2 Relles 3
3
O Joram charoil ando Israel
1O Joram chavo katar o Ajab thoda te charoil ando Israel kana cherena desojto burs kai o Josafat charoila ando Juda. O Joram charoisarda desudui burs ande Samaria. 2O Joram cherda o bilachipe angla e Devleke akha, a na gachin sargo leko dad ta leki dei, soke zatrisarda e estatue barrustune kai leko dad vazdiaia e Baaleke. 3O Joram cherda isto gola ezgode bilache kai cherda o Jeroboam, chavo katar o Nabat kai cherda te cherel o bilachipe o Israel.
O Eliseo phenel kai ka dobin e Moabe
4O Mesa kai saia o charo katar o Moab saia le but bakre, ta suako burs pochinela e charoke katar o Israel stotina milie bakre ta e bal katar stotina milie bakre. 5A kana o Ajab mulo o Mesa vazdiniaola po Israel. 6Ondaka o charo o Joram likisto katar e Samaria ta chidia sa e boñikonen katar o Israel. 7Ta bichalda te phenen gia e Josafateke, charo katar o Juda:
O charo katar o Moab vazdinailo pe ma. ¿Mange te pomozi man te mara amen lea?
Ta o Josafat phenda leke:
Ka llau soke me sem sargo tu, mo foro sargo cho foro, ta me gra sargo che gra. 8¿A sar ka chera te da pe lete?
O Joram phenda:
Amen ka lla po drom po pusto katar o Edom. 9Gia likiste o charo katar o Israel, o charo katar o Juda ta o charo katar o Edom. Kana phirde po pusto, pala efta llive getosailo o pai kai saia e boñikonenge ta e grastenge. 10Ondaka o charo katar o Israel phenda:
¡Ioi! O Del anda amen e trine charonen te del amen ande va katar e moabitura.
11O Josafat puchla:
¿Inai kate iek profeta e Devleko te sai pucha e Devle so ka chera?
Iek gazda e boñikonengo katar o charo e Israeleko phenda:
Kate si o Eliseo chavo katar o Safat kai saia o sluga e Eliaseko.
12O Josafat phenda:
¡Vou ka phenel amenge so phenel o Del!
Ta e trin charura llele te dikhen e Eliseo. 13Ondaka o Eliseo phenda e charoke katar o Israel:
¡Inai man niso tuia! ¡lla ta puch e profetanen kai cho dad ta chi dei suako drom puchen!
Ta o charo e Israeleko phenda leke:
Ni ka cherav le. O Del anda amen e trine charonen te del amen ande va katar e moabitura.
14Ta o Eliseo phenda leke:
Dav tut mo alav ando anav katar o Del kai si le sa e zor, kai te na avilaia pala o liubao kai si man po Josafat o charo katar o Juda, ni asundema tut ta ni dikhlema ni pe tute. 15Anen mange iek sfirachi.
Kana o sfirachi thoda te basalel, o va e Devleko avilo po Eliseo, 16ta o Eliseo phenda:
O Del phenel gia:
Cheren thana te chidiniaol o pai pe gaia umal, 17ni ka dikhen balav ta ni bursin, a gaia umal ka avel pherdi pai ta sa tumen, ta sa tumare zivirinie ta tumare gra ka pien. 18O Del sai cherel le. Vou ka pomozil tumen te dobin e moabitonen, 19tumen ka zatrin sa e mai bare forura kai truial si len zidura bare. Ka chinen sa e kasta kai den septelie, ka phanden sa e bunaria ta ka chuden barra pe sa e vostanura.
20Thiarinako rano kana delpe o kurbano, avilo pai katar o Edom ta sa goia phuv pherdili pai. 21Kana e moabitura asunde kai e trin charura avena te marenpe lenchar, ikharde saurren katar e mai terne llik kai e mai phure, ta thodepe chak anglal katar pi phuv te marenpe. 22Thiarinako rano ustile ta o kham klichila po pai. Ta e moabitura dikhle o pai lolo sargo o rat. 23Ondaka phende:
¡Gava si o rat katar e charura kai mardepe ta mundardepe maskar pete! ¡Moabitura, aven te la e ezgode kai mukle!
24Ta kana e moabitura avile kai o pero katar e israelitura, e israelitura die pe lende. E moabitura nasle, a e israelitura rodie len ta mundarde len. 25Zatrisarde e forura ta chudie barra pe vostanura, phangle e bunaria ta chinde e kasta kai dena septelie. Samo achilo o foro katar o Kir Jareset, ta e boñikura kai chudena barra truisarde le ta zatrisarde le.
26Kana o charo katar o Moab dikhla kai jasarela, ikharda efta stotine boñikura kai marenape e jarnienchar te marelpe e charoia katar o Edom. Ta nasti dobisarde le. 27Ondaka inllarda pe chave e mai purane pasa o zido katar o foro, ta kote mundarda le ta phabarda le sargo kurbano pe deleke. Gava chavo saia te charoil mapalal letar. Kana dikhle so cherda o charo, e israelitura jolaile gachin kai irisaile kai pi phuv.
Currently Selected:
2 Relles 3: BACHRO
Highlight
Copy
Compare
Share
Want to have your highlights saved across all your devices? Sign up or sign in
Biblia ande chib Romani © Sociedad Bíblica Chilena, 2018.
