2 Relles 2
2
O Elias si inllardo ando miloso
1O Del mangla te inllarel e Eliase ando miloso ande iek bari balav. Gua llive o Elias ta o Eliseo avena katar o Gilgal. 2Ta o Elias phenda e Eliseoke:
Achi kate soke o Del bichalda man te llav ando Betel.
A o Eliseo phenda leke:
Jau chuke sovel po Del ta pe tu kai ni ka mukav tut.
Goleke e dui lleletar ando Betel. 3A e poraukura kai sea ando Betel likiste te dikhen e Eliseo ta puchle le:
¿Llane kai allive o Del ka inllarel che kovache?
Ta o Eliseo phenda lenge:
Ea llanav le. Na phenen niso. 4Ta o Elias phenda e Eliseoke:
Achi kate soke o Del bichalda man te llav ando Jeriko.
A o vou phenda leke:
Jav chuke sovel po Del ta pe tu kai ni ka mukav tut.
Ta e dui lleletar ando Jeriko. 5Ta avile e poraukura katar o Jeriko kai o Eliseo ta phende leke:
¿Llane kai allive o Del ka lel tutar che kovache?
Ta vou phenda lenge:
Ea llanav le. Na phenen niso.
6Mapalal o Elias phenda e Eliseoke:
Me moliv man chuke, achi kate soke o Del bichalda man te llav kai o pai katar o Jordan.
A o Eliseo phenda leke:
Jav chuke sovel po Del ta pe tu kai ni ka mukav tut. Ta e dui lleletar. 7Ta avile pasa o pai katar o Jordan pinda poraukura ta thodepe na but dur lendar. Ta von dui achile pasa o pai katar o Jordan. 8Ondaka o Elias lia po gertachi, ulisarda le ta chalada lea upral po pai, ta o pai fuladilo pe dui kotora. Ta e dui nakhle pe phuv e suki. 9Kana nakhle pe ogoia rig, o Elias phenda e Eliseoke:
Phen mange so mange te cherav pala tu mai anglal te avav inllardo.
O Eliseo phenda leke:
De man dui droma katar cho duo.
10Inai minoni ezgoda kai mange mandar. Te dikhea man kana ka avav inllardo, ka le so manglan. A te na dikhea man, ni ka le so manglan.
11Ta kana von phirena ta dena orba, avilo iek bordon iagako ta gra iagake. Ta fulada e duien. Ta o Elias llelo ando miloso ande iek bari balav. 12Ta o Eliseo urkisarda:
¡Dade! ¡Dade! Tu sana e Israeleke bordona ta boñikura kai llan pe gra.
Mapalal nikada ios ni dikhla le. Ondaka chinda pe patave pe dui kotora.
O Eliseo achel po than e Eliaseko
13Mapalal lia o gertachi kai peradaia o Elias ta thodape pasa o pai katar o Jordan. 14E gertachea chalada upral po pai ta phenda:
¿Kaitalo o Del o Gazda e Eliaseko?
Ta kana chalada upral po pai, o pai fuladilo pe dui kotora, ta o Eliseo nakhlo o Jordan pe phuv e suki. 15Kana e poraukura kai sea ando Jeriko dikhle e Eliseo pe ogoia rig katar o Jordan, phende:
O duo katar o Elias akana si po Eliseo. Ondaka llele te dikhen le, ta kana malade le die changenchar angla le.
16Ta phende leke:
Amen sam che sluge. Si amen pinda llene tromane kai sai roden che kovache. Sai avel kai o duo e Devleko inllarda le pe iek burdo o pe fisavi umal.
O Eliseo phenda lenge:
Te na llal niko.
17Ta e poraukura mangle letar gachin droma te llan e pinda llene, kai o Eliseo mukla len te roden e Eliase. Ta rodie e Eliase trin llive ta ni malade le. 18Kana e pinda llene irisaile ando Jeriko o Eliseo phenda lenge:
Phendem le tumenge te na llan.
O Eliseo chistol o pai kai likel katar e phuv ando Jeriko
19E llene katar o Jeriko phende e Eliseoke:
Dik, o foro si vazdino pe iek rig but sukar a o pai inai lacho ta e phuv ni del niso.
20O Eliseo phenda lenge:
Anen mange iek piri nevi ta thoven lon andre, ta von ande e piri. 21Ondaka o Eliseo llelo kai o pai kai likel katar e phuv ta chudia kote o lon ta phenda:
Gia phenel o Del:
Me chistosardem gava pai ta nikada ios ni ka avel ande lete nasualipe ta ni meripe.
22Sar kotar o pai achilo chisto llik allive gia sar phenda le o Eliseo.
23Mapalal o Eliseo llelotar ando Betel. Kana llala po drom likiste nesave chaurre ta marde letar espurnia, ta phenena leke:
¡Lla jalea, lla!
24Ondaka o Eliseo boldinailo, dikhla pe lende, ta dia len armaia ando anav e Devleko. Isto kote likiste katar o vos dui melledura ta mundarde saranda ta dui katar e chaurre. 25Mapalal o Eliseo llelotar po burdo o Karmelo, ta kotar irisailo ande Samaria.
Currently Selected:
2 Relles 2: BACHRO
Highlight
Copy
Compare
Share
Want to have your highlights saved across all your devices? Sign up or sign in
Biblia ande chib Romani © Sociedad Bíblica Chilena, 2018.
