2 Relles 20
20
O Ezekias sastol
2 Kr 32.24-26; Is 38.1-8
1Ande gua vreme o Ezekias nasuailo ta saia po meripe. Ondaka o Isaias chavo katar o Amos llelo te dikhel le ta phenda leke:
Gia phenel o Del:
Lachar che ezgode ande chi familia, soke ka mere ta ni ka zivi.
2Ondaka o Ezekias boldinailo karing o zido ta molisailo e Devleke, ta phenda leke:
3Me moliv man chuke Devla te de tut golli kai llelem angla tu chachimaia ta sa me liea ta kai cherava chi volia. Ta o Ezekias rovda but.
4Ondaka mai anglal o Isaias te resel kai o dopas katar e bar, o Del phenda e Isaiaseke gia:
5Irisao kai o Ezekias ta phen leke gia:
O Del katar cho dad o David phenel gia:
Me asundem cho molipe ta dikhlem che ausa. Me ka sastarav tut, ta ande trin llivesa ios ka lla ando cher e Devleko. 6Ka dav tut desupanch burs ios te zivi. Ka braduiv tut ta e Jerusaleme katar o charo katar e Asiria. Me ka arakhav gale foro. Ka cherav le pala ma ta pala mo sluga o David.
7O Isaias phenda te drobon ta te amin simochine, ta kana cherde le thode le pe leko mas kai saia nasualo, ta o charo sastilo. 8Mai anglal katar gua o Ezekias puchlaia e Isaiase:
¿Savi ezgoda si te dikhol te sai llanav kai o Del ka sastarel man ta kai ande trin llivesa ka llav ando cher e Devleko?
9O Isaias phenda leke:
Gaia si e ezgoda kai ka dikhol:
¿Mange te llal angle e senka des thana, o te irilpe des thana?
10Ta o Ezekias phenda:
Inai baro rado te llal angle e senka. Trudno si te llal palpale.
11Ondaka o profeta molisailo e Devleke, ta o Del cherda te llal palpale e senka des thana ando saiato e khameko katar o Ajaz.
O Ezekias ta e bichalde katar e Babilonia
2 Kr 32.27-31; Is 39.1-8
12Ande gua vreme o charo Merodak baladan, chavo katar o Baladan, charo katar e Babilonia, asunda kai o Ezekias saia nasualo ta bichalda llene te anen leke lila ta ezgode sukar. 13O Ezekias lia e llenen kai ande leke e lila ta e ezgode sukar, ta sikada lenge po sunakai, o rup, e merisura o zeitino sukar ta o cher kai guruvena e ezgode marimake. Ni saia niso ando cher katar e charoina kai vou ni sikada lenge. 14Ondaka o profeta o Isaias llelo te dikhel e Ezekiase ta puchla le:
¿Katar avile gala llene ta so phende chuke?
O Ezekias phenda:
Von avile duratar, avile katar e Babilonia.
15O Isaias puchla:
¿A so dikhle ando cher e charoinako?
O Ezekias phenda:
Dikhle sa so si andre. Niso inai kai me ni sikadem lenge.
16Ondaka o Isaias phenda e Ezekiaseke:
Asun so phenel o Del:
17Ka aven llivesa kana sa so si ando cher e charoinako, sa so chidie che dada, ka inllaren le ande Babilonia. Niso ni ka achel. O Del phenda le.#2 R 24.13; 2 Kr 36.10. 18Ta i katar che chave kai ka aven tut ka inllaren le ande Babilonia te aven incha sluge ando cher e charoko.#2 R 24.14-15; Dn 1.1-7.
19Ondaka o Ezekias phenda e Isaiaseke gia:
E alava kai phendan mange e Devletar si lache, soke ande murno vreme ka avel pas ta chachipe.
O meripe katar o Ezekias
2 Kr 32.32-33
20Sa so cherda o Ezekias, sa katar leko gazdaripe, ta sar cherda o bunari ta e lenorri te anel o pai ando foro, sa si pisime ando lil katar so cherde e charura e Judaeke. 21O Ezekias mulo ta prajosarde le pasa leke purane. Mapalal charoisarda pe leko than leko chavo o Manases.
Currently Selected:
2 Relles 20: BACHRO
Highlight
Copy
Compare
Share
Want to have your highlights saved across all your devices? Sign up or sign in
Biblia ande chib Romani © Sociedad Bíblica Chilena, 2018.
