2 Samuel 3
3
1Saia maripe but vreme maskar e familia e Sauleki ta e familia e Davideki. Ta o David cherdola ios mai zuralo, a e familia katar o Saul jasarela e vlaga.
E familia e Davideki
1 Kr 3.1-4
2Ta biandile chaurre e Davideke ando Jebron. O mai purano saia o Amnon, e Ajinoameko katar o Jezreel, 3o duito chaurro, o Kilab e Abigailako, e rromi e Nabaleki katar o Karmel, o trito chaurro, o Absalon e Makalako, e chorri katar o Talmai kai saia o charo ando Gesur, 4o starto chaurro, o Adonias e Jagitako, o panchto chaurro, o Sefatias e Abitalako, 5o souto chaurro, o Itream e Eglaako, rromi e Davideki. Sa gala chaurre biandile kana o David saia ando Jebron.
O Abner ta o David achen pe orba
6Kana saia o maripe maskar e famile katar o Saul ta o David, o Abner cherdilo zuralo ande familia katar o Saul. 7Ta e Saule saia le iek konkubina kai ikhardola Rizpa, chorri e Ajaeki, ta o Abner amisailo laia. Ondaka, o Isboset puchla e Abnere:
¿Soke amisailan me dadeki diskiniaia?
8Ta o Abner but jolailo pala so puchla le o Isboset, ta phenda leke:
¿So sem me, iek llukel katar o Juda? Avila mange zalba katar e familia che dadeki o Saul, zalba katar leke phlal ta katar leke llene, ta ni diem tut e Davide: ¿A tu puche man soke cherdem o bilachipe gole diskiniaia? 9¡O Del te dukhavel man zurale te na cherava so jala sovel o Del e Davideke, 10te lav e charoina katar o porodo e Sauleko ta te dav la e Davideke ando Israel ta o Juda, katar o Dan llik kai o Berseba!#1 S 13.13-14; 15.26-28.
11Ta o Isboset ni phenda leke niso, soke darala letar. 12Ondaka o Abner bichalda llenen e Davideke te phenen leke:
¿Gaia phuv kaki si? Aide te acha po alav kai me ka cherav te irilpe tute sa o Israel.
13Ta o David phenda:
Ako, me ka achav po alav tuia, samo kai kana ka ave mande an mange e Mikala e chorri e Sauleki. 14Mapalal o David bichalda llenen kai o Isboset chavo e Sauleko, te phenen leke:
Irisar mange e Mikala kai si mi rromi, soke te sai lav la me diem stotina morcha katar e sirkunsision e filisteonengi.#1 S 18.27.
15Ondaka o Isboset bichalda te len la katar lako rrom o Paltiel chavo e Laiseko, 16a o Paltiel kana voi llalatar, rovela ta llelo laia llik kai o Bajurim. Kote o Abner phenda leke te irilpe, ta o Paltiel irisailo.
17Mapalal o Abner dia orba e phurenge katar o Israel, ta phenda lenge: Ollikana tumen mangen te avel o David tumaro charo. 18Cheren le akana, soke o Del phenda e Davideke kai lea ka braduil pe foro o Israel katar e filisteura ta katar sa lenge dusmanura.
19Ta i o Abner dia orba e llenenchar katar o Benjamin. Mapalal llelo ando Jebron te phenel e Davideke sa so mislina ando Israel ta ando Benjamin. 20Ondaka o Abner avilo bise llenenchar ando Jebron, ta o David cherda lenge iek jape. 21Ta o Abner phenda e Davideke:
Akana morabi te chidav sa e llenen katar o Israel te sai achen pe orba tuia te sai charoi sar tu mange.
Mapalal o David blagosisarda e Abnere, ta o Abner llelotar esmiro.
O Joab mundarel e Abnere
22Kana llelotar o Abner, e boñikura katar o David ta o Joab avile katar iek maripe, ta anena but ezgode kai lie katar pe dusmanura. A o Abner ni saia e Davidea ando Jebron soke o Abner lleloiatar ande pas. 23Ta kana avile o Joab ta leke boñikura, phende e Joabeke kai o Abner chavo e Nereko, aviloia kai o charo ta lleloiatar esmiro kana o charo blagosisardaia le. 24Ondaka o Joab avilo kai o charo, ta phenda leke:
¿So cherdan? O Abner avilo tute ¿Soke muklan le te llaltar? 25Tu pinllare le. Vou avilo tute samo te kojavel tut, te llanel sa so chere tu.
26Mapalal kana o Joab achilo te del orba e Davidea, bichalda llenen bi te llanel le o David, te anen e Abnere katar o bunari kai ikharen le Sira. 27Kana o Abner irisailo kai o Jebron, o Joab inllarda le pe iek rig katar o udar te del orba lea po chorial, kote ranisarda le po panchto pasuaro ta mulo, te pochinel so cherdaia e Asaeleke leko phlal. 28Kana o David llangla so cherda o Joab, phenda:
Me ta mi charoina, ostade angla o Del, ni sam dosale katar e Abnereko rat, chavo e Nereko. 29¡Te perel po soro e Joabeko ta pe leke porodoko o rat e Abnereko. Te aven ande leko porodo chaurre kai peraven phum, leprosura, chaurre bange, mundarde e jarnietar, ta chaurre kai ni ka avel len te so jan!
30O Joab ta leko phlal o Abisai mundarde e Abnere, soke o Abner po maripe ando Gabaon mundardaia e Asaele kai saia lengo phlal.
31Ondaka o David phenda e Joabeke ta sa e foroke:
Pharraven tumare patave, thoven pe tumende patave zalosne, roven pala o meripe e Abnereko. Ta o David llala palal pala o sanduko. 32Prajosarde e Abnere ando Jebron, ta o charo bare avazea rovela pasa e limori e Abnereko ta i sa o foro rovela. 33Ondaka o charo llilabia gaia llili zalbaki pala o Abner:
¿Soke mulan Abner,
sargo kana meren e bilache.
34Kana che va ni sea phangle,
ta pe che porrne ni sea lanchura?
¡Mulan sargo kana iekhe llene
mundaren le e kochkaria! Ta o foro pale rovda pala le.
35Ondaka o foro molisaile e Davideke te jal fiso mai anglal te perel o kham. A o David jala sovel, ta phenda:
¡O Del te dukhavel man te java fiso mai anglal te perel o kham!
36Sa o foro llangla so jala sovel o David ta pela lenge drago, soke sogo cherela o charo perela lenge drago. 37Sa o foro ta sa o Israel acharde gua llive kai ni saia o David gua kai mundardaia e Abnere chavo e Nereko.
38Ta o charo phenda pe slugenge:
¿Ni llanen tumen kai allive mulo iek baro gazda katar o Israel? 39Me, makar sem charo, sem but kovlo angla e chave katar o Seruia kai si but bilache. O Del te cherel te pochinen so cherde.
Currently Selected:
2 Samuel 3: BACHRO
Highlight
Copy
Compare
Share
Want to have your highlights saved across all your devices? Sign up or sign in
Biblia ande chib Romani © Sociedad Bíblica Chilena, 2018.
