Deuteronomio 1
1
O Moises del orba e foroke
1Gala si e alava kai o Moises dia sa e israelenge kana sea po pusto, karing likel o kham katar o pai katar o Jordan, ando Araba, angla o Suf ta maskar e phuv katar o Paran, o Tofel, o Laban, o Jaserot ta o Dizajab. 2Katar o burdo Joreb llik ando Kades Barnea si desuiek llive te ave te lla po drom kai llal karing o burdo Seir 3O llive o purvo katar o chon desengo katar o burs saranda o Moises dia orba e israelenge sa so o Del phendaia te cheren,#Nm 21.21-35. 4Mapalal kana dobisardaia e Sejonne, charo katar e amorreura kai zivila ando Jesbon ta e Ogne, charo katar o Basan, kai zivila ando Astarot, ande phuv katar o Edrei. 5Katar gaia rig katar o Jordan, ande phuv katar o Moab o Moises dia gala alava:
6O Del amaro Gazda dia amen gala alava ando Joreb: Tumen achilen but vreme ande gava burdo. 7Chiden tumare ezgode ta llan pe burdura katar e amorreura ta sa ande lenge phuvia, ando Araba e phuv katar e burdura, ande umalia, ando Negeb, pasa e mora, ande phuv katar e kananeosura ta o Libano, llik kai o baro pai katar o Eufrates. 8Me dien tumen e phuv. Llan ta len e phuv kai me o Del jalem sovel kai ka dav la tumare puranenge, e Abraameke, e Isaakeke ta e Jakobeke ta lenge porodoke mapalal lendar.
Thoven krisaria
Ek 18.13-27
9Ande gua vreme me diem tumenge orba ta phendem tumen tumenge: Me korkorre nasti inllarav tumen. 10O Del tumaro Gazda baria da tumen ta akana tumen sen but sargo e charaia e milosoke. 11¡O Del o gazda tumare puranenge te cherel tumen milia droma mai but neko so sen akana ta te blagosil tumen prema e alava kai dia tumen! 12A me korkorre, nasti inllarav gava pharipe te lacharav sa tumare brige ta tumare brasnie. 13Goleke ezbirin katar suako vicha llene bizai ta llangle te sai me thovav len te aven birovura pe tumende.#Nm 4.14-17.
14A tumen phendem mange:
Amenge si sukar so phendan.
15Ondaka liem katar suako vicha tumendar e llenen mai bizai ta llangle te gazdarin pe tumende pe milia pe stotina pe pinda ta pe des ta aver te gazdarin pe tumare viche. 16Ta phendem tumare llenenge kai krisin gala alava: Thoven sama saurrenge ta krisin len chachimaia, pe gachin tumare llenenge ta i e llenenge kai aven katar aver phuvia. 17Ta ka chinen kris chinen la chachimaia saurrenge i e chorrenge ta i e barvalenge, te na daran nikatar soke e kris si e Devleki. Ta e kris kai tumen nasti chinen anen la mande ta me ka asunav.
18Ande gua vreme phendem tumenge katar suako ezgoda sar te cheren la.
O rado katar e desudui llene kai llele te dikhen e phuv po chorial
Nm 13.1—14.4
19Kana likistam katar o Joreb, llelam karing e burdura katar e amorreura, ta gia kandiam so phenda amenge o Del amaro gazda. Phirdam sa gua baro ta darano pusto kai tumen dikhlen, lligo ni avilam ando Kades Barnea. 20Ondaka phendem tumenge:
Avilam kai e burdura katar e amorreura, kai o Del amaro gazda del amen. 21O Del, tumaro Gazda, del tumen gaia phuv. Llan angle ta len la gia sar phenda o Del o gazda tumare puranenge. Na daran ta na jasaren tumari zor. 22A tumen avilen mande ta phenden mange:
Avela sukar nesave llenen amendar te llan mai angle te dikhen gaia phuv, ta mapalal te phenen amenge katar savo drom morabi te lla ta ande save forura sai ka da.
