Echos 21

O Pablo llal ando Jerusalem

1Kana muklam e phlalen likistam ande llimia ta llelam karing o Kos, thiarinako llelam ando Rodas, ta kotar llelam ande Patra. 2Ande Patra maladam iek llimia kai llala ande Fenisia, ta likistam andre te lla i amen incha. 3Kana llaia ande llimia, dikhlam e phuv katar o Chipre, nakhlamle po estingo ta llelam llik ande phuv katar e Siria. Diam ando Tiro soke saia te fuliaren nesave ezgode katar e llimia. 4Kote maladam e llenen kai pachana ando Jesus ta achilam lenchar efta llive. O Santo Duo cherda te den orba e Pabloia ta te phenen leke te na llal ando Jerusalem. 5A kana nakhle e efta llive, llelam sa e llene avri katar o foro, ta inllarde pe rromien ta pe minonen, kote pasa e mora diam changa ta molisalam. 6Mapalal diam lenchar orba ta likistam ande llimia, ta von irisaile kai pe chera.

7Llelam katar o Tiro ando Tolomaida, kote diam orba e phlalenchar ta achilam lenchar iek llive. 8Thiarinako llelamtar kotar ta avilam ande Sesarea ta llelam kai o cher e Felipeko, gua kai phenela e llenenge e lachi viasta, vou saia iek katar e efta llene kai pomozina e apostolen, ta achilam lea.#Ech 6.5; 8.5. 9E Felipe sea trin chea zinimake, von sea poraukura. 10Ta cherela nesave llivesa kai amen sama kote, ta avilo iek profeta katar e Judea kai ikhardola Agabo.#Ech 11.28. 11Kana avilo amende, lia o kavisi e Pabloko, phangla pe va ta pe porrne lea, ta phenda:

O Santo Duo phenel kai ando Jerusalem e judiura ka phanden gia e llene kai si gazda gale kaviseko, ta ka den le kai e llene kai inai judiura.

12Kana asundam gua, amen ta e llene katar e Sesarea manglam katar o Pablo te na llal ando Jerusalem. 13A o Pablo phenda:

¿Soke roven ta cheren te tristou man? Me sem tromano te phanden man ta i te mundaren man ando Jerusalem cheres o Gazda o Jesus.

14Ta sar nasti cherdam te kandel amen, muklam le, ta phendam leke:

Te cherdol e Gazdaki volia.

15Mapalal lachardam amare ezgode ta llelamtar ando Jerusalem. 16Llele amenchar nesave llene katar e Sesarea kai sea katar e khanlliri, ta inllarde amen kai o cher iekhe lleneko kai ikhardola Mnason kai saia katar o Chipre, cherela but vreme kai i vou pachala ando Jesus ta mukla amen te sova ande leko cher.

O Pablo llal kai o Jakobo

17Kana avilam ando Jerusalem, e phlal avile amenchar pachivale ta veselisaile but. 18Thiarinako, o Pablo llelo amenchar kai o Jakobo, ta kote sea sa e phure. 19O Pablo dia lenchar orba, ta mapalal phenda lenge sa so cherda o Del lea maskar e llene kai inai sea judiura. 20Kana asunde le, blagosisarde e Devle. Ta von phende e Pabloke:

Phlala, dikhe kai maskar e judiura si but llene kai pachaie ando Jesus, ta sa von phenen kai morabi te kanda o zakono e Moiseseko. 21Ta phende lenge kai tu phene sa e judionenge kai zivin ande aver phuvia te na pachan ando zakono e Moiseseko, ta kai phene lenge kai morabi te na sirkunsidin pe minonen ta te na cheren prema so sam sikade. 22¿So ka chera? E llene ka llanen kai avilan. 23Morabi te chere so ka phena chuke:

Kate maskar amende si star llene kai jale sovel e Devleke ta si te cheren so phende. 24Inllar len tuia, chistosao lenchar prema sar phenel o zakono ta de tu e love te llan te chinen pe bal. Ta gia sa ka dikhen kai inai chachipe so phende lenge tutar, ta ka dikhen kai i tu kande so phenel o zakono. 25A e llenenge kai inai judiura ta pachan ando Jesus, amen bichaldam lenge iek lil ta phendam lenge pe savi orba achilam:

Te na jan o mas katar o kurbano avere delenge, te na jan o rat, ta ni o mas katar e zivirinie kai mundardon tasade, ta te na cheren kurvaluko.

Phanden e Pablo

26Ondaka o Pablo inllarda e stare llenen, ta thiarinako chistosailo lenchar prema sar phenel o zakono; mapalal dia ando cher e Devleko te phenel kana ka nakhen e llive katar lenge sovel, gua saia o llive kai suako iek lendar ka del so si dino e Devleke.

27Kana sea pase te nakhen e efta llive, nesave judiura kai sea katar e Asia avile kai o Pablo ando cher e Devleko ta divosarde e llenen. Sa e llene vazdinaile po Pablo, 28ta urkina:

¡Israelitura, aven te pomozin amen! Gava si o lleno kai llal pe suako rig ta sikavel e llenen ezgode kai ni llan prema amaro foro, ni prema o zakono e Moiseseko ni prema gava cher e Devleko, ta i akana anda andre iekhe llenen kai si griegura, ta inai le liubao ni ande gava santo Than.

29Von phenena gua soke omanglal dikhlea e Pablo ando foro e Trofimoa kai saia katar o Efeso, ta mislina kai o Pablo inllardaia le ando cher e Devleko.

30Sa o foro divosailo, ta e llene avile prastindo. Istarde e Pablo ta phangle le avri katar o cher e Devleko, ta ondaka kote phangle e udara. 31Lena te mundaren le, kana o gazda katar e boñikura rromanura llangla kai divosailoa sa o Jerusalem. 32O gazda e boñikonengo chidia sa pe boñikonen, ta llelo prastindo kote kai sea e llene. Kana e llene dikhle len, mukle te maren e Pablo. 33Ondaka o gazda e boñikonengo avilo pase, phangla e Pablo ta phenda te phanden le duie lanchonenchar. Mapalal puchla ko saia ta so cherdaia. 34A nesave llene urkina iek ezgoda a aver urkina aver ezgoda, ta o gazda e boñikonengo ni acharela niso soke saia but burkania, ta bichalda te inllaren le kai o cher e boñikonengo. 35Kana avile pase, e boñikura saia te inllaren le ande va, soke e llene sea but silne, 36soke sa e llene avena pala lende, ta urkina:

¡Te merel!

O Pablo del orba e foroke

37Kana lena te thoven le ande rubie, o Pablo puchla e gazda e boñikonengo:

¿Sai dav tuia orba?

O gazda e boñikonengo phenda leke:

¿Llane te de orba ande chib e griegonengi? 38Te si gia, ¿Tu inai san o ejipsio kai cherel nesavo vreme palpale cherda te marenpe e rromanonenchar ta llelotar ando pusto star milie llenenchar kai sea sikade te marenpe?

39O Pablo phenda leke:

Me sem judio katar o Tarso katar e Sisilia, ziviu ande iek foro asundo; cher mange o sebapi te dav orba e llenenchar.

40O gazda e boñikonengo phenda leke ako, ta o Pablo ustilo pe porrne ta upral kai si o cher e boñikonengo ta e vastea phenda e llenenge te achen. Kana e llene achile, phenda lenge ande chib kai den orba e ebreura:

Currently Selected:

Echos 21: BACHRO

Highlight

Compare

Copy