Echos 27
27
Bichalen e Pablo ande Roma
1Kana mangle te bichalen amen ande Italia, o Pablo ta aver llene kai sea phangle die len kai iek kapitan kai ikhardola Julio, vou saia katar e boñikura kai ikhardona e Charoke. 2Likistam ande iek llimia kai saia katar o Adramitio ta llala karing e forura kai si pasa e mora katar e Asia. Amenchar saia i o Aristarko, kai saia katar e Tesalonika, foro katar e Masedonia. 3Thiarinako avilam ando Sidon, kote o Julio avilo lea lacho, soke mukla le te llal kai pe amala ta mukla len te den le vareso. 4Llelamtar katar o Sidon ta nakhlam pe mora pasa o Chipre, soke e balav chalavela angla e llimia. 5Nakhlam pasa e Silisia ta pasa e Panfilia ta avilam ande Mira, iek foro katar e Lisia.
6O kapitan e boñikonengo malada kote iek llimia kai saia katar e Alejandria kai llala karing e Italia ta cherda te lla ande goia llimia. 7Llelam poloke but llivesa ta dia amen but rado te ava angla o Knido. Ta sar e balav chalavela anglal nakhlam angla o foro o Salmon ta nakhlam truial katar e Kreta. 8Llelam sa pasa e phuv ta dia amen but rado te lla ta avilam ande iek foro kai ikhardola Lache puertura, kai si pasa o foro o Lasea.
9Jasardam but vreme ta saia amenge dar te lla ios pe mora soke avela o viend, goleke o Pablo phenda lenge:
10Manusalen, acharav kai amaro drom pe mora si but darano, ta sai jasara e llimia ta i so si andre, ta i sai mera.
11A o kapitan katar e boñikura thoda mai but sama e gazdake ta e kapitaneke katar e llimia neko e Pabloke. 12Ta sar kote kai achilea ni saia lacho te nakhen o viend, but llene lendar phende kai saia mai sukar te llantar ta te zumaven te resen ande Fenisia, iek foro katar e Kreta kai si pasa e mora ta leke dui riga den karing o nordeste ta karing o sudoeste, ta mangena te nakhen kote o viend.
E Bari balav pe mora
13Kana dikhle kai iek balav phurdela poloke katar o sur, llele pe mora sa pasa e phuv katar e Kreta. 14A but oma avili iek bari balav katar o nordeste ta chalada ande llimia, 15ta e balav cherda te llaltar e llimia pe iek rig ta sar nasti cheraia te achel e llimia karing e balav, muklam te inllarel amen. 16Nakhlam pala iek isla kai ikhardol Kauda, kote ni phurdela gia zurale e balav, ta dia amen but rado te istara e llimia mai minoni kai si nuzdake. 17Ta kana e llimia saia andre phanglela solenchar te achel mai chapeni e llimia e bari. Mapalal sar saia lenge dar te na achen achadine ande chisai kai phenen lake Sirte, mukliarde o chiti e balaviake ta mukle te inllarel len e balav. 18Thiarinako e balav pale phurdela zurale, ta thode te chuden ande mora so saia andre ande llimia. 19Ta pala e trin llive chudie sa e sole kai cherena te bangarel e llimia. 20Nakhle but llivesa ta ni dikhilo ni o kham ni e cheraia, ta prema sar phurdela e balav mislia kai ka mera.
21A sar nakhlo but vreme ta ni jalam niso, o Pablo ustilo maskar sa e llene ta phenda:
Manusalen, avilaia mai sukar te thodena mange sama ta te na likistama katar e Kreta, gia ni nakhlama gaia nuzda. 22A akana na jasaren tumaro pachape, soke ni iek tumendar ni ka merel, samo e llimia ka jasaol. 23Ariat avilo mande iek suecho kai bichalda le o Del kai me sem leko ta kai radiu leke, 24ta phenda mange:
Na dara Pablo, soke si te lla kai o charo rromano, ta pala tu o Del ka cherel te zivin sa e llene kai si tuia ande llimia. 25Goleke manusalen, den tumen zor, soke si man vera ando Del ta llanav kai sa e ezgode ka nakhen isto sar phenda mange o suecho. 26A si te acha achadine ande iek isla.
27Nakhle desustar llive, ta iek riat achardam kai sama ande mora Adriatika ta e balav inllarela amen katar iek rig pe aver, ta kana saia ando dopas e rachako, acharde kai avaia pasa e phuv. 28Chudie iek solo te dikhen gia tele saia e phuv, ta sea tranda ta sou pole. Dikhle pale, ta sea bis ta efta pole. 29Daratar te na chalaven ande barra, chudie palal katar e llimia star sastrura phangle pe sole te achaven e llimia, ta molinape te llivosaol. 30A e llene kai sea sikade ande mora mangena te nasen katar e llimia, ta thode te fuliaren e llimia minoni kai si nuzdake, ta cherenape kai ka chuden ogola sastrura anglal katar e llimia. 31A o Pablo dia orba e kapitanea ta leke boñikonenchar, ta phenda lenge:
Te lleletar gala llene tumen ka meren.
32Ondaka e boñikura chinde e sole kai istarena e llimia minoni kai si nuzdake ta mukle te perel ande mora.
33Kana lena te pharron e zore, o Pablo dia orba saurrenchar te jan vareso. Ta phenda:
Cheren desustar llive kai ni jan niso cheres e dar kai si tumenge te meren. 34Mangav tumendar te jan vareso. Trubul te cheren le te mangena te zivin, soke niko tumendar ni ka jasarel ni iek bal katar po soro.
35Kana phenda gua, o Pablo lia iek marrno ta dia fala e Devleke angla sa e llene. Phaglale ta jala. 36Mapalal mangle te jan i ogola llene. 37Ande llimia sama dui stotine ta eftavardes ta sou llene. 38Kana jale so mangle, chudie o lliu ande mora te lokhiol e llimia.
E llimia phagol
39Kana llivosailo, e llene kai sea sikade ande mora ni pinllarde savi phuv saia goia, a dikhle e phuv ta e chisai e moraki ta cherena te inllaren incha e llimia. 40Chinde e sole kai sea phangle pe sastrura, ta mukle len ande mora, ta mukliarde e kasta kai cherena te bangarel e llimia. Mapalal vazdie o chiti te llal e llimia, ta e llimia avili mai pase katar e phuv. 41A lleli orta kote kai saia but chisai, ta kote achili e rig angluni ande chisai, ta nasti miskolape a e rig e paluni drobolape soke chalavena e valura.
42E boñikura mangena te mundaren e phanglen te na muken len te nasen plivindo. 43A sar o kapitan e boñikonengo ni kamela te merel o Pablo phenda te na mundaren nika, ta phenda te chudenpe ande mora mai anglal gola kai llanena te plivin te resen pe phuv, 44a ogola llene te achen upral pe kotora kastune e llimiake ta gia sa resle llunde pe phuv.
Currently Selected:
Echos 27: BACHRO
Highlight
Share
Compare
Copy
Want to have your highlights saved across all your devices? Sign up or sign in
Biblia ande chib Romani © Sociedad Bíblica Chilena, 2018.
