cheren, te na durion pe chachi ta ni po stingo. 33Llan po drom kai o Del tumaro Gazda sikada tumen, te llal tumenge sukar ta te zivin but bursa ande phuv kai vou ka del tumen te avel tumari.
Currently Selected:
Deuteronomio 5: BACHRO
Highlight
Share
Compare
Copy
Want to have your highlights saved across all your devices? Sign up or sign in
Biblia ande chib Romani © Sociedad Bíblica Chilena, 2018.
