Deuteronomio 2
2
E bursa po pusto
1Mapalal llelamtar po pusto katar o drom katar e Mora e Loli, gia sar o Del phendaia mange ta but vreme phirdam truial e burdura katar o Seir. 2Ondaka o Del phenda mange: 3Tumen ia inllaren but vreme kai phiren truial e burdura irin tumen ando norte. 4Phen e foroke gia: tumen ka nakhen katar e phuv katar tumare phlal e chaurre katar o Esau, kai zivin ando Seir von ka daran tumendar. A tumen arakhen tumen.#Jen 36.8; Nm 20.14-21. 5Ta na maren tumen lenchar, soke me ni ka dav tumen ni iek kotor katar goia phuv, soke e burdura katar o Seir si e phuv katar e chaurre katar o Esau. Me diem la lenge. 6Tumen ka mangen lendar te bichinen tumenge o jape kai trubul tumen ta ka pochinen lenge ta i o pai kai ka pien. 7O Del tumaro Gazda blagosisarda tumen pe sa so cherden. Ande gala saranda burs o Del saia tumenchar ta arakhla tumen pe gava baro pusto ta niso ni trubusarda tumen.
8Mapalal durilam katar e phuv katar amare phlal kai si e chaurre katar o Esau kai zivin ando Seir ta llelam truial katar o drom katar o Araba katar o Elat ta o Ezion Geber ta irisailam ta istardam o drom katar o pusto katar o Moab. 9Ondaka o Del phenda mange: Na amisao ta na martut e moabitenchar soke si katar e vicha e Loteki, ta ni ka dav tut ni iek kotor katar lengi phuv, soke e phuv katar o Ar diem la lenge.#Jen 19.30-38; Nm 21.10-20. 10Ande gaia phuv omanglal zivina e Emitas, kai sea llene bare ta baro sueto ta bare sargo e chaurre katar o Anak. 11E llene mislina kai von sea refaitas, a e moabite ikharena len emitas. 12Ande gaia phuv katar o Seir omanglal zivina e Joreosura, a e chaurre katar o Esau tradie len petar ta von zivisarde ande lengi phuv gia sar cherde e israelita ande phuv kai o Del dia len. 13Ta akana phenda o Del, akana thoven tumen te piren ta nakhen o pai katar o Zered. Ta ondaka nakhlam o pai.
14Ta katar likistam katar o Kades Banea llik o llive kai nakhlam o pai katar o Zered, nakhle tranda ta ojto burs. Ande gua vreme mulia sa e vicha katar e llene kai marenape kai saia ando pero, gia sar o Del jalaia la sovel.#Nm 14.28-35. 15Ta i o va e Devleko pela pe lende lligo ni zatrisarda len.
16Ta avilape kai kana mule sa e llene kai marenape maskar o foro, 17O Del dia manchar orba ta phenda mange: 18Allive tu ka nakhe e phuv katar o Moab ta ka lle karing o Ar, 19a kana ka malado e chaurrenchar katar o Amon na amisao lenchar ta na mar tut lenchar, soke ni ka dav tut ni iek kotor katar lengi phuv, soke e phuv dien la e chaurrenge katar o Lot. 20Ta i gaia phuv pinllarena la kai saia katar e refaitura, soke omanglal zivisardea kote e refaitura, kai e amonitura ikharena len zamzumitura. 21Von sea iek foro baro ta bute llenengo ta manusa bare sargo e chaurre katar o Anak. 22Ta o Del cherda isto gia sar cherda e chaurrenchar katar o Esau kai zivina ando Seir ta kai zatrisarde e Joreosuren te sai zivin kote. 23Isto gua nakhle e jeveosura, kai zivina ande forichura pasa e Gasa ta kai zatrisarde len e filisteusura, kai avilea katar e Kreta ta achile kote te zivin. 24¡Aven phenda o Del, thoven tumen te phiren ta nakhen o pai katar o Arnon! Me ka cherav te peren ande tumare va amorreura o Sijon, kai si o charo katar o Jesbon ta leke phuvia. ¡Nakhen ande lengi phuv ta maren tumen lenchar! 25Allive ka cherav angla tumende sa e forura katar e phuv te izdran daratar. Kana ka asunen kai den tumari orba ka thovenpe te izdran ta e dar ka avel pe lende angla tumende.
O Israel dobil e charo katar o Sijon
Nm 21.21-30
26Katar o pusto katar o Kademot bichaldem poroka e charoke katar o Jesbon pala nesave lene, te phenav leke lachimaia gaia orba: 27Misliman te nakhav katar chi phuv katar o drom o baro ta te na dodiu ni so katar chi phuv. 28Ka pochina chuke lovenchar o jape kai trubula amen ta i o pai kai ka pia. Samo mangav tutar te muke amen te nakha phirindo, 29gia sa mukle amen te chera e chaurre katar o Esau kai zivin ando Seir ta e moabite kai zivin ando Ar. Morabi te nakha o Jordan ta te ava kai e phuv kai o Del amaro gazda ka del amen.
30A o charo Sijon ni mukla amen te nakha katar pi phuv, soke o Del tumaro Gazda cherda vou te na mukel amen, te sai thovel le ande tumare va, gia sar si llik akana.
31Ondaka o Del phenda mange:
Akana dav tut o Sijon ta sa leki phuv lla ta lela chuke.
32O Sijon likisto te maladol amenchar sa pe boñikonenchar, te sai marelpe amenchar ando Jajas. 33A o Del amaro gazda cherda le te perel ande amare va ta dobisardam le, leke chaurren ta sa leke boñikonen. 34Ondaka liam sa lenge forura ta sa zatrisardam sa lenge forura ta lenge murusen, lenge diskinien ta i lenge minonen. Ni muklam nika llundo. 35Samo liam amenge e zivirinien ta e ezgode kai si kuch kai maladam ende forura kai liam. 36De katar o foro katar o Aroer, kai si pasa o pai katar o Arnon ta o foro kai si ande umal llik o Galaad, ni saia foro te na sel katar amare va, sa e forura o Del amaro gazda dia len amenge. 37Samo phuvia kai ni lliam si gala:
E phuv katar e amonitas sa e phuv katar o pai katar o Jabok, e forura kai si pe burdura ta sa ogola phuvia kai o Del amaro gazda ni phenda amenge te la.
Currently Selected:
Deuteronomio 2: BACHRO
Highlight
Share
Compare
Copy
Want to have your highlights saved across all your devices? Sign up or sign in
Biblia ande chib Romani © Sociedad Bíblica Chilena, 2018.
