2 Relles 18
18
O Ezekias charoil ando Juda
2 Kr 29.1-2
1Kana nakhle trin burs sar kana thodape te charoil ando Israel o Oseas chavo katar o Ela, thodape te charoil ando Juda o Ezekias chavo katar o Ajaz. 2Sea leke bis ta panch burs kana thodape te charoil, ta charoisarda ando Jerusalem bis ta inia burs. Leki dei saia e Abi chei katar o Zakarias. 3O Ezekias cherda so si orta angla e akha e Devleke, gia sar cherda le o David leko dad. 4Ikanda e thana vazdine, phagla e estatue, ta chinda pe kotora e slike katar e Asera. Phagla o sap jarkuno kai cherdaia o Moises, soke e israelitura phabarena leke o taimano, ta ikharda le Nejustan.#Nm 21.9.
5O Ezekias thoda pi vera ando Del e Israeleko, ta maskar sa e charura kai sea omanglal ta mapalal letar, niko ni saia sargo vou. 6Nikada ni mukla e Devle ta guruda o zakono kai o Del diaia e Moisese. 7Goleke o Del pomozila le ande sa so cherela. Ta o Ezekias ni kamla te avel sluga e charoko katar e Asiria. 8Ta mardape e filisteonenchar ta dobisarda len ande sa e Gaza, katar e torre kai thovenpe te dikhen llik kai e forura zidome.
E zatrania katar e Samaria
9Kana nakhle star burs sar kana thodape te charoil o Ezekias, kana cherela efta burs kai charoila o Oseas ando Israel, o Salmanasar charo katar e Asiria, truisarda e Samaria ta mardape lenchar, 10ta kana nakhle trin burs dobisarda len ta e Samaria jasarda. Gua saia kana cherela sov burs sar kana charoila o Ezekias, ta inia burs sar kana charoila o Oseas ando Israel. 11Ta o charo katar e Asiria inllarda phangle e llenen katar o Israel ande Asiria ta thoda len ande forura katar o Jalaj ta o Jabor pasa o pai o Gozan, ta ande forura katar e medura, 12soke ni kandie e Devle ta phagle o alav kai achile e Devlea, ta ni asunde ni gurude o zakono e Moiseseko, sluga e Devleko.
O Senakerib del ando Juda
2 Kr 32.1-19; Is 36.1-22
13Kana nakhle desustar burs sar kana thodape te charoil o Ezekias, o Senakerib charo katar e Asiria, dia pe forura zidome katar o Juda ta dobisarda len. 14Ondaka o Ezekias, charo katar o Juda, bichalda te phenen e charoke katar e Asiria kai saia ando Lakis:
Me cherdem o bilachipe, le tut mandar ta ka cherav sogo ka phene mange.
Ta o charo katar e Asiria mangla katar o Ezekias te pochinel leke inia milie ta inia stotine kile rup, ta inia stotine ta iniavardes kile sunakai. 15O Ezekias dia le sa o rup kai saia ando cher e Devleko ta o sunakai katar e charoko cher. 16Ondaka o Ezekias ikanda katar o cher e Devleko o sunakai katar e udara ta katar lenge kasta kai isto vou thodaia pe lende, ta dia len e charoke katar e Asiria.
