2 Samuel 12
12
O Natan del po David
1O Del bichalda e Natane kai o David, ta kana avilo lete phenda leke:
Ande iek foro sea dui llene. Iek saia barvalo a o gua saia chorro. 2E barvale sea but bakre ta guruva, 3a e chorre saia le samo iek bakri kai chinda ta bariarda. Ta e bakri barili leke chaurrenchar, ta jala katar leki sinia ta sovela pe leko brek, ta voi saia sargo leki chorri. 4Iek llive avilo kai o barvalo iek lleno te dikhel le, a o barvalo ni lia katar pe bakre ta katar pe guruva te chiravel zumi e lleneke kai aviloa lete, a lia e bakri katar o chorro, mundarda la, chirada la ta cherda iek jape gole lleneke.
5Ondaka o David jolailo zurale, ta phenda e Nataneke:
¡Ando anav e Devleko phenav chuke kai o lleno kai cherda gua, si te merel! 6Ta si te pochinel pala e bakri star droma mai but pala so cherda, soke ni avila leke zalba.
7Ondaka o Natan phenda e Davideke:
¡Tu san gua lleno! Ta gia phenel o Del e Israeleko:
Me thodem tut te ave charo katar o Israel, ta braduisardem tut katar o Saul, 8ta diem tut o cher katar cho gazda, diem tut leke diskinien. Ta na samo gua, soke diem tut o foro katar o Israel ta o Juda, ta sai diema tut ios mai but. 9¿Soke ni thodan sama po alav e Devleko ta cherdan o bilachipe angla leke akha? Mundardan e Uriase o jeteo e jarnienchar katar e amonitura, ta lian leki rromia. 10Goleke, soke ni thodan mange sama ta lian pala tu e rromia katar o Urias o jeteo, o silnope nikada ni ka llaltar katar chi familia. 11Me o Del phenav chuke. Ka cherav te vazdiniaol o bilachipe katar chi familia pe tute, ta angla tu ka lav che diskinien ta ka dav len avere lleneke, ta vou ka amilpe lenchar ollivesea. 12Tu cherdan le po chorial, a me ka cherav le angla sa o Israel ollivesea.#2 S 16.22.
13Ondaka o David phenda e Nataneke:
Cherdem o bilachipe angla o Del.
Ta o Natan phenda e Davideke:
O Del prostisarda tut. Ni ka mere.
14A tu cherdan te kusen e Devle e dusmanura e Devleke, goleke cho minono kai biandilo ka merel.
15Ta o Natan irisailo kai po cher. Ta o Del cherda te avel but nasualo o minono kai maladiloia e rromiake katar o Urias. 16Ondaka o David molisailo e Devleke te sastol o minono. Cherda alluno, ta nakhela e riat inzardo pe phuv. 17Ta e phure katar o cher avile te vazden le katar e phuv. A vou ni kamla ta ni jala lenchar.
18Pala eftato llive o minono mulo, ta e sluge e Davideke darana te phenel leke kai o minono muloa, ta phenena iek avereke:
Kana o minono saia llundo, ni kamela te asunel amen, ¿sar akana ka phena leke kai o minono mulo? ¡Sai cherel iek baro dilipe!
19Ta kana o David dikhla kai leke sluga balavina maskar pete, acharda kai leko minono mulo, ta puchla pe slugen:
¿Mulo o minono?
A e sluge phende leke:
Ea, mulo.
20Ondaka o David ustilo katar e phuv, jaladape, lachardape, ta dia ando cher e Devleko, ta blagosisarda e Devle. Mapalal avilo kai po cher, mangla te anen leke marrno, ta jala. 21Ta leke sluge phende leke:
¿So chere glamno charo? Kana o minono saia llundo cherea alluno ta rovea pala le. Akana kai mulo, ustilan katar e phuv ta thodan tut te ja.
22Ta o David phenda lenge:
Kana vou saia llundo me cherava alluno ta rovava soke misliva kai e Devleke ka avel zalba letar ta kai ka mukel le te zivil. 23Akana kai o minono mulo, ¿pala so ka cherav alluno? ¿Sai cherav me te iril pe? Me llav lete, a vou ni ka irilpe mande.
Biandol o Salomon
24Mapalal o David dia zor pe rromia e Betsabee. Llelo late ta sovto laia, ta maladila lake iek chaurro ta thoda leko anav Salomon, ta Del volisarda le, 25ta o Del bichalda e Natane o profeta, te phenel te thoven e minoneko anav Jedidias.
O David lel e foro katar e Raba
1 Kr 20.1-3
26O Joab marelape e foroia e Raba kai saia katar e amonitura, ta lia o foro e charoko. 27Ondaka o Joab bichalda llenen kai o David te phenen leke:
Phanglem o foro katar e Raba ta e llene katar o foro nasti llan te len peke pai. 28Chide e boñikonen kai achen ta de po foro ta le le, soke te lav le me, ka ikharav le pe mo anav.
29Ta o David ikharda saurren katar o foro, mardepe e Rabaaia ta lie la. 30Ta o David lia e korona katar o charo, ta e korona phariavela tranda ta trin kile. Sea la klea but sukar, ta thode la po soro e Davideko. Ta o David lia but ezgode katar o foro. 31Ta e llenen kai sea ando foro ikanda len kotar ta thoda len te chinen kasta e toverenchar ta te radin e phuv e sastrenchar. Mapalal o David irisailo pe boñikonenchar ando Jerusalem.
Currently Selected:
2 Samuel 12: BACHRO
Highlight
Copy
Compare
Share
Want to have your highlights saved across all your devices? Sign up or sign in
Biblia ande chib Romani © Sociedad Bíblica Chilena, 2018.
