2 Relles 21
21
O Manases charoil ando Juda
2 Kr 33.1-20
1Kana o Manases thodape te charoil sea leke desudui burs. Charoisarda ando Jerusalem pinda ta panch burs. Leki dei saia e Jepsiba. 2A o Manases cherda o bilachipe angla e akha e Devleke, soke cherda o gadope kai cherdea e forura kai o Del chudiaia angla e israelitura.#Jer 15.4. 3Pale vazdia e thana dine e delenge kai o Ezekias peradaia. Vazdia thana te blagosin e Baale ta cherda iek estatua katar e Asera sar cherdaia le o Ajab, charo e Israeleko, ta i blagosisarda e cheraien katar o miloso. 4Vazdia altarura ando cher e Devleko, kai o Del phendaia kai gava cher ka avel dino leke anaveke ando Jerusalem.#2 S 7.13. 5Ta vazdia altarura ande dui bar katar o cher e Devleko te sai blagosin e cheraien e milosoke.
6Ta dia kurbano pe chave ande iag, ta thodape te apogodil. Cherdilo chirimatarko ta cherela chirimate. Gia bilacho saia kai o Del jolailo but. 7Ta i thoda ando cher e Devleko iek estatua katar e Asera kai isto vou cherdaia, a o Del phendaia e Davideke ta leke chaveke e Salomoneke:
Me ka thovav ostade mo anav ande gava cher ta ando Jerusalem, o foro kai esvirisardem maskar sa e viche e Israeleke, 8ni ka tradav pale e israelitonen katar e phuv kai diem lenge daden, samo te cherde mi volia ta te cherde sa o sikadipe kai diem len prema sa o zakono kai mo sluga o Moises phenda lenge te kanden.#1 R 9.3-5; 2 Kr 7.12-18.
9A von ni asunde. Ta o Manases cherda te aven mai bilache neko gola forura kai o Del zatrisarda angla e chave katar o israel. 10Goleke o Del dia orba pe slugenchar e poraukura, ta phenda:
11Soke o Manases cherda gachin gadope, ta soke cherdilo mai bilacho neko e amorreura kai sea mai anglal letar, ta soke cherda e Judae te blagosin avere delen, 12goleke, me o Del e Israeleko phenav:
Me ka cherav gia bari zatrania ando Jerusalem ta o Juda kai kogo ka asunel, zabunime ka achen lenge kan. 13Ka llinav e pole katar o Jerusalem isto e solea kai llindem e pole katar e Samaria, ta ka thovav e plomada katar e familia katar o Ajab. Ka jalavav e foro katar o Jerusalem sargo kana jalaven iek taso ta thoven le telemoia. 14Ta ogola llene katar mo foro ka mukav len ande va katar lenge dusmanura, te zatrin len ta te choren lenge ezgode. 15Soke cherde o bilachipe angla me akha ta joliarde man, sar kana lenge purane likiste katar o Ejipto llik allive.
16Ta na samo kai o Manases cherda e Judae te cheren ezgode bilache angla e akha e Devleke, soke mundarda gachine llenen lache ando Jerusalem kai pherdilo o foro katar lengo rat. 17Sa so cherda o Manases, sa e ezgode bilache kai cherda, si pisime ando lil katar so cherde e charura e Judaeke. 18Kana mulo prajosarde le ando vostano katar leko cher ando vostano katar o Uza. Mapalal charoisarda pe leko than leko chavo o Amon.
O Amon charoil ando Juda
2 Kr 33.21-25
19Kana o Amon thodape te charoil sea leke bis ta dui burs. Charoisarda ando Jerusalem dui burs. Leki dei saia e Mesulemet, chorri katar o Jarus katar o Jotba. 20A o Amon cherda o bilachipe angla e akha e Devleke gia sar cherda leko dad o Manases, 21soke cherda isto gola ezgode bilache kai cherda leko dad ta blagosisarda e delen kai blagosisarda leko dad. 22Ta mukla e Devle, o Del katar leke purane, ta ni llelo po drom e Devleko.
23E sluge katar o Amon vazdinaile pe lete, ta mundarde e charo ande leko cher. 24A e llene katar o foro mundarde sa gole llenen kai vazdinaile po charo o Amon, ta thode te charoil pe leko than leke chave e Josiase.
25Sa so cherda o Amon si pisime ando lil katar so cherde charura e Judaeke. 26Ta prajosarde le ande leko limori kai saia ando vostano katar o Uza. Mapalal thodape te charoil pe leko than leko chavo o Josias.
Currently Selected:
2 Relles 21: BACHRO
Highlight
Copy
Compare
Share
Want to have your highlights saved across all your devices? Sign up or sign in
Biblia ande chib Romani © Sociedad Bíblica Chilena, 2018.