23So tumen phendem mange avila mange drago, ta ondaka ezbirisardem desuduie llenen tumendar, iek katar suako vicha, 24ta von llele kai e phuv kai si pe burdura ta avile kai e umal katar o Eskol, ta phirde sa e phuv.#Nm 13.23-24. 25Mapalal lie ande pe va e septelia katar e phuv ta ande len amende ta phende amenge:
E phuv kai del amen o Del amaro gazda si but lachi. 26A tumen ni kamlem te llan ta ni kandien e alava kai o Del amaro gazda dia tumen, 27ta ande tumare chare thoden te den orba ta phenden:
O Del ni volil amen. Vou kanda amen katar o Ejipto samo de thovel amen ande va katar e amorreura ta te zatril amen. 28Ta akana ¿kai ka lla? Amare llene thode e dar ande amare lie ta phenen kai ande goia phuv si llene mai zurale amendar ta mai bare neko amen, ta bare forura ta kai truial bare zidura llik ando miloso. Ta i kote dikhlam e chaurren katar o Anak.
29Ondaka phendem tumenge:
Achen esmiro. Na daran lendar. 30O Del tumaro Gazda llal anglal tumendar ta ka marelpe pala tumende, gia sar cherda le ando Ejipto 31ta po pusto. O Del tumaro Gazda lia tumen ande pe va pe sa o drom kai phirden lligo ni avilen kate, gia sar lel iek dad pe chaurre ande pe va. 32A tumen ni avila tumen vera ando Del tumaro Gazda, 33kai llala angla tumende te ezbiril e rig kai te inzaren tumare chare. Orachaia iagaia sikavela o drom katar saia te llan, ta o llivesea sikavela o drom iekhe oblakoia.
O Del joliaol e israelenchar
Nm 14.20-35
34Ta kana o Del asunda tumare alava, jolailo but ta jala gala sovel: 35Ni iek lleno tumendar ka dikhel gaia lachi phuv kai diem mo alav kai ka dav tumare puranenge. 36Samo ka dikhel la o Kaleb, chaurro katar o Jefune. Vou ka dikhel la, ta le ta leke porodo ka dav e phuv kai ka thoven po porrno, soke llele chachimaia pala o Del.
37Ta pala tumari dos, o Del jolailo manchar ta phenda mange: Ta i tu nika de ande goia phuv. 38Pe cho than ka del gua lleno kai pomozil tut o Josue, chaurro katar o Num. Dele zor, soke vou si kai ka del e phuv kai o Israel. 39A tumen kai pachana kai tumare dusmanura ka len tumare diskinien ta tumare minonen, gala minone kai ni llanen so si o bilachipe ta o lachipe von si kai ka den ande phuv. Me ka dav len e phuv. 40A tumen ¡irin tumen po pusto!, ¡llan pale kai e Mora e Loli!
Maren e israelen
Nm 14.39-45
41Ondaka tumen phenden mange: Cherdam o bilachipe e Devleke, a akana ka lla te mara amen gia sar o Del phenda amenge te chera. Ta lacharden tumen te maren tumen ta mislina kai ni ka avel tumenge but rado te liken po burdo. 42A o Del phenda mange te phenav tumenge: Na llan te maren tumen. Na thoven tumen an de va katar tumare dusmanura te dobin tumen, soke me ni sem tumenchar.
43Me phendem tumenge, a tumen ni thoden mange sama, ta ni kandien e Devle, ta barimaia likisten po burdo. 44Ondaka e amorreura, kai zivi pe gola burdura, llele te malaven tumen ta sargo bindivoria, llele pala tumende ta dobisarde tumen ando Seir ta i ando Jorma. 45Ta ka irisailen ta rovden angla o Del, a vou ni asunda tumaro roipe. 46Goleke saia pegachin vreme te achen te zivin ande phuv katar o Kades.
Currently Selected:
Deuteronomio 1: BACHRO
Highlight
Share
Compare
Copy
Want to have your highlights saved across all your devices? Sign up or sign in
Biblia ande chib Romani © Sociedad Bíblica Chilena, 2018.
