2 Samuel 13
13
O Amnon ta e Tamar
1Mapalal katar gala ezgode, o Amnon chavo e Davideko, volisarda e Tamara, e phei katar o Absalon kai i vou saia chavo e Davideko. 2Ta o Amnon nasuailo pala e Tamar, soke voi saia chei ta leke saia but trudno te cherel lake fiso. 3Ta e Amnone saia iek amal kai ikhardola Jonadab chavo katar o Simea, phlal e Davideko, ta o Jonadab saia but bizai. 4Ta o Jonadab puchla e Amnone:
¿So si chuke, chavo e charoko? ¿Soke sukilan gachin? ¿Ni ka phene mange soke?
Ta o Amnon phenda leke:
Me voliv e Tamara, e phei katar mo phlal o Absalon.
5Ta o Jonadab phenda leke:
Pher chuke ta phen kai san nasualo, ta kana ka avel cho dad te dikhel tut, phen leke te bichalel che phea e Tamara te sai del tut te ja te chirabel chuke isto kote, ta gia te dikhe la ta te ja so ka thovel chuke voi.
6Ondaka o Amnon thodape ando than ta phenda kai saia nasualo, ta o charo avilo te dikhel le. Ta o Amnon phenda e charoke:
Bichal mange me phea e Tamara te cherel mange dui marrne, ta voi te del man te jav.
7Ta o David bichalda e Tamara kai leko cher, ta phenda lake:
Lla kai cho phlal o Amnon ta cher leke fiso te jal.
8E Tamar lleli kai po phlal o Amnon kai saia pe postelia. Voi lia e arina ta cherda marrne angla le, 9mapalal lia e chiai ta ikanda e marrne angla le, a vou ni kamla te jal. Ta o Amnon phenda te llantar sa e llene kai sea kote. 10Ondaka o Amnon phenda e Tamarake:
An mange o jape kai mi soba ta isto tu de man te jav.
Ta e Tamar lia e marrne kai chirada, ta anda len kai leki soba.
11Ta kana voi thodape angla o Amnon te jal, istarda la zurale ta phenda lake:
Aide mi phei, pher chuke manchar.
12Ondaka voi phenda leke:
Na phlala, na thov man ando lallao. Gua ni cherdol ando Israel. ¡Na cher gua bilachipe!
13¿Te thodan man ando lallao, kai ka llav? A tutar ka phenen kai san dilo. Te mange te zini tut manchar, de orba e charoia, vou ni ka phenel chuke iok.
14A vou ni kamla te asunel la, ta pe zor amisailo laia. 15Mapalal o Amnon murzisarda pe Tamara. Pe gachin murzisarda pe late, kai leki murzania saia mai bari neko o volipe kana volila la. Ta o Amnon phenda lake:
Uste, ta llatar.
16Ta voi phenda leke:
¡Na phlala, na trade man, soke te trade man ka chere iek bilachipe mai baro neko so cherdan!
A vou ni thoda lake sama, 17ta cherda ios mai gore, soke ikharda pe sluga ta phenda leke:
¡Trade katar gale diskinia, ta phande o udar kana ka likel!
18Ta voi saia furiadi patavenchar but sukar sar furiadona e chea katar o charo. Ta o sluga tradia la avri, ta phangla o udar, 19ta voi chudia pe po soro prajo iagako, pharrada pe sukar patave, thoda pe va pe po soro, ta llelitar rovindo po drom. 20Ondaka lako phlal o Absalon puchla la:
¿Cho phlal o Amnon cherda chuke gua? Na phen niso nikake, soke vou si cho phlal. Na brigisao.
Ta e Tamar achili tristome ando cher katar po phlal o Absalon.
21Ta kana o charo o David asunda so nakhla, jolailo but. 22O Absalon ni phenda niso e Amnoneke soke murzila pe lete, pala so cherda e Tamarake.
O Absalon cherel te pochinel o Amnon
23Kana nakhle dui burs, e sluge katar o Absalon chinena e bal katar e bakre ando Baal Jasor, pasa o foro katar o Efrain. Ta o Absalon ikharda saurren katar e chave e charoke te aven po jape. 24Ta i llelo kai o charo, ta phenda leke:
Akana me sluge chinen e bal katar e bakre, aide manchar charo ta i che sluge po jape.
25Ta o charo phenda e Absaloneke:
Na chaurrea, ni ka llan sa te na likel chuke but kuch.
A o Absalon phenda e charoke but droma te llal po jape, a o charo ni kamla ta blagosisarda le.
26Ondaka o Absalon phenda leke:
Te si gia, me mangav tutar te avel amenchar o Amnon, mo phlal.
Ta o charo puchla le:
¿Soke mange te llal vou?
27Ta soke o Absalon mangla le but droma, o charo mukla te llan po jape sa leke chave, ta i o Amnon.
28A o Absalon phenda pe slugenge:
Kana ka dikhen kai o Amnon si mato, ta kana me ka phenav le tumenge te mundaren e Amnone, ondaka mundaren le. Na daran soke me phendem le tumenge. Den tumen zor, te aven tromane.
29Ta e sluge cherde e Amnoneke sar phendaia lenge o Absalon. Ta sa e chave katar o charo likiste pe magarche, ta nasle.
30Ta kana von llana po drom, o David asunda kai o Absalon mundarda sa e chaven katar o charo ta kai niko ni achiloia llundo. 31Ondaka o David ustilo ta pharrada pe patave, chudiape pe phuv, ta sa e sluge kai sea lea i von pharrade pe patave. 32A o Jonadab chavo e Simeaeko, phlal e Davideko, phenda leke:
Na mislisao, glamno charo kai sa che chave mule. Samo e Amnone mundarde, soke gua mangela te cherel o Absalon sar kana o Amnon cherda pe zor te sovel lea e Tamara, leki phei. 33Goleke, na pacha mo gazda o charo, ande so asundol kai sa e chave katar o charo mule, soke samo o Amnon mulo.
34Ta o Absalon naslo. A o lleno kai arakhela dikhla upral kai but llene avena po drom pe iek rig katar o burdo. 35Ta o Jonadab phenda e charoke:
Dik, kote aven e chave e charoke gia sar phenda le cho sluga.
36Kana phenda gua, e chave katar o charo avile ta rovena ta kukina. Ta i o charo, ta sa e sluge rovena ando baro avazi. 37A o Absalon naslo ta llelotar kai o Talmai chavo e Amiudeko, charo katar o Gesur. Ta o David suako llive rovela pala o Amnon. 38Gia o Absalon naslo ta llelotar ando Gesur, ta achilo kote trin burs.#2 S 3.3. 39Ta o charo o David mangela te dikhel e Absalone, soke diape zor ande pi duk pala o meripe katar o Amnon.
Currently Selected:
2 Samuel 13: BACHRO
Highlight
Copy
Compare
Share
Want to have your highlights saved across all your devices? Sign up or sign in
Biblia ande chib Romani © Sociedad Bíblica Chilena, 2018.
