Echos 25
25
O Pablo angla o Festo
1O Festo avilo te thovelpe sudo ande Sesarea ta pala e trin llive llelo ando Jerusalem. 2Kote e gazda e poponenge ta e judiura mai asunde llele lete te dosaren e Pablo. 3Mangle letar iek sebapi te phenel te inllaren e Pablo ando Jerusalem. A so von mangena te cheren saia te mundaren le po drom; 4A o Festo phenda kai o Pablo ka achel phanglo ande Sesarea ta kai vou ka llal incha oma. 5Ta phenda lenge:
Goleke tumare llene si te llan manchar ande Sesarea, ta gua lleno te cherda varesavo bilachipe, kote sai ka dosaren le.
6O Festo achilo ando Jerusalem ojto llive ios, ta mapalal irisailo ande Sesarea. Thiarinako beslo pe pi estolicha ando cher kote kai chinen e krisa, ta phenda te inllaren e Pablo. 7Kana o Pablo dia andre, e judiura kai avilea katar o Jerusalem thode te dosaren le katar but ezgode bilache a nasti sikade kai o Pablo saia dosalo katar so von phenena.
8A o Pablo chacharelape ta phenela:
Me ni cherdem ta ni phendem nisavo bilachipe katar o zakono e judionengo ni katar o cher e Devleko ni katar o charo e rromanonengo.
9A sar o Festo mangela te achel lacho e judionenchar, puchla e Pablo:
¿Mange te lla ando Jerusalem ta incha te chinav chuke e kris?
10O Pablo phenda:
Me sem ando cher kai chinen e krisa kai si katar o charo e rromanonengo, kate morabi te chinen mange e kris. Tu llane kai me ni cherdem nisavo bilachipe e judionenge. 11Te si te merav pala varesavo bilachipe kai cherdem, mundaren man; a te inai chachipe gala ezgode kai dosaren man, niko nasti del man ande lenge va. Me mangav te chinel mange e kris isto o charo.
12Ondaka o Festo dia orba e llenenchar kai phenena leke so te cherel, ta mapalal phenda e Pabloke:
Sar manglan te chinel chuke e kris o charo, isto kai o charo ka lla.
O Pablo angla o charo Agripa
13Nakhle nesave llivesa, ta o charo o Agripa ta o Berenise llele ande Sesarea te den orba e Festoia. 14Sar achile kote nesave llivesa, o Festo dia e Pabloki orba e charoke, ta phenda leke:
Kate si iek lleno kai o Feliks phangla le. 15Ta Kana sema ando Jerusalem, e gazda e poponenge ta e phure e judionenge phende mange katar so dosaren le, ta mangena mandar te phenav te mundaren le. 16Me phendem lenge kai e sudura ande Roma inai sikade te chinaven o meripe nikake soke morabi te aven kote o dosalo ta gola kai dosaren le, te sai chacharelpe katar so dosaren le. 17Goleke kana von avile kate, me ni jasardem o vreme, ta thiarinako beslem pe mi estolicha ando cher kai chinen e krisa ta phendem te anen gole llene. 18A e llene kai avile te dosaren le ni phende letar nisavo bilachipe kai me misliva kai ka phenen. 19Ta so phenena letar te dosaren le sea samo ezgode katar o pachape, ta katar iek kai ikhardola Jesus kai mulo ta kai o Pablo phenel kai akana si llundo. 20Ta sar me ni llanava so ka cherav ande gala ezgode, puchlem e Pablo dal mangela te llal ando Jerusalem te chinen leke e kris katar gala ezgode. 21A vou mangla te chinel leke e kris o charo, ta phendem te achel phanglo lligo ni ka bichalav le tute.
22Ondaka o Agripa phenda e Festoke:
I me mangav te asunav gole llene.
A o Festo phenda leke:
Isto thiara ka asune le.
23Thiarinako, o Agripa ta o Berenise avile ta die barimaia andre ande soba, ta die lenchar i e gazda e boñikonenge ta e mai asunde llene e foroke. Ta o Festo bichalda te anen lete e Pablo, 24ondaka o Festo phenda:
Charo Agripa, ta sa tumen kai sen chidine amenchar:
Etalo kote gua lleno. Sa e judiura avile mande te dosaren le sar cherde le ando Jerusalem ta i kate ande Sesarea, ta samo urkin ta mangen me te phenav te mundaren le. 25A me sar acharav kai ni cherda niso te mundaren le, ta sar isto vou mangla te chinel leke e kris o charo, goleke me manglem te bichalav le tute. 26A sar inai man so te pisiv e charoke, anav le tumende, ta mai but tute, charo Agripa, ta gia kana tumen ka puchen le ka llana letar mai but ta gia ka avel man so te pisiv e charoke. 27Soke avela iek dilipe te bichaldol iekhe phangle ta te na phendol katar so dosaren le.
Currently Selected:
Echos 25: BACHRO
Highlight
Share
Compare
Copy
Want to have your highlights saved across all your devices? Sign up or sign in
Biblia ande chib Romani © Sociedad Bíblica Chilena, 2018.
