Echos 19

O Pablo ando Efeso

1Kana o Apolo saia ando Korinto, o Pablo nakhlo katar e burdura ta avilo ando Efeso, kote malada nesave llenen kai pachana ando Jesus. 2Puchla len:

¿Tumen lien o Santo Duo kana pachaien?

Von phende leke:

Amen ni asundam katar o Santo Duo.

3O Pablo puchla len:

A ¿savo kristope lien tumen?

Von phende:

O kristope e Juaneko.

4O Pablo phenda lenge:

Ea, o Juan kristila e llenen kai irinape karing o Del, ta phenela lenge te pachan ande gua kai saia te avel, a gua kai saia te avel si o Jesus.#Mt 3.11; Mk 1.4,7-8; Lk 3.4,16; Jn 1.26-27.

5Kana von asunde gala orbe, kristisaile ando anav e Gazdako o Jesus; 6ta kana o Pablo thoda pe va pe lengo soro, avilo upral pe lende o Santo Duo, ta dena orba ande chibia kai inai pinllarde ta phenena porouke e Devleke. 7Von sea preko desudui murusa.

8Trin chon o Pablo llelo ande khanlliri e judionengi ta phenela lenge e orba katar e charoina e Devleki ta mangela te cherel e llenen te pachan ando Jesus. 9A nesave judiura thodepe besne ta ni kamle te pachan, ta angla e llene die orbe bilache katar e llene kai pachana ando Jesus. Ondaka o Pablo durilo lendar ta inllarda e llenen kai pachana ando Jesus kai iek cher sikadimako kai saia iekhe lleneko kai ikhardola Tirano. Kote dela orba suako llive, 10ta dui burs cherda gia, ta sa e llene kai zivina ande Asia, judiura ta i gola kai inai sea judiura, asunde e orba e Gazdaki. 11Ta o Del cherela e Pablo te cherel bare ezgode Devlikane 12gachin, kai e dikhle o e patave kai dodisarena leki esnaga, inllarena len kai e nasuale, ta sastona katar po nasualipe, ta e duura bilache likena lendar.

13A nesave judiura kai llana pe droma ta tradena e llenendar e duura bilache, mangle te cheren le ando anav e Jesuseko; ta phenena e duonenge:

¡Ando anav katar o Jesus, gua kai o Pablo del orba letar, phenav tumenge te liken!

14Gava si so cherena e efta chave iekhe judioke kai ikhardola Eseva kai saia iek gazda katar e popura. 15A iek drom o duo bilacho phenda lenge:

Pinllarav e Jesuse, ta llanav ko si o Pablo; a tumen, ¿ko sen?

16Ondaka kote, o lleno kai saia ande le o duo bilacho chudiape pe lende ta bare zoriaia marda saurren, gia zurale marda len kai nasle katar o cher bi patavengo ta chaladine. 17Ta sa e llene kai zivina ando Efeso, judiura ta i gola kai inai sea judiura, llangle so nakhlaia ta daraile but. Ta gia cherdola mai pinllardo o anav e Jesuseko.

18Ta i but llene kai pachaie avena ta phenena angla e llene sa o bilachipe kai cherdea omanglal, 19Ta but llene kai sea chirimatarke ande lila kai von chitina ta phabarde len angla sa e llene, ta kana llinde so mola gola lila, llangle kai mola len preko pinda milie tolaria rupune. 20Gia e orba e Gazdaki asundola sa mai but ta sikadola e zor kai saia la.

21Kana nakhle gala ezgode, o Pablo mangla te llal ande Masedonia ta ande Akaia ta te resel llik ando Jerusalem. Ta phenela kai katar o Jerusalem mapalal saia te llal i ande Roma. 22Ondaka bichalda ande Masedonia duie llenen kai pomozina le, e Timoteo ta e Erasto, a vou achilo nesave llivesa ios ande Asia.

Burkania ando Efeso

23Ande gola llivesa avilape iek bari burkania ando Efeso cheres o nevo drom, 24gaia burkania cherdala iek lleno kai ikhardola Demetrio, kai radila ando rup. Gava lleno cherela e rupea chera minone kai sea katar e deli e Artemisa, ta von lena but love ande gava rado. 25O Demetrio chidia e llenen kai radina lea ta i avere llenen kai radina sargo vou, ta phenda lenge:

Manusalen, tumen llanen kai gale radoia amen la love te zivi. 26A sar tumen dikhen ta asunen, gua o Pablo phenel kai e dela kai cheren e llene inai dela. Ta cherde te pachan but llene, na samo kate, ando Efeso ta i ande sa e Asia. 27Ta bari dar si, soke sai murilpe amaro rado, ta i sai bristarenpe katar o cher katar amari deli Artemisa, ta gia niko ni ka thovel lake sama soke llik kate blagosin la ande sa e phuv katar e Asia ta sa o sueto. 28Kana asunde gaia orba jolaile but ta urkisarde:

¡Blagosime te avel e Artemisa katar e efesiura!

29Sa o foro ni llanela so ka cherel ta jutle po Gaio ta po Aristarko, von sea dui llene katar e Masedonia kai llana e Pabloia, ta terrisarde len llik kai o teatro. 30A o Pablo mangela te del kote te del orba e llenenchar, a e llene kai pachana ando Jesus ni mukle le. 31Ta i maskar e sudura katar e Asia sea nesave amala e Pabloke, kai bichalde te phenen leke te na del kote. 32A kote kai sea chidine, nesave urkina iek ezgoda a aver llene urkina aver ezgoda, soke saia burkania ta aver llene ni llanena soke sea chidine kote. 33A nesave llene lendar phende e Alejandroke savi orba llalape kote, a e judiura espidiea le angla sa e llene. Ondaka o Alejandro phenda lenge e vastenchar te achen te sai chacharel e judionen angla o foro. 34A kana llangle kai i o Alejandro saia judio, sa urkisarde preko dui saiata:

¡Blagosime te avel Artemisa deli katar e efesiura!

35Ondaka o sudo e foroko, kana achada e llenen, phenda:

Manusalen katar o Efeso, sa o sueto llanel kai o rado gale foroko si te arakhel o cher katar e bari deli Artemisa kai laki esnaga sargo barreki fulisti katar o miloso. 36Sar niko nasti phenel kai gua si kojaipe, achen esmiro ta mislin tumen so ka cheren. 37Soke gala llenen kai tumen anden ni cherde niso bilacho e chereke katar amari deli ta ni die orba bilachi latar. 38Te mangela te dosarel vareka o Demetrio o e llene kai pomozin le, kote si e krisaria ta e chera e krisenge te den orba angla e sudura ta suako lleno te del orba pala po chachipe. 39A te mangena te den varesavi aver orba, ka cherdol iek kris chachuni. 40Gale ezgodaia kai nakhla allive sai thoven pe amende e dos kai divosara e llenen, soke te puchle soke si divome e llene inai amen ni iek orba te chachara amen. 41Ta kana phenda gala orbe, mangla e llenendar te llantar.

Currently Selected:

Echos 19: BACHRO

Highlight

Compare

Copy