Echos 24
24
O Pablo chacharelpe angla o Feliks
1Nakhle panch llive, ta o Ananias o mai baro popo avilo ande Sesarea nesave phurenchar ta iekhe llenea kai radila ande krisa kai ikhardola Tertulo. Gala llene avile kai o sudo te dosaren e Pablo. 2Kana ande e Pablo, o Tertulo thoda te dosarel le, ta phenda e Felikseke:
Fala chuke si amen pas ta fala chuke kai cherdan te avel lachipe ande amari phuv. 3Ta pe suako rig si amen gala ezgode, ta da tut but fala, glamno Feliks. 4A ni kama te la tutar but vreme, manga tutar te asune amen akana. 5Dikhlam kai gava lleno si iek zatrania ta pe suako rig kai llal anel joli maskar e judiura, ta vou si o mai baro katar e sekta katar e Nazarenura. 6Ta i mangela te meliarel o cher e Devleko ta pala gua amen phanglam le, 7a o sudo o Lisana silnomaia lia le katar amare va ta bichalda golen kai dosarena len te aven tute. 8Isto tu sai puche le te llane soke dosara le.
9E judiura kai sea kote i von phenena kai gua saia o chachipe. 10Ondaka o sudo phenda e vastenchar e Pabloke te del orba, ta o Pablo phenda:
Dragostimaia ka chacharav man angla tu, soke llanav kai tu san krisari but burs katar gaia phuv. 11Ta isto tu sai puche mandar ta ka llane kai cheren preko desudui llive kai avilem ando Jerusalem te blagosiv e Devle. 12Ta ni dikhle man te jauman orbenchar nikaia, ta ni divosardem nika ando cher e Devleko ta ni ande khanllira e judionenge, ta pe ni iek rig e foroki. 13Gala llene nasti sikaven kai sem dosalo katar so phenen mandar. 14A so sai phenav chachimaia si kai radiu e Devleke kai si i me puranengo Del prema o Nevo Drom, kai von phenen kai si iek sekta, soke pachau sa so si pisime ande lila katar o zakono ta so phenen e poraukura. 15Ta me pachau isto ande so von pachan, kai o Del ka cherel e mule te usten katar o meripe e lache ta i e bilache. 16Goleke suako llive cherav so sai te aven chiste me mislura angla o Del ta angla e llene.
17Ta but burs phirdem ande aver phuvia ta avilem ando Jerusalem te dav esmola ta te dav so si dino e Devleke. 18A kana me cherava gala ezgode ta kana jaladem man prema o zakono, kote ni sea but llene ta ni saia burkania, ta kote maladem iek judiura kai avena katar e Asia.#Ech 21.17-28. 19Gola llene si kai saia te aven kate te dosaren man, te si len vareso te phenen mandar. 20A te na e llene kai si kate te phenen dal malade man dosalo katar varesavo bilachipe kana sema ande bari kris e judionengi. 21A Sai avelpe kai jolaile kana me phendem zurale:#Ech 23.6.
Allive tumen chinen mange kris soke pachau kai e mule ka usten katar o meripe.
22Kana asunda gava o Feliks sar vou asundaia katar o Nevo Drom, mukla goia orba pe iek rig ta phenda lenge:
Kana ka avel o Lisias o gazda e boñikonengo, vou ka phenel mange mai but katar gala ezgode tumare.
23Ta o Feliks bichalda e kapitane te na mukliare le ta te mukel te aven lete leke amala te den le vareso.
24Nakhle nesave llivesa ta o Feliks avilo pale pe rromiaia e Drusila kai saia judia. Ta o Feliks bichalda te anen e Pablo, ta asunda so phenela katar o pachape ando Jesukristo. 25A kana o Pablo dia leke orba katar o zivoto ando chachipe ta te gazdaril o manus pe pete, ta katar e kris kai si te avel, ondaka o Feliks darailo ta phenda leke:
Akana llatar. Me ka ikharav tut kana ka avel man vreme.
26A o Feliks adurichare la te del le love o Pablo, goleke ikharela le pe gachin droma te del lea orba. 27Nakhle dui burs kotar ta po than katar o Feliks dia te gazdaril o Porsio Festo. Ta sar o Feliks mangela te achel lacho e judionenchar, mukla phanglo e Pablo.
Currently Selected:
Echos 24: BACHRO
Highlight
Share
Compare
Copy
Want to have your highlights saved across all your devices? Sign up or sign in
Biblia ande chib Romani © Sociedad Bíblica Chilena, 2018.