17Mapalal o charo katar e Asiria bichalda te llal o Tartan, o Rabsaris ta o Rabsake te marenpe e charoia e Ezekiasea. Von llele bute boñikonenchar katar o Lakis llik kai o Jerusalem ta logle pasa e lenorri kai si upral po drom kai ikharen le o lleno kai jalavel. 18Ikharde e charo, ta likiste o Eliakim chavo katar o Jilkiaias kai saia o sluga katar o cher e charoko, likisto o Sebna kai saia o pismiri, ta likisto o Joa chavo katar o Asaf kai arakhela e lila katar o charo. 19O gazda e boñikonengo phenda lenge:
Llan te phenen e Ezekiaseke kai gia phenel o baro charo katar e Asiria:
¿Ande ka si tut gia bari vera? 20¿Tu misli kai e sukar alava si e zor kai trubulpe ando maripe? ¿Ande ka si tut vera kai ni kame te kande man? 21Me dikhav kai mange te pomozil tut o Ejipto. A o Ejipto si sargo iek kas phago kai te istardilan pe lete, e kotora katar o kas ka pusaven cho va. Gia si o Faraon sa golenge kai uzdinpe ande le. 22A te phene kai tumen uzdin tumen ando Del, ¿Ni ikanda o Ezekias e thana vazdine, ta phenda e llenege katar o Juda ta o Jerusalem te blagosin e Devle angla gava altar ando Jerusalem? 23Achi po alav me gazdaia o charo katar e Asiria ta me ka dav tut dui milie gra te si tut e llene te llan pe lende. 24Tu nasti mare tut e gazdaia e boñikonengo mai minono katar e asiriura, i te uzdia tut ando Ejipto, ande bordona ta ande llene kai llan pe gra. 25¿Tu misli kai avilem te zatriv gaia phuv ta o Del ni bichalda man? ¡Vou phenda mange te dav pe gaia phuv ta te zatriv la!
26Ondaka o Eliakim chavo katar o Jilkias, o Sebna ta o Joaj phende e Rabsakeseke:
De orba che slugake ando arameo soke amen achara le, ta na de orba ando ebreo, soke e llene kai si po zido asunen.
27Ta o Rabsakes phenda:
Inai che gazdake ni tumenge kai o charo katar e Asiria bichalda man te phenav gala ezgode. Vou bichalda man te dav orba e llenenchar kai si po zido, soke von ta i tumen ka jan tumari pogastia ta ka pien tumaro muter.
28Ondaka o Rabsakes thodape pe porrne ta bare avazea phenda ando ebreo:
Asunen tumen so phenel o baro charo katar e Asiria: 29Te na kojavel tumen o Ezekias soke vou nasti braduil tumen katar me va. 30Na thoven sama kana o Ezekias ka phenel tumenge te uzdin tumen ando Del, te braduil tumen katar o charo katar e Asiria. 31Na asunen le soke o charo katar e Asiria mangel te achel tumenchar ande pas ta na te maren tumen lea. Gia suako lleno ka jal e septelie katar piro vostano drakhako, e septelie katar pire kasta simochinengo ta ka piel o pai katar piro bunari. 32Mapalal ka inllarel tumen ande iek phuv sargo tumari phuv, kai bariol o lliu te cheren marrno, ta vostanura drakhake te cheren mol. Iek phuv kai si zeitino maslinkengo ta aullin. Ka zivin ande pas ta ni ka meren. Na thoven sama so phenel tumenge o Ezekias kai o Del ka braduil tumen. 33¿Savo del braduisarda e phuvien katar o charo katar e Asiria? 34¿Kaitalo o del katar o Jamat ta o Arfad? ¿Kaitalen e dela katar o Sefarvaim, o Ena, ta o Iva? ¿Von braduisarde e Samaria katar me va? 35¿Savo del katar sa gala dela gale phuvienge braduisarda len katar me va? ¿Soke mislin tumen kai o Del ka cherel te avel braduime o Jerusalem katar me va?
36A o foro ni phenda niso, soke o charo phendaia te na phenen leke niso. 37Ondaka o Eliakim chavo katar o Jilkias kai arakhela o cher e charoko, o Sebna kai saia o pismiri, ta o Joaj kai arakhela e lila e charoke pharrade pe patave ta llele te dikhen e Ezekiase ta phenen leke e orba katar o Rabsakes.
Currently Selected:
2 Relles 18: BACHRO
Highlight
Copy
Compare
Share
Want to have your highlights saved across all your devices? Sign up or sign in
Biblia ande chib Romani © Sociedad Bíblica Chilena, 2018.
