2 Samuel 10
10
O David dobil e sirionen ta e amonitonen
1 Kr 19.1-19
1Mapalal katar gala ezgode o charo katar e amonitura mulo, ta pe leko than charoisarda leko chavo o Janun. 2Ondaka o David phenda:
Me ka avav posteno e Janunea gia sar leko dad o Najas saia posteno manchar, goleke bichalda llenen te den zor e Janune pala o meripe katar leko dad. A kana e llene avile ande phuv katar e amonitura, 3e mai preche gazda katar e amonitura phende e Januneke, lengo gazda:
Glamno gazda, ¿tu pacha kai o David bichalda gale llenen te den tut zor pala o meripe katar cho dad? ¡Vou bichalda len te sai dikhen so si ando foro, ta mapalal te zatril le!
4Ondaka o Janun phangla e llenen kai bichalda o David. Jaliarde len, chinde dopas katar lenge chor, pharrade lenge patave pe dui kotora llik mai tele katar lengo maskar, ta tradie len kotar. 5Kana phende e Davideke so nakhla, o David bichalda llenen te maladon lenchar soke von lallana but. Ta o charo phenda te achen ando Jeriko llik kana ka barion lenge chor, ta mapalal te aven lete.
6Ta kana e amonitura dikhle kai o David murzila pe lende, chinade boñikonen siriura katar o Bet Rejob ta siriura katar e Soba, bis milie murusa kai llana peske, katar o charo o Maaka milia murusa, ta katar o Is Tob desudui milie murusa. 7Ta kana o David llangla gaia ezgoda, bichalda e Joabe ta sa e boñikonen tromane. 8Ta likiste e amonitura te marenpe ta thodepe po udar katar o foro. A e siriura katar e forura Soba, Rejob, Is Tob ta Maaka thodepe mai dur ando vos. 9O Joab kana dikhla kai o maripe saia te avel anglal ta palal lendar, esvirisarda katar e mai tromane katar e boñikura, ta lacharda len te marenpe e sirionenchar. 10Ta thoda pe phlale e Abisaie te inllarel ogole boñikonen te marenpe e amonitonenchar, 11ta phenda leke:
Te dobina man e siriura, tu ka ave te pomozi man, a te dobina tut e amonitura, me ka llav te pomoziv tut. 12Te ave zuralo, mara amen pala amaro foro, pala e forura katar amaro Del. ¡Te cherdol e volia e Devleki!
13Ondaka o Joab ta o foro kai saia lea llele te marenpe e sirionenchar, a e siriura nasle lendar. 14Ta kana e amonitura dikhle kai e siriura nasena, i von nasle katar o Abisai ta gurudile ando foro. Ondaka o Joab irisailo te marelpe e amonitonenchar, ta avilo ando Jerusalem.
15Ta kana e siriura dikhle kai o Israel dobisarda len, pale chidinaile. 16O Adad Ezer bichalda te anen e sirionen kai sea pe o goia rig katar o Eufrates. Ta von avile ando Jelam, ta o Sobak kai saia glamno boñiko katar o Adad Ezer inllarena len. 17Ta kana phende e Davideke so nakhela, o David chidia sa e llenen katar o Israele. Nakhlo o Jordan ta avilo ando Jelam, ta e siriura lachardile te marenpe ta mardepe e Davidea. 18A e siriura nasle katar o Israel ta o David mundarda e llenen kai llana pe efta stotine bordona, ta i mundarda saranda milie boñikonen katar e siriura, ta ranisarda e Sobake o glamno boñiko sirio, ta mulo kote. 19Ta kana dikhle sa e charura kai pomozina e Adad Ezere, sar o Israel dobisarda len, lachardile e Israelea ta radisarde lenge, ta kotar angle e siriura daraile te pomozin e amonitonen.
Currently Selected:
2 Samuel 10: BACHRO
Highlight
Copy
Compare
Share
Want to have your highlights saved across all your devices? Sign up or sign in
Biblia ande chib Romani © Sociedad Bíblica Chilena, 2018.
