2 Samuel 2
2
O David charoil ando Juda
1Mapalal katar gala ezgode o David puchla e Devle gia:
¿Morabi te llav ande fisavo foro katar o Juda?
Ta o Del phenda leke:
Ea, morabi te lla.
Ta o David puchla le:
¿Ande savo foro si te llav?
Ta o Del phenda leke:
Morabi te lla ando Jebron.
2Ta o David llelo pe duie rromienchar, e Ajinoam katar o Jezreel ta e Abigail e phivli e Nabaleki katar o Karmel. 3Ta i inllarda pea e llenen kai sea lea suako iek pe familiaia, ta thodepe te zivin ande forura katar o Jebron. 4Ta avile e llene katar o Juda ta thode e Davide charo katar o Juda. Ta kana o David llangla kai e llene katar e Jabes katar o Galaad prajosarde e Saule,#1 S 31.11-13. 5bichalda llenen lende te phenen lenge: O Del te blagosil tumen, soke sena pachivale tumare gazdaia o Saul soke prajosarden le. 6Te avel e Devleke zalba tumendar. I me ka avav lacho tumenchar pala so cherden. 7Te aven tumen zurale ta i tromane. O Saul mulo a e llene katar o Juda thode man charo pe lende.
O maripe katar o Israel ta o Juda
8O Abner chavo e Nereko kai saia gazda katar e boñikura e Sauleke, inllarda ando Majanaim e chave e Sauleko kai ikhardola Isboset, 9ta thoda le charo katar o Galaad, katar o Gesuri, katar o Jezreel, katar o Efrain, katar o Benjamin, ta katar sa o Israel. 10O Isboset chavo e Sauleko sea leke saranda burs kana thode le te charoil ando Israel, ta o Isboset charoisarda dui burs. Samo e llene katar o Juda llele pala o David. 11Ta o David saia charo katar o Juda ando Jebron efta burs ta sov chon.
12O Abner likisto katar o Majanaim te llal ando o Gabaon e boñikonenchar katar o Isboset chavo katar o Saul, 13ta o Joab chavo katar o Seruia ta e boñikura katar o David, i von likiste ta malade e llenen katar o Abner pasa o bunari katar o Gabaon. Ondaka o Joab ta leke llene thodepe pe iek rig katar o bunari, ta o Abner ta leke llene thodepe pe ogoia rig. 14Ta o Abner phenda e Joabeke:
Te liken angle e llene terne te marenpe.
Ta o Joab phenda leke:
Ako.
15Ondaka ustile desudui llene katar o Benjamin kai sea katar o Isboset, ta desudui sluge katar o David. 16Ta suako iek istarda o soro katar po dusmano ta ranisarda le e jarniea ande pasuare. Gia saurre mule ande iek vreme, goleke ikharen goia phuv Jelkat Jasurim kai si ando Gabaon. 17Gua llive o maripe saia but baro, ta e sluge katar o David dobisarde e Abnere ta e llenen katar o Israel. 18Ta sea kote e trin chave katar o Seruia, o Joab, o Abisai ta o Asael. Ta o Asael saia but lokho kana prastela sargo e gasela pe umalia. 19O Asael prastia palal pala o Abner, ta ni durilo letar ni karing pi chachi ta ni karing po stingo. 20Ta o Abner dikhla pala pe, ta phenda:
¿Ni san tu o Asael?
A o Asael phenda leke:
¡Ea, me sem!
21O Abner phenda leke:
Na praste pala ma, mai sukar de pe iek katar e boñikura ta le sa so si le.
A o Asael ni kamla ta ni achilo te prastel pala o Abner.
22Ta o Abner pale phenda e Asaeleke:
Na praste pala ma o me ka mundarav tut, ta mapalal ¿Sar ka avav angla cho phlal o Joab?
23A o Asael ni kamla te llaltar, goleke o Abner ranisarda le po panchto pasuaro ta o jarni likisto katar leke zea, ta isto kote mulo o Asael. Ta suako lleno kai nakhela kotar, achela po than kai muloa o Asael. 24A o Joab ta o Abisai rodie e Abnere, ta perela o kham kana avile pe burdura katar e Amma kai si angla o Giaj, po drom kai llal po pusto katar o Gabaon. 25Ta e boñikura katar o Benjamin chidinaile e boñikonenchar katar o Abner ta thodepe po than mai vazdino katar iek burdo. 26Ondaka o Abner urkindo phenda e Joabeke:
¿Nikada ni ka getolpe o mundaripe? ¿Ni llane kai o maripe samo ka cherkiarel amen? ¿Kana ka phene e foroke te na llan ios te marenpe pe phlalenchar?
27A o Joab phenda leke:
Jav chuke sovel ando anav e Devleko kai te na phendana le, me boñikura llelea te marenpe pe phlalenchar lligo ni pharlea e zore.
28Ondaka o Joab basalda ande sing ta sa o foro achilo ta ni llele te marenpe ios e israelenchar. 29Goia riat o Abner ta leke llene llele po Araba, ta kana nakhle o Jordan llele pe sa o Bitron, ta avile ando Majanaim.
30I o Joab mukla te rodel e Abnere ta chidia sa e boñikonen, ta kana llinda len ni sea desunia sluge katar o David ta ni saia o Asael. 31A e sluge katar o David mundarde trin stotine boñikonen katar o Benjamin.
32Ta prajosarde e Asaele pe limoria katar leko dad ando Belen. Ta sa goia riat, o Joab ta leke llene phirde llik kai o Jebron kana pharrona e zore.
Currently Selected:
2 Samuel 2: BACHRO
Highlight
Copy
Compare
Share
Want to have your highlights saved across all your devices? Sign up or sign in
Biblia ande chib Romani © Sociedad Bíblica Chilena, 2018.
