Echos 26
26
O Pablo chacharelpe angla o Agripa
1Ondaka o Agripa phenda e Pabloke:
Sai chachare tut.
O Pablo vazdia po va ta phenda gia: 2Me sem veselo kai dav orba angla tu, charo Agripa, te sai chacharav man katar sa e dos kai thoven pe mande e judiura, 3ta mai but soke tu pinllare sa e zakonura e judionenge, ta llane save orbe da maskar amende. Goleke mangav tutar te de tut o vreme ta te asune man.
4Sa e judiura llanen sar zivisardem maskar lende ande mi phuv ta ando Jerusalem sar kana sema terno. 5Ta i llanen, ta te kamen sai phenenle, kai me sem fariseo, goia si e sekta kai si la mai but zakonura katar amaro pachape. 6Ta akana thoden man ande kris isto cheres o pachape kai si man ande so phenda o Del amare puranenge. 7Amare desudui viche Israeleke aduricharen te cherdol so phenda o Del kana dia po alav, ta goleke blagosin le ta radin leke o ollivesea ta orachaia. Ta isto pala so adurichara, charo Agripa, akana e judiura dosaren man. 8¿Soke tumen ni pachan kai o Del llungavel e mulen?
9Isto me omanglal misiva kai saia te zatriv e llenen kai pachana ando Jesus katar o Nazaret, 10ta gia cherdem le ando Jerusalem ta die man pi volia e gazda e poponenge, ta thodem ande rubie bute llenen kai pachana ando Jesus; ta kana mundarena len, me phenava te cheren le. 11But droma marava len te phenen pe zor kai ni pachan, Ta cherava le ande sa e khanllira e judionenge, ta sema gia joliariko lenchar kai llava te marav len i ande aver phuvia.#Ech 8.3; 22.4-5.
12Ta isto goleke llava karing o Damasko, soke bichalda man e gazda e poponenge. 13A e dromea, charo Agripa, po dopas e lliveseko, dikhlem iek villelo, mai zuralo neko o villelo e khameko kai klichisarda truial mandar ta e llenendar kai llana manchar. 14Ta sa pelamtar pe phuv, ta asundem iek avazi kai phenela mange ande chib e judionengi:
Saulo, Saulo, ¿Soke lla pala ma te mareto manchar? Dukhave isto tu tut, sargo te chalave e sorea ande iek zido. 15Ondaka phendem:
¿Ko san, Gazda? O Gazda phenda mange:
Me sem o Jesus, isto gua kai tu rode le te mareto lea. 16Uste ta thov tut pe porrne, soke avilem tute te radi mange ta te de e orba chachi katar so dikhlan akana ta katar so si te dikhe mandar. 17E judiura ta gola kai inai judiura ni ka cheren chuke niso, ta bichalav tut lende. 18Te putare lenge akha te na phiren ios ando truniariko, ta te llan ando villelo; te na gazdaril pe lende o Satanas, ta te llan pala o Del; te pachan ande mande ta gia te len o prostipe ta te aven katar o santo foro e Devleko.
19Goleke, charo Agripa, gua kai sikadilo mange katar o miloso sargo ando suno, me kandiem le, 20ta mai anglal phendem e orba e llenenge kai sea ando Damasko, ta mapalal e llenenge katar o Jerusalem ta e llenenge katar sa e Judea, ta i e llenenge kai inai judiura, ta ikharava len te keimpe ta te irinpe kai o Del, ta te cheren lache ezgode te achardol lenge kai sea keime.#Ech 9.20,28-29. 21Pala goia ezgoda, e judiura phangle man ando cher e Devleko ta mangena te mundaren man. 22A o Del pomozisarda man ta dia man zor llik kate, ta dav iek orba saurrenge, minonenge ta i barenge. Me ni phenav lenge aver orbe, samo me phenav lenge kai e poraukura ta o Moises phende so saia te avelpe: 23#Is 42.6; 49.6.kai o Mesias saia te merel, a kai ka merel ta mapalal ka avel o purvo lleno kai ka ustel katar o meripe, ta kai ka avel sargo o villelo ando truniariko amare foroke ta i ogole foronenge.#1 Kor 15.20.
O Agripa del orba
24Kana o Pablo chachardape ta dia goia orba, o Festo urkisarda:
¡So san dilo, Pablo! Kai pe gachin chiti dilailan.
25A o Pablo phenda:
Ni sem dilo, glamno Festo; so me phenav inai dilipe ta si o chachipe. 26Etalo kote o charo Agripa kai pinllarel but gala ezgode, ta goleke dav gala orbe bi darako angla le, soke llanav kai i vou llanel gala ezgode, soke inai ezgode kai avilepe ande iek than gurudino. 27¿Pacha so phende e poraukura? Me llanav kai pacha.
28O Agripa phenda leke:
¿So misli kai ka chere man kristiano ande gia cherricha vreme?
29O Pablo phenda:
Te avela ande but vreme o ande cherricha vreme, te mangela o Del na samo tu, i sa e llene kai asunen man allive, me voliva te aven sargo me, samo kai bi gale lanchonenchar.
30Ondaka ustilo o charo, o sudo, o Berenise ta sa e llene kai besena kote, 31ta llele pe iek rig te denpe orba. Ta phenena maskar pete:
Gava lleno ni cherda niso te mundaren le. Inai soke te avel ni ande rubie.
32A o Agripa phenda e Festoke:
Sai mukliardama gale llene, te na manglaia isto vou te chinel leke e kris o charo.
Currently Selected:
Echos 26: BACHRO
Highlight
Share
Compare
Copy
Want to have your highlights saved across all your devices? Sign up or sign in
Biblia ande chib Romani © Sociedad Bíblica Chilena, 2018.
