2 Samuel 1
1
O David asunel katar o meripe e Sauleko
1Mapalal kana o Saul mulo ta kana o David mardape e llenenchar katar o Amalek ta irisailo, o David achilo dui llive ando foro Siklag.#1 S 31. 2Kana nakhle trin llive, ondaka avilo iek lleno terno ando pero katar o Saul, sa leke patave sea pharrade ta i saia prajo pe leko soro. Avilo angla o David ta dia changenchar angla le. 3Ta o David puchla le:
¿Katar ave?
Ta o lleno phenda e Davideke:
Naslem katar o pero katar e israelitura.
4O David puchla le:
¿So avilape? ¡Phen le mange!
Ta o lleno phenda:
O foro naslo katar o maripe soke e filisteura mundarde bute israelen, ta i mundarde e Saule ta leke chave e Jonatane.
5Ta o David puchla le:
¿A sar llane kai o Saul ta leko chavo o Jonatan mule? 6Ta o lleno phenda:
Me avilem po burdo Gilboa ta maladem e Saule kana vou chudiape pe po jarni, ta pala le avena bordona ta boñikura kai llana pe gra. 7Ta o Saul boldinailo dikhla pe ma ta ikharda man. A me phendem leke:
Kate sem. 8Puchla man ko sem me, a me phendem leke kai me sem amalekita. 9Ta vou mangla mandar te mundarav le, soke saia ande bari duk ta mangela te merel. 10Goleke llelem lete ta mundardem le soke llanava kai vou nasti achela llundo. Liem e korona kai saia pe leko soro, ta e angrusti ka saia pe leko va, ta andem len kate angla mo gazda.#1 S 31.1-6; 1 Kr 10.1-6.
11Ondaka o David ta e llene kai sea lea pharrade pe patave, 12rovde ta cherde alluno llik kai e riat pala o Saul ta o Jonatan leko chavo, pala o foro e Devleko, ta pala o Israel, soke mundarde len e jarnienchar. 13Mapalal o David puchla e llene terne:
¿Katar san tu?
A vou phenda leke:
Me sem amalekita chavo katar iek lleno kai inai katar gaia phuv.
14O David phenda leke:
¿A sar ni darailan te mundare e llene kai saia esvirime katar o Del? 15Ondaka o David ikharda iekhe katar pe sluge, ta phenda leke:
¡Mundar le!
Ta o sluga mundarda le.
16Ta o David phenda:
Cho rat te perel pe cho soro, soke isto tu phendan kai mundardan e llene kai saia esvirime e Devletar.
O David rovel pala o Saul ta o Jonatan
17Ondaka o David cherda gaia llili kana rovda pala o Saul ta leko chavo o Jonatan, 18ta phenda te sikaven la e foroke ando Juda. Gaia llili si pisime ando lil katar o Jaser, ta phenel gia:#Jos 10.13.
19¡Lloi Israel,
pe burdura mulo cho baripe!
¡Dikhen sar mule e tromane!
20Na phenen le ando foro o Gat ta na phenen le pe droma ando Askalon,
te na veselinpe e diskinie filistee,
te na juten veselimatar e diskinie filistee kai ni pachan ando Del.#Mik 1.10.
21¡Te na pechal ta te na delpeke pe tumende
nikada ios burdura katar o Gilboa,
soke si umalia e merimake!
Kote achile ando lallao
e eskudura katar e tromane.
Kote jasailo o glamno sukaripe katar
e Sauleko eskudo, sargo kana ni thode pe lete o zeitino.
22O Saul ta o Jonatan nikada ni irinape
te na chingarena e jarnie ta e llide
ando rat ta ande khoi
katar e boñikura mai tromane.
23Saul ta Jonatan kai voliv tumen,
nikada ni fuladile
ni kana zivina ta ni kana mule.
¡Sena mai lokhe neko e agile!
¡Sena mai zurale neko e lionura!
24¡Chorralen katar o Israel,
roven pala o Saul kai thovela pe tumende chitura vunete
sargo kaline ta lino but sukar,
kai lacharela tumen ande ezgode sunakune but sukar!
25¡Dikhen sar mule e tromane pe umal e marimaki!
¡Jonatan mulan pe che burdura!
26¡Sem but dukhado pala tu,
Jonatan, phlal murno!
¡Gia sukar sana manchar!
Cho volipe saia mange mai sukar neko o volipe e diskiniengo.
27¡Dikhen sar mule e tromane!
¡Jasaile e ezgode marimake!
Currently Selected:
2 Samuel 1: BACHRO
Highlight
Copy
Compare
Share
Want to have your highlights saved across all your devices? Sign up or sign in
Biblia ande chib Romani © Sociedad Bíblica Chilena, 2018.
