2 Relles 19
19
O Juda si braduime katar o Senakerib
2 Kr 32.20-23; Is 37.1-38
1Kana o Ezekias asunda gala ezgode pharrada pe patave, thodape patave zalosne ta dia ando cher e Devleko. 2Ta bichalda e Eliakime kai arakhela o cher e charoko, e Sebnake o pismiri ta e phuren katar e popura, te llan ande patave zalosne kai o profeta o Isaias chavo katar o Amoz,#Is 1.1. 3te phenen leke kai o Ezekias phenel gia:
Allive amen sam ande bari patnia ta ande bari duk, sargo iek diskinia kai maladol lake ta inai la zor. 4Daboida te asunda cho gazda o Del sa so phenda o Rabsake, kai o charo katar e Asiria bichalda le te kusel e Devle o llundo bilache alavenchar, kai o Del cho gazda asunda. Goleke molisao pala e llene kai achile.
5E sluge katar o charo o Ezekias llele kai o Isaias, 6ta o Isaias phenda lenge:
O Del phenel gia:
Na dara katar e alava bilache kai phende mange e sluge katar o charo katar e Asiria. 7Me ka thovav ande le iek duo ta ka asunel bune kai ka cheren le te irilpe kai pi phuv, ta incha ka cherav te mundaren le e jarniea.
8Ta kana irisailo o Rabsakes malada e charo katar e Asiria kai marelape e foroia katar o Libna, soke asunda kai lleloiatar katar o Lakis. 9Ta asunda kai o Tiraka charo katar e Etiopia likistoia te marelpe lea. Ondaka o Rabsakes pale bichalda llenen te phenen e Ezekiaseke gia:
10Te na kojavel tut cho Del te phenela chuke kai o Jerusalem ni ka perel ande va katar o charo katar e Asiria. 11Tu asundan so cherde e charura katar e Asiria avere phuvienge ta sar zatrisarde len. ¿A tu ka bradui tut? 12E forura katar o Gozan, o Jaran, o Resef ta e llene katar o Bet Eden kai zivina ande Telasar, kai me purane zatrisarde len, ¿braduisarde len lenge dela? 13¿Kaitalen e charura katar o Jamat, o Arfad, o Sefarvaim, o Ena ta o Iva?
14O Ezekias lia e lila kai ande leke e llene bichalde ta chitisarda len. Mapalal llelo kai o cher e Devleko ta thoda e lila angla o Del. 15Ta o Ezekias molisailo e Devleke gia:
Devla, o Del e Israeleko kai bese maskar e kerubinura. Samo tu san o Del pe sa e charoine katar o sueto. Tu cherdan o miloso ta e phuv.#Ek 25.18-22; 1 S 4.4; Sal 80.1; Is 37.16; Ez 1.26-28. 16Asun man Devla. Putar che akha ta dik. Asun e alava kai o Senakerib bichalda te phenen mange. Sa gale alava kusen tut kai san o Del o llundo. 17Istina si Devla, kai e charura katar e Asiria zatrisarde bute phuvien, 18ta phabarde lenge delen kastune ta barrustune kai isto e manusa cherde len, goleke zatrisarde len. 19Devla amaro Gazda, braduisar amen, me moliv man chuke, te llanen sa e phuvia kai samo tu san o Del.
20Ondaka o Isaias chavo katar o Amoz bichalda te phenen e Ezekiaseke:
Gia phenel o Del e Israeleko:
Me asundem cho molipe ta so manglan mandar katar o Senakerib, o charo katar e Asiria.
21Gala si e alava kai phenda o Del katar o charo katar e Asiria:
E chei, e chorri katar o Sion,
asal peke tutar.
Palal pala che zea miskol po soro espurniaia,
e chorri katar o Jerusalem.
22¿Ka dukhadan?
¿pe ka vazdian cho avazi?
¿ka dukhadan ta kuslan che alavenchar?
¡E Devle o Santo katar o Israel!
23E llenenchar kai bichaldan kuslan e Devle, ta phendan:
Me but bordonenchar marimake
likistem pe burdura
po than mai vazdino katar o Libano,
ka chinav e sedrura mai bare,
e pinura mai sukar.
Achilem pe thana kai si mai dur,
kai o vostano but sukar.
24Ande aver phuvia
cherdem bunaria ta pilem o pai,
ta me porrnenchar
sukardem sa e lena katar o Ejipto.
25¿A ni llanea kai sema me, o Del,
kai cherava sa gala ezgode?
Ollikana misliva te cherav len,
ta akana cherdem len,
goleke tu zatri e forura zidome
ta chere len umpa phagipe.
26E llenen katar gala forura ni saia len zor,
darana ta lallana,
sea sargo e char ando vos,
sargo e char zeleni
kai bariol upral pe chera
ta sukol mai anglal te bariol.
27Me llanav sa so chere,
llanav kana lla ta kana ave,
llanav kai san joliariko pe ma.
28Ta soke llanav sar jolailan pe mande,
ta soke asundem sar fali tut,
me ka thovav iek argolla pe cho nak,
ta iek salvari pe cho mui,
ta ka cherav te iri tut
isto katar o drom kai avilan.
29Ezekias:
Gaia si e ezgoda kai ka cherav te dikhe:
O purvo burs ta o duito burs tumen ka jan o lliu kai bariol korkorre,
a ando trito burs ka thoven e simiche ta ka chiden e septelie,
ka barion vostanura drakhake ta ka jan lenge septelie.
30E llene kai ka achen llunde ando Juda
ka barion lenge zile ta ka den septelie.
31Soke nesave ka achen ando Jerusalem,
po burdo katar o Sion nesave ka aven braduime.
Gua ka cherel le ande po baro volipe o Del kai si le sa e zor.
32Katar o charo katar e Asiria o Del phenel gia:
Ni ka del ando Jerusalem,
ni ka chudel ni iek llida,
ni ka del po foro eskudonenchar
ta ni ka vazdel phurd pe lete.
33Katar o drom kai avilo ka irilpe,
ni ka del ande gava foro.
O Del phenel le.
34Me ka arakhav gale foro
ta ka braduiv le.
Ka cherav le pala ma
ta pala mo sluga o David.
35Isto goia riat llelo o suecho e Devleko ta mundarda stotina ta ojtovardes ta panch milie murusen katar o pero e sirionengo. Ta thiarinako rano pe suako rig sea esnage mule. 36Ondaka o Senakerib charo katar e Asiria irisailo ando Ninive, ta kote achilo. 37Ta kana blagosila ando cher katar leko del o Nisrok, leke chave o Adramelek ta o Sarezer mundarde le e jarniea ta nasle ande phuv katar o Ararat. Mapalal charoisarda pe leko than leko chavo o Esar Jadon.
Currently Selected:
2 Relles 19: BACHRO
Highlight
Copy
Compare
Share
Want to have your highlights saved across all your devices? Sign up or sign in
Biblia ande chib Romani © Sociedad Bíblica Chilena, 2018.
