2 Samuel 14
14
O Joab cherel te irilpe o Absalon
1O Joab chavo katar o Seruia, llanela kai o charo o David saia but dukhado leko lio pala o Absalon, 2goleke anda katar e Tekoa iekhe diskinia but bizai kai zivila kote. Ta phenda lake:
Cher tut sargo zalosni, ta thov pe tute patave zalosne. Na thov pe tute meriso te sai mislin kai cherel but vreme kai san ande llivesa zalosne, 3ta lla kai o charo, ta de leke gaia orba kai me ka phenav chuke. Ta o Joab phenda lake so saia te phenel e charoke.
4Ta gaia diskinia katar e Tekoa lleli kai o charo, dia changenchar angla le ta phenda leke:
¡Pomozisar man, glamno charo!
5Ta o charo puchla la:
¿So si chuke?
Ta voi phenda leke:
Me sem phivli, mo rrom mulo, 6ta sea man dui chave kai mardepe ando vos. Niko ni dia murtik, goleke iek mundarda avere, 7ta sa mi familia vazdinaili pe mande, ta phenen mange te anav gole kai mundarda pe phlale te mundara le, te pochinel soke mundarda pe phlale. Ta ni chitilpe lenge kai te mundarde le me ka achav korkorre, ta o anav me rromeko ka jasaol ostade.
8Ta o charo phenda e diskiniake:
Llatar chere, me ka lacharav gaia ezgoda.
9Ta e diskinia phenda leke:
Mo glamno charo, te perel e dos pe ma ta pe mi familia, a o charo ta leko trono te na aven dosale.
10Ta o charo phenda lake:
An mange karinga e llene kai daravel tut, ta ni ka del tut joli ios.
11Ta voi phenda:
¡Mo glamno charo, molisao e Devleke te na bariarel e zatrania o lleno kai mangel te mundarel me chave!
Ta o charo phenda lake:
¡Ando anav e Devleko jav chuke sovel kai ni ka jasaol ni iek bal katar cho chavo!
12Ta pale e diskinia phenda e charoke:
Muk man mo glamno charo te dav iek orba ios.
Ta o charo phenda lake:
De orba.
13Ondaka e diskinia puchla:
¿Soke tu, glamno charo, mange te chere isto gia e Devleke foroia? Soke kana phendan gua alav, isto tu tut dosare, soke ni chere te irilpe cho chavo o tradino. 14Soke sa morabi te mera, amen sam sargo o pai kai chordol pe phuv ta nasti len le pale. A o Del ni lel o zivoto nikatar, vou pomozil e tradine te na duriol letar. 15Me avilem te phenav gala ezgode e charoke, soke o foro darada man. Goleke phendem ka dav orba e charoia, sai te avelpe kai vou ka cherel so ka mangav letar. 16Te asunel man o charo, ka braduil man katar o lleno kai mangel te tradel man ta me chave katar gaia phuv kai si e Devleki. 17Akana chi sluga phenel te den la zor e alava e charoke, soke vou llanel so si lacho ta so si bilacho, sargo iek suecho e Devleko. ¡O Del te avel tuia!
18Ondaka o David phenda e diskiniake:
Me moliv man chuke te na guruve niso katar so ka puchav tut.
Ta e diskinia phenda leke:
Phen, glamno charo.
19Ondaka o charo puchla la:
¿Inai o Joab kai bichalda tut?
Ta e diskinia phenda:
Jav chuke sovel mo charo, kai so phendan si o chachipe. De istina si kai cho sluga o Joab bichalda man, ta vou phenda mange e alava kai me saia te phenav len chuke.
20Vou cherda te pharrudon e ezgode, a o charo si gia bizai, kai vou si sargo iek suecho e Devleko, llanel sa so nakhel ande phuv.
21Ondaka o charo phenda e Joabeke:
Dik, me llanav so ka cherav. Lla ta cher te irilpe o Absalon.
22Ta o Joab dia changa lligo ni dodisarda leko chikat pe phuv angla o charo ta blagosisarda le, ta phenda:
Akana llanav kai o charo cherel pala ma, soke o charo cherda so manglem letar.
23Ondaka o Joab llelo ando Gesur te anel e Absalone ando Jerusalem. 24A o charo phenda te llaltar kai po cher ta te na avel lete. Ta o Absalon llelotar kai po cher ta ni dikhla o mui e charoko.
25Ta niko ni saia gia sukar ando Israel sargo o Absalon. Katar leke porrne llik kai leko soro vou saia sukar. 26Kana chinela pe bal suako burs, soke sea but bare ta joliavena le, leke bal phariavena dui kile. 27Ta o Absalon avila le trin minone ta iek minoni kai ikhardola Tamar, kai saia but sukar.
28Ta o Absalon achilo dui burs ando Jerusalem, ta ni dikhla o mui e charoko. 29Ta o Absalon ikharda e Joabe, te bichalel le kai o charo, a o Joab ni kamla te avel lete. Ta ikharda le pale o duito, ta pale o Joab ni kamla te avel. 30Ondaka o Absalon phenda pe slugenge:
Dikhen, e umal katar o Joab si pasa murni, kote si sebada. Llan ta phabaren la.
Ta e sluge katar o Absalon llele ta phabarde e umal katar o Joab.
31Ondaka o Joab avilo kai o cher katar o Absalon, ta phenda leke:
¿Soke che sluge phabarde mi umal?
32Ta o Absalon phenda e Joabeke:
Me ikhardem tut te ave karinga soke mangava te bichalav tut kai o charo te phenel leke:
¿Soke avilem katar o Gesur? Mange saia mai sukar te achav incha. Me akana mangav te dikhav o mui e charoko. Te sem dosalo katar fiso, mundar man.
33Ta o Joab avilo kai o charo, ta phenda leke e alava katar o Absalon. Ondaka o charo ikharda e Absalone, ta kana avilo lete o Absalon dia changa angla le lligo ni dodisarda leko chikat pe phuv, ta o charo chumidia le.
Currently Selected:
2 Samuel 14: BACHRO
Highlight
Copy
Compare
Share
Want to have your highlights saved across all your devices? Sign up or sign in
Biblia ande chib Romani © Sociedad Bíblica Chilena, 2018.
