Deuteronomio 16
16
E slava katar e paskua
Ek 23.14-17; 34.18-24
1Kana ka avel o chon katar o Abib ka chere e paskua e Devleke cho gazda, soke ando chon katar o Abib ikanda tumen orachaia o Del tumaro Gazda katar o Ejipto.#Ek 12.1-20,31,42; Lv 23.5-8; Nm 26.16-25.
2Ta ande paskua ka de guruva ta bakre kurbano Devle tumaro gazda, po than kai vou ezbirila de thovel po anav.
3E zivirinia kai ka den la kurbano ka jan la e marrnea kai pe lete levadura. Efta llive ka jan marrno kai pe lete inai levadura, kai si o marrno dukhengo, soke saia te liken katar o Ejipto but sigardo, gia so tumen zivina, ka den tumen golli katar o llive kai likisten katar o Ejipto. 4Ande gala efta llive morabi te na dikhol e levadura ande sa tumari phuv ta katar o mas kai del kurbano o purvo llive pasa racha morabi te na achel niso thiarinake rano. 5Nasti ka den kurbano ande varesavo foro kai o Del del tumen, 6samo po than kai o Del tumaro gaszda ezbirila te thovel po anav, morabi te del le pasa racha kana perel o kham kai si o vreme kai tumen likisten katar o Ejipto. 7O mas kai ka den ka peken le ta ka janle po than kai o Del tumaro Gazda ezbirila ta thiarinako rano ka irin tumen kai tumaro cher. 8Sou llive ka jan marrno kai pe lete inai levadura ta o eftato lliv ka avel iek slava ando liubao e Devleke tumaro gazda, ande gua llive ni ka cheren ni iek rado.
9Kana ka lline efta semane katar thode te chiden o lliu, 10Ka cheren e slava katar e semane ando liubao e Devleko tumaro gazda ta ka den tumare ofrende prema sar o Del blagosisarda tumen.#Lv 23.15-21; Nm 28.26-31. 11Ta ka cheren slava angla o Del tumaro Gazda, tu, cho chaurro, chi chorri, cho sluga murus ta chi sluga diskinia, o levita kai zivil ande tumare forura ta o lleno kai avel katar aver phuvia, o lleno kai inai le dei ni dad ta e phivli kai si maskar tumende, po than kai o Del tumaro Gazda ezbirila te thovel po anav. 12Den tumen golli ka i tumen sena sluge ando Ejipto, goleke ka kande ta ka guruve sa gala zakonura.
13Kana ka gotovin te chiden tumaro lliu ta te kanen e drak ka cheren efta llive e slava katar e cherorra e patrenge.#Lv 23.33-36,39-43; Nm 29.12-38. 14Veselin tumen ande gaia slava tumare chaurrenchar ta tumare slugenchar ta e levitonenchar, ta i e llenenchar kai aven katar aver phuv ta e phivlienchar kai zivin ande tumare forura. 15Efta llive ka chere slava ando liubao e Devleko tumaro gazda po than kai o Del ezbirila soke o Del tumaro Gazda ka blagosil tumen pe sa tumare septelie ta pe sa so thovena tumare va te radin, ta ka aven chachimaia vesele.
16Trin droma ando burs ka aven sa e murus angla o Del tumaro Gazda po than kai vou ezbirila ta pe ogola slave: katar e marrne kai inai pe lende levadura ta pe slava katar e semane ta pe slave katar e cherorra e kastenge. Niko ni ka avel chuche vasdengo, 17Suako lleno ka anel pi ofrenda prema sar o Del blagosisarda le.
Sar morabi te chindol e kris
18Thoven krisaria ta llenen kai gazdarin pe sa e forura kai o Del tumaro Gazda ka del suakone vicha, te sai krisin e foro chachimaia. 19Na bangar o chachipe, na le sama sarsi e manusa na bichindo te chine bange iek kris gaia ezgoda korravel e akha katar e bazai ta muril e alava katar e chache. 20O chachipe ta samo o chachipe pala gua ka llan, te sai zivin ta te len e phuv kai o Del tumaro Gazda del tumen.
21Ni ka bariaren iek kas e deleke kai ikhardol Asera ta na thoven le pasa o altar e Devleko tumaro gazda. 22Ta na vazden barra te blagosin len, pe gala ezgode murzil o Del tumaro Gazda.#Ek 23.24; Lv 26.1.
Currently Selected:
Deuteronomio 16: BACHRO
Highlight
Share
Compare
Copy
Want to have your highlights saved across all your devices? Sign up or sign in
Biblia ande chib Romani © Sociedad Bíblica Chilena, 2018.
