Echos 20
20
O Pablo llal ande Masedonia ta ande Galasia
1Kana e burkania achili, o Pablo ikharda e llenen kai pachaiea te del lenchar orba, ta mapalal llelotar ande Masedonia. 2Llelo kai sa gola thana ta dela but zor e phlalen kai pachana ando Jesus pe alavenchar; mapalal llelotar ande Gresia, 3kote achilo trin chon. Kana lela te likel ande llimia te llaltar ande Siria, kana llangla kai e judiura diepe orba te maren le ondaka mangla te irilpe, ta nakhlo pale katar e Masedonia. 4Llele lea o Sopatro katar e Berea, chavo e Pirroko; ta o Aristarko ta o Segundo katar e Tesalonika, o Gaio katar o Derbe, o Timoteo, ta i o Tikiko ta o Trofimo, kai sea katar e Asia. 5Gala phlal lleletar mai oma neko amen ta aduricharde amen ando Troade. 6Kana nakhle e llivesa kai jalpe o marrno kai inai le levadura, llelamtar katar o Filipos ande iek llimia, ta pala e panch llive avilam ando Troade, kote achilam efta llive.
O Pablo ando Troade
7Ando kurko chidinailam te phaga o marrno, ta o Pablo dia orba e llenenge kai pachan. Sar saia te llaltar thiarinako, dia lenge orba mai but llik kai e desudui e rachake. 8Ta chidinailam ande iek soba kai saia upral po cher, kote sea but memelia phabarde. 9Ta iek lleno terno kai ikhardola Eutiko besela pe penllerava. Sar o Pablo dia but orba, o terno lia le e lindri ta soutotar, ta katar e trito soba kai saia upre pelotar ta vazdiele mulo. 10Ondaka o Pablo fulisto, inzilo po terno ta lipisarda le pe pete, ta phenda e phlalenge:
Na daran; vou si llundo.
11Mapalal o Pablo pale likisto upre, phagla o marrno, jala ta thoda te del orba lligo ni likisto o kham, ondaka llelotar. 12A o lleno o terno, inllarde le llundo kai leko cher, ta pala gaia ezgoda kai nakhla von lie mai but zor.
O Pablo ando Mileto
13Amen llelamtar mai oma neko von ande iek llimia llik ando Aso te la e Pablo, soke gia manglale vou. 14Kana maladilam lea ando Aso, likisto amenchar ande llimia ta llelam ande Mitilene. 15Llelamtar kotar, ta thiarinako nakhlam angla o Kio, ta kana nakhlo gua llive avilam ando Samos. Kotar llelam iek llive ios ande llimia, ta avilam ando Mileto. 16Cherdamle gia soke o Pablo te na achel ande Asia ni kamla te nakhel ando Efeso, soke mangela te avel oma ando Jerusalem te sai avel kote ando llive katar o Pentekostes.
O Pablo del orba e phurege kai si ando Efeso
17Kana o Pablo saia ando Mileto ikharda e phuren katar e khanlliri kai si ando Efeso. 18Ta kana avile phenda lenge:
Tumen llanen sar zivisardem sar kana avilem o purvo llive ande Asia. 19Sa o vreme sema tumenchar ta radiu e Gazdake prostimaia, bute ausenchar ta maskar but brige kai avile mange cheres so mangena te cheren mange e judiura. 20Ta nikada ni achilem te phenav tumenge sa e orbe kai sai pomozin te zivin mai sukar ta pomozisardem tumen pe droma ta i ande tumare chera 21kai e judiura ta i kai gola kai inai judiura phendem lenge te irinpe kai o Del ta te pachan ande amaro Gazda o Jesus. 22Ta akana llau ando Jerusalem, inllardo pe zor katar o Duo, ta ni llanav so aduricharel man incha. 23Samo so llanav si kai ande savo foro kai llau, o Santo Duo phenel mange kai ando Jerusalem aduricharen man o phandipe ta but patnia. 24A me ni thovav sama katar niso, ni katar mo zivoto, o te si te merav, samo te resav kote kai prastav veselimaia, kote kai getolpe o drom, ta te cherav so phenda mange o Gazda o Jesus te phenav e lachi viasta katar o volipe e Devleko.#2 Ti 4.7.
25Ta akana llanav kai ni iek lleno maskar tumende, kai phendem tumenge katar e charoina e Devleki, ni ka dikhel man pale. 26Goleke mangav te phenav tumenge allive, kai ni acharav man dosalo katar ni iek lleno tumendar, 27soke me phendem tumenge sa so mangel te cherel o Del, ta ni gurudem tumendar niso. 28Goleke thoven sama ta arakhen sa e llenen katar e khanlliri, kote kai o Santo Duo thoda tumen chobanura te arakhen e khanlliri e Devleki, kai vou chinda pe ratea. 29Llanav kai kana me ka merav ka aven aver llene kai sargo llukela dive, ka mangen te zatrin e khanllira. 30Ta i maskar tumende ka vazdiniaon llene kai ka sikaven o kojaipe te sai llan pala lende e llene kai pachan ando Jesus. 31Goleke thoven sama ta den tumen golli kai trin burs o riat ta o llive diem orba tumenchar ta suakone llenea ausenchar.
32Akana, phlalalen, mukau tumen ande Devleke va ta ande leki orba katar leko volipe. Le si e zor te cherel tumen te barion ando Duo ta te del tumen sa so phenda kai ka del e llenen katar leko foro o santo kana dia po alav. 33Ta ni manglem me mange ni e love ni patave nikake. 34Tumen llanen kai radisardem me vastenchar te lau so trubula man, ta i e llenen kai sea manchar. 35Ta sa o vreme sikadem tumen kai gia si sar trubul te radi ta te pomozi golen kai trubul len, ta te da amen golli katar gola alava kai o Gazda o Jesus phenda:
Mai but veselia si kana de neko kana le.
36Ta kana dia lenchar gaia orba dia changa ta molisailo saurrenchar. 37Saurre rovde, ta chumidie le ta lipisarde pe pete e Pablo. 38Ta saia lenge but zalba, soke o Pablo phendaia lenge kai ni ka dikhen le ios. Mapalal llele lea kai e llimia.
Currently Selected:
Echos 20: BACHRO
Highlight
Share
Compare
Copy
Want to have your highlights saved across all your devices? Sign up or sign in
Biblia ande chib Romani © Sociedad Bíblica Chilena, 2018.
