2 Relles 4
4
E bari ezgoda Devlikani katar o zeitino
1Iek diskinia kai saia pala iek profeta, phenda e Eliseoke:
Cho sluga mo rrom mulo ta tu llane kai vou blagosila e Devle. Vou mangla love unllile, ta o lleno kai dia le unllile mangel te lel me duie chaven te aven leke sluge.
2O Eliseo puchla la:
¿So sai cherav pala tu? Phen mange, ¿so si tut ando cher?
E diskinia phenda leke:
¡Samo si man iek piri zeitinoia!
3O Eliseo phenda lake:
Mang piria chuche katar e llene kai zivin truial. Te anen chuke so sai mai but. 4Mapalal de ande cho cher che chavenchar ta phande o udar. Thou zeitino ande piria, ta gia sar pere suako iek thov la pe iek rig.
5Ondaka e diskinia llelitar kai po cher, dia andre pe chaurrenchar ta phangla o udar. Lake chave anena e piria ta voi pherela len zeitino. 6Ta kana sa e piria sea pherde, phenda iekheke katar lake chave:
An mange aver piri.
Ta vou phenda lake:
Inai ios piria.
Ondaka getosailo o zeitino. 7E diskinia lleli te dikhel e Eliseo ta phenda leke so nakhla. Ta vou phenda lake:
Lla ta bichin o zeitino ta pochin so san unllile gole lleneke. So ka achel tut ka zivi tu ta che chave.
O Eliseo ta e sunamita
8Iek llive o Eliseo llelo ando Sunem. Kote zivila iek diskinia but preche kai ikharda le te jal. Ta suako drom kana o Eliseo nakhela kotar llala late te jal. 9Ondaka voi phenda pe rromeke:
Akana me llanav kai gua lleno kai avel te dikhel amen si profeta e Devleko. 10Aide te chera upral po cher iek soba leke. Ka thova andre iek postelia, iek stolicha, iek stali ta iek lampara, gia o profeta kana ka avel amende ka avel le iek than kai te racharel.
11Iek drom o Eliseo avilo ta achilo te racharel ande soba kai cherdea leke. 12Ta phenda pe slugake o Gejazieke:
Lla ta ikhar e sunamita.
O sluga ikharda la ta kana voi avili, o Eliseo phenda pe slugake:
13Puch gale diskinia kai si but pachivali amenchar so sai chera pala la. Voi te mangela, amen sai da lachi orba latar e charoke o e gazdake katar e boñikura.
Ta e diskinia phenda:
Me ziviu maskar mo foro, ni trubul man niso. 14Ta o Eliseo puchla e Gejazie:
¿So sai chera pala la?
O Gejazi phenda e Eliseoke:
Ni llanav. Inai la chave ta lako rrom si phuro. 15Ikhar la phenda o Eliseo.
Ta o sluga llelo te ikharel la, a voi achili pe porrne po udar e chereko. 16Ta o Eliseo phenda lake:
O gua burs isto ande gala llivesa ka inllare che minone ande che va.
Ta e diskinia phenda:
Tu san profeta e Devleko a me sem chi sluga. Na mar espurnia katar chi sluga.
17Ta isto gia sar phendaia lake o Eliseo, kana nakhla burs llive e diskinia achili khamni ta maladila lake iek minono. 18O minono barilo. Ta iek llive llelo kai po dad kai radila e phuv pe slugenchar. 19Ondaka o minono urkisarda:
¡Mo soro! ¡Dukhal man mo soro!
Ondaka lekpo dad phenda pe slugake:
Inllar e minone kai leki dei.
20O sluga inllarda le kai leki dei, ta voi thoda le pe pe changa llik kai o dopas e lliveseko. Ta o minono mulo. 21Ondaka voi anda e minone ta thoda le ande soba e profetaki, thoda le pe postelia, likisti ta phangla o udar. 22Mapalal ikharda pe rrome ta phenda leke:
An mange iek sluga ta iek magarcha te llav oma kai o profeta. Mapalal ka avav.
23Lako rrom puchla la:
¿Soke lla allive te dikhe le? Inai nevo chon ta inai sabado.
Voi phenda leke:
Na brigisao, me llanav so cherav. 24E diskinia phenda te lacharen e magarcha, ta phenda pe slugake:
Sigar ta na achi lligo ni ka phenav le chuke.
25Ta e diskinia lleli po burdo o Karmelo. Kana o Eliseo dikhla la kai avela duratar, phenda e Gejazieke:
Dik, avel e diskinia sunamita. 26Praste te malado laia, ta puch la sar si lako rrom ta lako chaurro.
Kana o Gejazi puchla la, e diskinia phenda leke, sukar. 27A kana avili kai o Eliseo chudiape pe leke porrne. Ta o Gejazi mangla te lel la letar, o Eliseo phenda leke:
¡Mukla! Voi si but tristome, a o Del ni phenda mange so nakhla.
28Ondaka e diskinia phenda e Eliseoke:
¿Manglem tutar iek minono? ¿Ni phendem chuke te na mare mandar espurnia?
29O Eliseo phenda e Gejazieke:
Lachar tut, le mi rovli ta lla kai si o minono. Te maladan fika po drom na phen leke sar si. A fiko te puchel tut sar san, na phen leke niso. Kana ka ave thov mi rovli po mui e minoneko.
30A e dei katar o minono phenda e Eliseoke:
Jau chuke sovel po Del ta pe tu, kai ni ka mukau tut kate.
31Ondaka o Eliseo llelo laia. O Gejazi avilo mai oma neko von, ta thoda e rovli po mui e minoneko, a o minono ni miskosailo. O Gejazi llelo kai o Eliseo ta phenda leke:
O minono ni llungadol.
32Kana o Eliseo dia ando cher, dikhla kai o minono saia mulo inzardo pe postelia. 33Dia ande soba phangla o udar, achilo korkorre e minonea ta molisailo e Devleke. 34Mapalal inzilo upral po minono. Thoda po mui pe minoneko, pe akha pe akha e minoneke ta pe va pe va pe minoneke, ta gia e esnaga e minoneki thoda te tatol. 35Mapalal o Eliseo ustilo ta phirda pe suako rig katar e soba. Ta pale inzilo po minono. Ondaka o minono dia chin efta droma ta putarda pe akha. 36O Eliseo ikharda e Gejazie, ta phenda leke:
Ikhar e sunamita.
O Gejazi ikharda la ta kana voi avili o Eliseo phenda lake:
Le che minone.
37Ta e diskinia chudiape pe porrne e Eliseoke. Mapalal lia e minone ta likisti katar e soba.
E bari ezgoda Devlikani katar o jape
38Mapalal katar gala ezgode o Eliseo irisailo ando Gilgal. Ande gua vreme ni saia jape ande goia phuv ta saia bari bok, ta e poraukura sea e Eliseoa, ta o Eliseo phenda pe slugake:
Thou e bari kavi pe iag ta cher iek zumi.
39Iek katar e poraukura llelo ando vos ta malada septelie sargo dudum. Pherda po gertachi lendar, anda len ando cher ta chirada len bi te llanel so sea. 40Kana thode te jan, e poraukura urkisarde:
¡Eliseo, profeta e Devleko, o meripe si ande zumi! Ta ni jale ios. 41A o Eliseo phenda:
Anen mange arina. Ta thoda e arina andre ande kavi, ta phenda:
¡Akana den len te jan!
Ta sa jale ta o jape ni cherda lenge niso.
42Mapalal avilo iek lleno katar o Baal Salisa ta anda e Eliseoke bis marrne cherde katar e sebada mai terni. Ta o Eliseo phenda pe slugake:
De o marrno te jan e llenen.
43A o sluga phenda e Eliseoke:
¿Sar ka dav te jan stotina llene?
Ta o Eliseo phenda leke:
De o marrno te jan e llenen soke o Del phenda kai sa ka jan ta i ka achel.
44Ta o sluga thoda o marrno angla lende, ta von jale ta achila len marrno isto gia sar phendaia le o Del.
Currently Selected:
2 Relles 4: BACHRO
Highlight
Copy
Compare
Share
Want to have your highlights saved across all your devices? Sign up or sign in
Biblia ande chib Romani © Sociedad Bíblica Chilena, 2018.
